नागपुरात स्टँड-अप कॉमेडीला गर्दी, वीकेंडचे शो हाउसफुल
कामाच्या ताणातून सुटका शोधणारे नागपूरकर लाइव कॉमेडी शोकडे वळत आहेत, कॅफे आणि क्लबमध्ये गर्दी वाढली आहे.
ऑरेंज सिटीत सध्या हास्याचे फवारे जरा जास्तच ऐकू येत आहेत. कामाच्या तणावापासून दूर राहून निवांत आणि मनोरंजनाचे क्षण शोधणारे नागपूरकर आता लाइव परफॉर्मन्सकडे झपाट्याने वळत आहेत. त्यामुळे शहरात स्टँड-अप कॉमेडीची लोकप्रियता सतत वाढते आहे. हाउसफुल शो, नवी वेन्यू आणि नामांकित कलाकारांचे व्यस्त कार्यक्रम यांमुळे नागपूरचा कॉमेडी सीन सध्या चांगलाच रंगला आहे.
वीकेंडला फिरायला जायचे असो किंवा कामाच्या आठवड्यानंतरची एखादी छान संध्याकाळ असो, स्टँड-अप कॉमेडी नागपूरमधील तरुणांसाठी आणि कुटुंबांसाठी स्ट्रेस बस्टर ठरत आहे. गेल्या काही वर्षांत या कलेने शहरात आपली मुळे घट्ट रोवली आहेत.
आता फक्त मोठे कलाकारच नाहीत, तर नवे उदयाला येत असलेले स्टँड-अप कॉमेडियनही शहरातील कॅफे, पब आणि कल्चरल सेंटरमध्ये प्रेक्षकांची मोठी गर्दी जमवत आहेत. या लोकप्रियतेचे सर्वात मोठे कारण म्हणजे त्यातला साधेपणा आणि सामान्य आयुष्याशी असलेले नाते. ऑफिसमधले किस्से, घरातली कुरबुर, सोशल मीडियाच्या सवयी आणि रोजच्या धडपडीतले प्रसंग अशा गोष्टींशी प्रत्येक प्रेक्षक स्वतःला जोडून घेतो.
कंटेंट रायटर अदिती हेडाऊ सांगतात, 'गेल्या वर्षी मी मित्रमैत्रिणींसोबत स्टँड-अप कॉमेडी शो पाहायला सुरुवात केली आणि आता हा आमचा आवडता वीकेंड प्लान झाला आहे. अनोळखी लोकांनी भरलेल्या खोलीत मनमोकळे हसायला आणि काही तास कामाच्या तणावापासून दूर राहायला एक वेगळाच ताजेपणा मिळतो.'
सॉफ्टवेअर प्रोफेशनल हदेश पारशिवनीकर यांचा अनुभवही असाच आहे. ते म्हणतात, 'मला आधी वाटायचे की स्टँड-अप कॉमेडी फक्त ऑनलाइनच चांगली वाटते, पण प्रत्यक्ष शोचा भाग होणे हा पूर्णपणे वेगळा अनुभव आहे. लाइव शो खूप इंटरॅक्टिव आणि लक्षात राहणारे असतात.'
या महिन्यात शहरात देशातील नामांकित कलाकारांचे अनेक उत्तम स्टँड-अप कॉमेडी शो होणार आहेत. नागपूरकरांसाठी ही एक मेजवानीच ठरणार आहे.
10 ऑक्टोबर रोजी गीतकार, लेखक आणि स्टँड-अप कॉमेडियन वरुण ग्रोव्हर आपल्या नव्या सोलो टूर 'लव, डेथ एंड केचप' अंतर्गत डार्क ह्यूमर, वैयक्तिक गोष्टी आणि रोजच्या चिंतांवर गमतीशीर टोले सादर करतील.
25 ऑक्टोबर रोजी 'इंडियाज गॉट लेटेंट' फेम शेरोन वर्मा रोजच्या अनुभवांवर आणि भारतीय कुटुंबांच्या वातावरणावर आधारित सोलो स्टँड-अप अॅक्ट घेऊन मंचावर येतील.
मोठ्या कलाकारांशिवाय नागपूरच्या स्थानिक कलाकारांसाठीही शहरात मंचांची कमतरता नाही. द कॉमेडी रेमेडी क्लब हा शहरातील स्टँड-अप सीनचे मुख्य केंद्र झाला आहे. तिथे 'द सैटरडे लाइनअप', फ्रेश ह्यूमर आवर आणि शुभम पुजारी यांच्यासारख्या कलाकारांचे सोलो शो नियमितपणे होतात. यातच 9 ऑक्टोबर रोजी 'रॉक बॉटम' हा शोही आहे.
कॅफेमध्येही अशा कार्यक्रमांची रेलचेल आहे. 'रूह एंड रोस्ट कॉफी हाउस' आणि 'द राइज एंड ग्राइंड' या लोकप्रिय कॅफेमध्ये 'परिवार पे वार' सारख्या खास स्टँड-अप इव्हेंटमुळे शहरातल्या संध्याकाळी रंगत आहेत.
स्वाती पाल
