'गोंधळ'च्या ऑस्कर निवडीवरून वाद, अनुराग कश्यपच्या टीकेला दिग्दर्शक संतोष डावखरांचं प्रत्युत्तर

मराठी सिनेमा 'गोंधळ' सध्या ऑस्करमुळं चर्चेत आहे. या सिनेमाची ऑस्करसाठी निवड झाली आणि त्यावर अनुराग कश्यपनं नाराजी व्यक्त केल्यानं वाद सुरू झाला. कश्यपच्या या वक्तव्यानंतर 'गोंधळ'चे दिग्दर्शक संतोष डावखर यांनी सोशल मीडियावर पोस्ट टाकत आपली बाजू मांडली.

एका मुलाखतीत अनुराग कश्यपनं ऑस्करसाठी भारताकडून होणाऱ्या सिनेमांच्या निवडीवर नाराजी बोलून दाखवली. ऑस्करसारख्या मोठ्या इंटरनॅशनल प्लॅटफॉर्मवर भारताकडून वेळोवेळी चुकीचे सिनेमे निवडले जातात, असं तो म्हणाल्याचं सांगितलं जातंय. या वक्तव्यावरून सोशल मीडियावर चांगलीच चर्चा रंगली, आणि याच पार्श्वभूमीवर संतोष डावखरांनी पोस्ट लिहून कश्यपला उत्तर दिलं.

आपल्या पोस्टमध्ये संतोष डावखरांनी सगळ्यांना आधी सिनेमा बघण्याचं आवाहन केलं. यावेळी त्यांनी कश्यपसोबत आधी झालेल्या एका भेटीचाही उल्लेख केला. संतोष सांगतात की, २६ एप्रिल रोजी बंगळुरूहून मुंबईला जाणाऱ्या विमानात त्यांची आणि अनुराग कश्यपची भेट झाली होती. आपण कश्यप आणि त्याच्या सिनेमांचा खूप आदर करतो, असंही संतोष म्हणाले.

याच भेटीत रात्री साधारण ११.५५ वाजता संतोषनं स्वतः कश्यपला 'गोंधळ' सिनेमाबद्दल सांगितलं होतं. त्यावेळी कश्यपनं या सिनेमाबद्दल आपण याआधी काही ऐकलंही नाही आणि तो बघितलाही नसल्याचं सांगितलं होतं, असा दावा संतोष यांनी केला. त्यानंतर कश्यपनं 'गोंधळ' बघणार असल्याचंही सांगितलं होतं. मात्र त्यानंतर हा सिनेमा मुंबईत कुठेही रिलीज झाला नाही किंवा दाखवला गेला नाही, असं संतोष यांनी आपल्या पोस्टमध्ये नमूद केलं.

याच मुद्द्यावर बोट ठेवत संतोष यांनी सवाल केला की, सिनेमा बघितलाच नसेल तर तो चुकीचा आहे असं कसं ठरवता येईल? कुठलाही निष्कर्ष काढण्याआधी प्रेक्षक आणि समीक्षकांनी सिनेमा बघावा, असं आवाहनही त्यांनी केलं.

'गोंधळ' हा मानसशास्त्रीय थरारपट असल्याचं संतोष डावखर यांनी स्पष्ट केलं. मराठी संस्कृतीचा गाभा आणि इंटरनॅशनल प्रेक्षकांना आवडेल असा विषय लक्षात घेऊन हा सिनेमा बनवण्यात आल्याचं त्यांनी सांगितलं. तसंच हा सिनेमा कुठल्या मोठ्या फिल्मी घराण्यातल्या व्यक्तीनं नाही, तर इंडस्ट्रीबाहेरच्या एका नव्या आणि उत्साही निर्मात्यानं बनवल्याचंही त्यांनी सांगितलं.

'गोंधळ' हा फक्त छोट्या पडद्यासाठी किंवा ओटीटीसाठी बनवलेला सिनेमा नाही, तर प्रेक्षकांना थिएटरमध्ये अनुभवता यावा यासाठी तो बनवण्यात आल्याचं संतोष यांनी सांगितलं. ऑस्करसारख्या जागतिक व्यासपीठावर भारताचं प्रतिनिधित्व करण्याची जबाबदारी आपल्याला पूर्ण कल्पना आहे, असंही ते म्हणाले. आता या वादावर पुढं आणखी काय प्रतिक्रिया येतात आणि अनुराग कश्यप पुन्हा काही बोलतो का, याकडं सिनेप्रेमींचं लक्ष लागलं आहे.