नैनीतालमध्ये पावसानंतर थंडी वाढली, पर्यटकांची लोकरीच्या कपड्यांसाठी बाजारात गर्दी
सरोवर नगरी नैनीतालमध्ये तीन दिवसांपासून सुरू असलेल्या मुसळधार पावसाने थंडी वाढवली असून, गरम कपडे नसलेल्या पर्यटकांना बाजारात धाव घ्यावी लागतेय.
सरोवर नगरी म्हणून ओळखल्या जाणाऱ्या नैनीतालचं हवामान गेल्या काही दिवसांत एकदम बदललंय. सतत कोसळणाऱ्या पावसानं इथलं वातावरण पार पालटून टाकलंय. मागच्या तीन दिवसांपासून इथं मुसळधार पाऊस पडतोय आणि त्यामुळं कडाक्याची थंडी पडून पारा चांगलाच घसरलाय.
पावसानं अचानक वाढलेल्या या थंडीमुळं इथं आलेल्या पर्यटकांची मात्र पंचाईत झालीय. गरम कपडे शोधण्यासाठी त्यांना हॉटेलबाहेर पडून बाजारात फिरावं लागतंय. स्थानिक लोकांसोबतच पर्यटकांनीही नैनीतालच्या मुख्य बाजारपेठेत लोकरीचे कपडे घेण्यासाठी एकच गर्दी केलीय.
नैनीतालच्या बाजारात सध्या जॅकेट, स्वेटर आणि अंगाला ऊब देणारे इतर लोकरीचे कपडे खरेदी करताना पर्यटक सर्रास दिसतायत. दुकानदारांच्या म्हणण्यानुसार, हवामानात एकदम झालेल्या या बदलामुळं लोकरीच्या कपड्यांच्या मागणीत मोठी वाढ झालीय. महत्त्वाचं म्हणजे इथं पाऊस पडल्यानंतर थंड वारे वाहायला लागतात, त्यामुळं घरात किंवा रस्त्यावर साध्या कपड्यांत वावरणं लोकांना कठीण होऊन बसलंय.
दिल्लीहून फिरायला आलेली गरिमा सांगते की, ती इथं आली तेव्हा सुरुवातीला वातावरण एकदम छान होतं. पण मागच्या तीन दिवसांपासून सतत पाऊस पडतोय आणि थंडीही वाढलीय. येताना थंडीचे कपडे सोबत आणले नव्हते, त्यामुळं आता बाजारात जाऊन जॅकेट आणि इतर लोकरीचे कपडे विकत घ्यावे लागत असल्याचं ती म्हणाली.
मध्य प्रदेशातून आलेला पर्यटक अवनीशनंही असाच अनुभव सांगितला. नैनीतालमध्ये सध्या गार वारे वाहतायत, पावसानंतर थंडी अचानक वाढली. असं काही घडेल याची कल्पनाच नव्हती, त्यामुळं आता लोकरीचे कपडे विकत घेण्यासाठी बाजार गाठावा लागत असल्याचं तो म्हणाला.
भोटिया मार्केटमधील कपड्याचे दुकानदार दिनेश भोटिया यांच्या मते, नैनीतालमध्ये आधीच थंडीला सुरुवात झाली होती. त्यात मागच्या तीन दिवसांतल्या पावसानं तापमानाचा पारा आणखी खाली आणला. त्यामुळं स्थानिक आणि पर्यटक दोघंही आता साध्या जॅकेटऐवजी जाड स्वेटर, जॅकेट आणि इतर उबदार कपड्यांची मागणी करतायत, आणि यातून व्यापाऱ्यांना चांगला नफाही मिळतोय.
पुढच्या काळात नैनीताल फिरण्याचा बेत असेल, तर इथल्या वातावरणाबाबत अपडेट राहण्याचं आवाहान हवामान विभागानं पर्यटकांना केलंय. सतत पडणारा पाऊस आणि वाढती थंडी पाहता, पर्यटकांनी पावसाच्या जॅकेटसोबतच थंडीचं जॅकेटही सोबत बाळगावं असं सांगण्यात आलंय.
डोंगराळ भागात पावसादरम्यान तापमान झपाट्यानं खाली येतं. निसर्गरम्य नैनीतालमध्येही सध्या तीच परिस्थिती दिसतेय. त्यामुळं ऑक्टोबरमधल्या उकाड्याला कंटाळलेले नागरिक नैनीताल फिरण्याची योजना नक्कीच आखू शकतात.
