नागपुरात जुगार अड्ड्यावर गुन्हे शाखेचा छापा; आठ जण ताब्यात

नागपूर शहरात जुगाराच्या अड्ड्यांविरोधात पोलिसांनी कारवाई केली आहे. गुन्हे शाखा आणि यशोधरानगर पोलिसांच्या संयुक्त पथकाने भिलगाव येथील ऋतुराज टाउन परिसरात छापा टाकला. दुर्गा मंडपाच्या मागे जुगार सुरू होता. या कारवाईत आठ जणांना ताब्यात घेण्यात आले. पोलिसांनी त्यांच्याकडून रोख रकमेसह सात मोबाईल आणि पत्त्यांची पाने असा एकूण ८७ हजार ४८० रुपयांचा मुद्देमाल जप्त केला.

रात्रीच्या गस्तीदरम्यान पोलिसांना गोपनीय माहिती मिळाली होती. त्या माहितीच्या आधारे पोलिसांनी ही कारवाई केली. या कारवाईत यशोधरानगर पोलीस ठाण्याचे पथक, गुन्हे शाखेचे युनिट क्रमांक ३ आणि ५ तसेच वाहनचोरी विरोधी पथकातील अधिकारी आणि कर्मचारी सहभागी झाले होते.

ताब्यात घेण्यात आलेल्यांमध्ये विनीज विनोद मेहरुनिया, शाहरुख अंसारी अब्दुल जब्बार अंसारी, अस्मित रितेश चरोटे, राहुल अशोक धामती, कुणाल ऊर्फ गोलू अशोक धामती, अश्विन तुलाराम गवरे, अरुण राम कुशवाह आणि प्रतीक संतोष सोनवणे यांचा समावेश आहे.

पोलिसांनी घटनास्थळावरून २६ हजार ८८० रुपये रोख, ६० हजार ६०० रुपये किमतीचे सात मोबाईल फोन आणि ५२ पत्त्यांची पाने जप्त केली. जुगार खेळल्याच्या आरोपावरून या आठही जणांविरुद्ध महाराष्ट्र जुगार प्रतिबंधक कायद्यानुसार कारवाई करण्यात आली. पुढील कायदेशीर प्रक्रियेसाठी त्यांना यशोधरानगर पोलीस ठाण्याच्या ताब्यात देण्यात आले.