नागपूरच्या सुरक्षेसाठी पोलीस आयुक्त नांगरे पाटील यांचा नवा आराखडा; गंभीर गुन्हे, अमली पदार्थ आणि वाहतुकीवर भर

नागपूरचे पोलीस आयुक्त विश्वास नांगरे पाटील यांनी गुरुवारी प्रेस क्लब येथे आयोजित 'मीट द प्रेस' कार्यक्रमात पत्रकारांशी संवाद साधला. या संवादात त्यांनी शहरातील कायदा व सुव्यवस्था, वाढती गुन्हेगारी, अमली पदार्थांची तस्करी, महिला सुरक्षा, वाहतूक व्यवस्था आणि पोलीस दलाचे मनुष्यबळ या विषयांवर आपली भूमिका स्पष्ट केली.

नांगरे पाटील वयाच्या अवघ्या २४व्या वर्षी आयपीएस अधिकारी झाले. त्यांनी आपल्या कारकिर्दीची सुरुवात छत्रपती संभाजीनगर येथून केली. सुमारे ३० वर्षांच्या अनुभवाच्या जोरावर नागपूरमधील कायदा व सुव्यवस्था अधिक प्रभावी करण्यासाठी नियोजनबद्ध पद्धतीने काम केले जाणार आहे, असे त्यांनी सांगितले.

तरुणांमध्ये अमली पदार्थांच्या सेवनाचे प्रमाण वाढत आहे, ही चिंतेची बाब असल्याचे त्यांनी नमूद केले. अमली पदार्थांच्या मोठ्या तस्करीमागचे सूत्रधार आणि पेडलर्स यांच्यावर कठोर कारवाई करणे गरजेचे आहे, असेही ते म्हणाले. मात्र गुन्हेगारीवर नियंत्रण ठेवण्यासाठी फक्त कारवाई पुरेशी नाही, असे त्यांनी सांगितले. गुन्हेगारांचे समुपदेशन आणि समाजात जनजागृती करणेही तितकेच महत्त्वाचे आहे, असे त्यांचे म्हणणे होते.

महिलांमध्ये सुरक्षेबाबत जागरूकता वाढवण्यावर तसेच त्यांच्या तक्रारींना तातडीने प्रतिसाद देण्यावर भर दिला जाणार आहे. त्यासाठी नागपूरमध्ये १२ निर्भया पथके तयार करण्यात आली आहेत, तर २४ तास बीट मार्शल तैनात करण्यात आले आहेत.

नागपूर शहराची लोकसंख्या आणि वाढत्या गरजा लक्षात घेता उपलब्ध पोलीस मनुष्यबळाचे योग्य नियोजन करणे आवश्यक आहे, असे ते म्हणाले. शहरात सुमारे ९,५०० पोलीस कर्मचारी आहेत, असा उल्लेख करून त्यांनी पोलीस ठाण्यांमधील मनुष्यबळ, पायाभूत सुविधा आणि भरती यांचा समतोल राखण्याची गरज अधोरेखित केली.

शहरातील खून आणि खुनाच्या प्रयत्नांसारख्या गंभीर गुन्ह्यांचे प्रमाण चिंताजनक आहे, असेही त्यांनी नमूद केले. वाहतूक सुरळीत ठेवणे, पार्किंगची समस्या सोडवणे आणि फेरीवाला धोरणाची प्रभावी अंमलबजावणी करणे यावरही भर दिला जाणार आहे.

आंदोलनाबाबत बोलताना त्यांनी सांगितले की, लोकशाहीत आंदोलन करण्याचा प्रत्येकाला अधिकार आहे. पण आंदोलनाच्या नावाखाली कायदा हातात घेणे चुकीचे आहे. पोलिसांकडून नियमानुसार आंदोलनासाठी परवानगी दिली जाते, असे त्यांनी स्पष्ट केले.

आगामी दसरा, धम्मचक्र प्रवर्तन दिन आणि नवरात्रोत्सव लक्षात घेऊन बंदोबस्ताचे नियोजन करण्यात आले आहे. शहरातील शांतता आणि सुरक्षितता राखण्यासाठी प्रत्येक बाबीवर लक्ष केंद्रित केले जात आहे, असे पोलीस आयुक्तांनी सांगितले.