Navratri 2026: नवरात्रीत रोज खास लूक! 9 दिवसांसाठी कोणता रंग निवडायचा? पाहा संपूर्ण यादी
गणपती बाप्पाचं विसर्जन होऊन आता देवीच्या आगमनाची तयारी सुरू झाली आहे. 2026 च्या शारदीय नवरात्रीच्या तारखा आणि नऊ दिवसांचे नऊ रंग जाणून घ्या.
गणपती बाप्पा आता निघून जाणार आहेत आणि त्यांच्यानंतर नवरात्रीमध्ये देवीचं आगमन होणार आहे. गणपती बाप्पाचं विसर्जन झाल्यावर आता सगळ्यांना वेध लागलेत ते नवरात्रीचे. नऊ दिवस देवीची पूजा, उपवास, गरबा आणि रोज नवीन रंगाचे कपडे घालायची मजा काही वेगळीच असते. यंदा म्हणजे 2026 मध्ये शारदीय नवरात्री रविवार, 11 ऑक्टोबरपासून सुरू होणार आहे आणि सोमवार, 19 ऑक्टोबरला संपणार आहे. त्यानंतर 20 ऑक्टोबरला विजयादशमी म्हणजेच दसरा साजरा होईल. अश्विन महिन्यात येणाऱ्या या नवरात्रीला शारदीय नवरात्री म्हणतात.
हा नऊ दिवसांचा उत्सव दुर्गा देवीच्या नऊ वेगवेगळ्या रूपांसाठी असतो. रोज देवीच्या एका रूपाची पूजा केली जाते. या नऊ दिवसांत लोक उपवास करतात, घट बसवतात आणि मनापासून देवीची पूजा करतात. या नऊ दिवसांत देवीची पूजा केली की शक्ती, ज्ञान आणि पैसा मिळतो अशी श्रद्धा आहे.
नवरात्रीत सगळ्यात जास्त क्रेझ असते ती नऊ रंगांची. रोज एक ठराविक रंग ठरलेला असतो आणि तो रंग घातला की देवीचा आशीर्वाद मिळतो अशी मान्यता आहे. हा फक्त फॅशनचा भाग नाहीये, तर याला आध्यात्मिक महत्त्वही आहे. प्रत्येक रंग हा देवीच्या एका गुणाचं प्रतीक मानला जातो.
पहिला दिवस, म्हणजे 11 ऑक्टोबर रविवारी घटस्थापना असते आणि त्या दिवशी नारंगी रंग आहे. हा रंग उत्साह आणि सकारात्मक ऊर्जेचं प्रतीक मानला जातो. हा रंग घातला की मनात एक वेगळाच जोश येतो असं म्हटलं जातं. दुसऱ्या दिवशी, 12 ऑक्टोबर सोमवारी पांढरा रंग आहे, जो शांतता आणि पवित्रतेचं प्रतीक आहे. पांढरे कपडे घातले की मन एकदम शांत आणि प्रसन्न वाटतं. तिसऱ्या दिवशी, 13 ऑक्टोबर मंगळवारी लाल रंग असतो, जो शक्ती आणि प्रेमाचं प्रतीक मानला जातो आणि देवीचा सगळ्यात आवडता रंगही लालच सांगितला जातो.
चौथ्या दिवशी, 14 ऑक्टोबर बुधवारी रॉयल ब्लू रंग आहे, जो श्रीमंती आणि आत्मविश्वास दाखवतो. पाचव्या दिवशी, 15 ऑक्टोबर गुरुवारी पिवळा रंग असतो, जो आनंद आणि ज्ञानाचं प्रतीक मानला जातो. या दिवशी पिवळे कपडे घातले की दिवस एकदम फ्रेश होतो असं सांगितलं जातं. सहाव्या दिवशी, 16 ऑक्टोबर शुक्रवारी हिरवा रंग आहे, जो निसर्ग आणि नवीन सुरुवातीचं प्रतीक आहे. हा रंग बघितला की मन प्रसन्न होतं.
सातव्या दिवशी, 17 ऑक्टोबर शनिवारी राखाडी रंग आहे, जो थोडा वेगळा वाटला तरी समतोल आणि शांततेचं प्रतीक मानला जातो. आठव्या दिवशी, म्हणजे दुर्गा अष्टमीला, 18 ऑक्टोबर रविवारी जांभळा रंग आहे, जो समृद्धी आणि शक्तीचं प्रतीक मानला जातो. आणि शेवटच्या म्हणजे नवव्या दिवशी, 19 ऑक्टोबर सोमवारी मोरपंखी हिरवा रंग आहे. हा रंग खूपच सुंदर दिसतो आणि यानं नवरात्रीची सांगता खास होते.
अशी ही यंदाच्या नवरात्रीच्या नऊ रंगांची संपूर्ण यादी आहे. ही यादी आत्तापासूनच लक्षात ठेवून नवरात्रीसाठीच्या कपड्यांची तयारी सुरू करता येईल.
