भारत 'अ' संघाची फलंदाजी पुन्हा ढेपाळली; ऑस्ट्रेलिया 'अ' संघाचा ६९ धावांनी विजय

पुदुचेरी येथे भारत 'अ' आणि ऑस्ट्रेलिया 'अ' संघांमध्ये दुसरा अनधिकृत एकदिवसीय सामना खेळवण्यात आला. ऋतुराज गायकवाड यांच्या नेतृत्वाखालील भारत 'अ' संघाचा या सामन्यात ऑस्ट्रेलिया 'अ' संघाने ६९ धावांनी पराभव केला. भारतीय फलंदाजी पुन्हा एकदा अपयशी ठरली, आणि कर्णधार ऋतुराजसह पहिले तीन फलंदाज स्वस्तात बाद झाले.

नाणेफेक जिंकून ऑस्ट्रेलियाने प्रथम फलंदाजी करण्याचा निर्णय घेतला. त्यांचा डाव ४९.५ षटकांत २७५ धावांवर सर्वबाद झाला. सॅम कॉन्स्टासने ८८ चेंडूंत सात चौकार आणि एका षटकारासह सर्वाधिक ६७ धावा केल्या. जोश फ्लिपने आठ चौकारांसह ५८ चेंडूंत ५८ धावा केल्या, तर नॅथन मॅकस्वीनीने ३९ चेंडूंत ३२ धावांची भर घातली.

भारताकडून अर्शद खानने उत्कृष्ट गोलंदाजी करत तीन विकेट घेतल्या. यश ठाकूरला दोन विकेट मिळाल्या. विप्रज निगम, निशांत सिंधू, सूर्यांश शेडगे आणि अनुकूल रॉय यांनी प्रत्येकी एक विकेट घेतली.

विजयासाठी २७६ धावांचे लक्ष्य समोर होते, मात्र भारताची सुरुवात खराब झाली. ऑस्ट्रेलियन गोलंदाजांसमोर भारताची आघाडीची फळी कोसळली. सलामीवीर देवदत्त पडिक्कल फक्त एका धावेवर बाद झाला, तर साई सुदर्शन १३ धावा करून पॅव्हेलियनमध्ये परतला. तिसऱ्या क्रमांकावर फलंदाजीला आलेला कर्णधार ऋतुराज गायकवाड पाच चेंडूंत १२ धावा करून बाद झाला. भारताने अवघ्या ३० धावांत तीन विकेट गमावल्या होत्या. त्यानंतर संघाची धावसंख्या ५९ असताना कुमार कुशाग्रही १७ धावांवर बाद झाला.

चौथ्या क्रमांकावर फलंदाजी करणाऱ्या रजत पाटीदारने ८१ चेंडूंत ६७ धावा करून शानदार अर्धशतक झळकावले. पण त्याच्या या खेळीमुळे भारताला विजय मिळवता आला नाही. अखेरीस अनुकूल रॉयने नाबाद ३४ धावा करून भारताला २०० धावांच्या पुढे नेले, परंतु तो संघाला विजयाच्या उंबरठ्यावर नेऊ शकला नाही. भारताचा डाव ४५.२ षटकांत २०६ धावांवर आटोपला.

ऑस्ट्रेलियाकडून स्पेन्सर जॉन्सनने सर्वाधिक तीन विकेट घेतल्या. मेरेडिथ आणि तनवीर यांनी प्रत्येकी दोन विकेट घेतल्या.

याआधी पहिल्या सामन्यातही ऑस्ट्रेलियाने भारताला १२५ धावांच्या मोठ्या फरकाने पराभूत केले होते. या मालिकेतील तिसरा आणि अंतिम एकदिवसीय सामना ११ ऑक्टोबर रोजी त्याच मैदानावर खेळवला जाणार आहे.