वसाहतवादाचा आरोप करणाऱ्यांनाच नेतन्याहूंचे प्रत्युत्तर, ब्रिटन-फ्रान्सवर संयुक्त राष्ट्रात टीका

संयुक्त राष्ट्रांचे महाधिवेशन सध्या सुरु आहे आणि यात एकापाठोपाठ एक मोठ्या घडामोडी घडत आहेत. इराणच्या पंतप्रधानांनी अमेरिकेसमोर न झुकण्याची भूमिका कायम ठेवत या व्यासपीठावर जोरदार भाषण केले. नेतन्याहू यांच्या भाषणाला सुरुवात होताच अनेक देशांचे प्रतिनिधी सभागृहातून उठून बाहेर पडले. ट्रम्प यांनीही धमकीवजा भाषण केले, तर भारताचे पंतप्रधान मोदी या अधिवेशनाला उपस्थितच राहिले नाहीत.

याच अधिवेशनात इस्रायलचे पंतप्रधान नेतन्याहू यांनी संयुक्त राष्ट्रांच्या महासभेत भाषण करताना, इस्रायलवर वसाहतवादाचा आरोप करणाऱ्या देशांवर कडाडून टीका केली. त्यांनी खासकरून ब्रिटन आणि फ्रान्सचे नाव घेत या दोन्ही देशांच्या जुन्या वसाहतवादी इतिहासावर बोट ठेवले.

नेतन्याहू यांच्या म्हणण्यानुसार, इस्रायलवर वसाहतवादाचा ठपका ठेवणाऱ्यांमध्ये ब्रिटन आणि फ्रान्समधील लोक आहेत. या दोन्ही देशांच्या वसाहती एकेकाळी जगभर पसरलेल्या होत्या, इतक्या की ब्रिटनच्या साम्राज्यावरचा सूर्य कधी मावळतच नाही अशा गोष्टी सांगितल्या जात असत. आता तेच देश दुसऱ्यांवर बोट दाखवत आहेत, याकडे लक्ष वेधत नेतन्याहू यांनी "सौ चुहे खाकर बिल्ली हज को चली" हा वाक्प्रचार वापरला. त्यामुळे आमच्यावर आरोप करण्याचा नैतिक अधिकार ब्रिटन आणि फ्रान्समधील लोकांना अजिबात नाही, असे त्यांनी ठणकावून सांगितले.

आपल्या भाषणात नेतन्याहू यांनी इस्रायलच्या स्थापनेनंतर झालेल्या युद्धाचा आणि देशाच्या सुरक्षेच्या प्रश्नांचाही उल्लेख केला. इस्रायलच्या भूभागाबाबत होणारे आरोप आणि देशाच्या अस्तित्वाचा मुद्दा यांची सांगड घालत त्यांनी आपली बाजू मांडली. हे भाषण सुरु असतानाच काही देशांचे प्रतिनिधी सभागृहातून बाहेर पडले, तर नेतन्याहू यांच्या शिष्टमंडळातील लोकांनी इस्रायलच्या समर्थनार्थ घोषणाबाजी केली.

दुसऱ्या महायुद्धानंतर ब्रिटनची स्थिती कमकुवत झाल्यावर, जिथे जिथे आपला दबदबा गुंडाळता येईल तिथून त्यांनी माघार घ्यायला सुरुवात केली, असा उल्लेखही या चर्चेत करण्यात आला. त्याकाळी ब्रिटन आणि युरोपियन देश हे जगावर वर्चस्व गाजवत होते. भारताला सतत त्रासात ठेवण्याच्या धोरणानुसार त्यांनी भारतातील काही लोकांना हाताशी धरून भारताची फाळणी घडवून आणली आणि पाकिस्तानची निर्मिती झाली, असेही सांगण्यात आले.

एकाच भूभागावर रेषा आखून तो प्रदेश प्रत्यक्षात जळत्या चितेसारखा करून ठेवला गेला, असे मांडले जाते. फोडा आणि राज्य करा या धोरणानुसार मध्यपूर्वेत पॅलेस्टाईनची जमीन इस्रायलला देऊन, मुस्लिम देशांच्या मधोमध इस्रायलची निर्मिती करण्यात आली आणि त्यामुळे मध्यपूर्वेतील शांतता संपुष्टात आली, असाही मुद्दा उपस्थित करण्यात आला आहे.

आज तोच इस्रायल जेव्हा गाझा आणि लेबनॉनमध्ये जागा बळकावताना दिसतो, तेव्हा हेच देश इस्रायलला उपदेशाचे डोस पाजत आहेत, असे नमूद करण्यात आले. मात्र आंतरराष्ट्रीय राजकारणात ब्रिटनचे पूर्वीसारखे वजन राहिलेले नसल्याने, त्यांच्या टीकेला इस्रायल फारसे गांभीर्याने घेत नसल्याचे इस्रायलच्या प्रतिक्रियेवरून दिसून येते. त्यामुळे आंतरराष्ट्रीय घडामोडींचे जाणकार, ब्रिटन आणि फ्रान्सला आपल्या कर्माची फळे भोगावी लागत असल्याचे बोलत आहेत.