महामेट्रोत नागपूर आणि पुण्यासाठी ५६ पदांची भरती, अर्जाची अंतिम तारीख २५ सप्टेंबर

सरकारी नोकरीच्या शोधात असलेल्या आणि सार्वजनिक वाहतूक क्षेत्रात करिअर करू इच्छिणाऱ्या तरुणांसाठी एक मोठी संधी समोर आली आहे. महाराष्ट्र मेट्रो रेल कॉर्पोरेशन लिमिटेड म्हणजेच महामेट्रोने नागपूर आणि पुणे मेट्रो प्रकल्पांसाठी ५६ रिक्त पदांची अधिकृत भरती जाहीर केली आहे. या भरतीसाठी अर्ज करण्याची शेवटची तारीख २५ सप्टेंबर २०२६ अशी निश्चित करण्यात आली आहे.

या भरतीत दहावी आणि बारावी उत्तीर्ण उमेदवारांपासून ते पदवीधर आणि डिप्लोमाधारकांपर्यंत सर्वांनाच अर्ज करता येणार आहे. त्यामुळे राज्यातील नोकरीइच्छुक तरुणांमध्ये या जाहिरातीमुळे मोठा उत्साह दिसून येत आहे.

महामेट्रोने काढलेल्या या भरतीत तांत्रिक आणि बिगर-तांत्रिक अशा दोन्ही प्रकारच्या पदांचा समावेश आहे. कनिष्ठ अभियंता या पदासाठी स्थापत्य, विद्युत, रोलिंग स्टॉक आणि S&T या विभागांमध्ये जागा आहेत. याशिवाय तंत्रज्ञ या पदासाठी विद्युत, स्थापत्य आणि डिझेल मेकॅनिक अशा शाखांमध्ये भरती होणार आहे. वरिष्ठ कार्यालय सहाय्यक, कार्यालय सहाय्यक, मल्टी-टास्किंग स्टाफ कम मोटर चालक आणि परिचर म्हणजेच अटेंडंट अशा पदांचाही यात समावेश आहे.

अटेंडंट पदासाठी किमान बारावी उत्तीर्ण असणे आवश्यक आहे, तर मल्टी टास्किंग स्टाफ पदासाठी किमान दहावी उत्तीर्ण ही पात्रता ठेवण्यात आली आहे. इतर तांत्रिक आणि प्रशासकीय पदांसाठी संबंधित विषयातील आयटीआय, डिप्लोमा किंवा पदवी असणे गरजेचे आहे. या सगळ्या पदांसाठी महामेट्रोच्या नियमांनुसार वेतनश्रेणी आणि मानधन दिले जाणार आहे.

या भरतीसाठी उमेदवारांची कमाल वयोमर्यादा पदाच्या स्वरूपानुसार ४० ते ४५ वर्षांपर्यंत ठेवण्यात आली आहे. शासकीय नियमांनुसार राखीव प्रवर्गातील उमेदवारांना वयोमर्यादेत नियमानुसार सूट मिळणार आहे. अर्जांची छाननी, प्रत्यक्ष मुलाखत आणि वैद्यकीय तपासणी या टप्प्यांतून उमेदवारांची निवड केली जाणार आहे. निवड झालेल्या उमेदवारांना नागपूर आणि पुणे मेट्रोच्या विविध विभागांत काम करण्याची संधी मिळणार आहे.

इच्छुक आणि पात्र उमेदवारांना ऑफलाईन पद्धतीने अर्ज पाठवावा लागणार आहे. महामेट्रोच्या अधिकृत वेबसाईटवरून (www.mahametro.org) अर्जाचा नमुना डाऊनलोड करून तो भरून, आवश्यक कागदपत्रांच्या छायांकित प्रतींसह दिलेल्या पत्त्यावर पाठवायचा आहे. अर्ज पाठवण्याचा पत्ता आहे - महाव्यवस्थापक (एचआर/भरती) मेट्रो भवन, रिक्रूटमेंट सेल, ४ था मजला, डॉ. बाबासाहेब आंबेडकर कॉलेज समोर, दीक्षाभूमीजवळ, नागपूर - ४४० ०१०. अर्ज पोहोचण्याची शेवटची तारीख २५ सप्टेंबर २०२६ असल्याने पात्र उमेदवारांनी अंतिम तारखेची वाट न पाहता लवकरात लवकर अर्ज स्पीड पोस्टाने पाठवावेत, असे आवाहन प्रशासनाकडून करण्यात आले आहे.