नागपूरच्या डॉ. श्रुती सवालाखे 'मिसेस युनायटेड नेशन्स २०२६' स्पर्धेच्या विजेत्या

नागपूरच्या डॉ. श्रुती नीरज सवालाखे यांनी आंतरराष्ट्रीय स्तरावर मोठे यश मिळवले आहे. नवी दिल्लीतील क्राउन प्लाझा येथे झालेल्या 'मिसेस युनायटेड नेशन्स २०२६' स्पर्धेत त्यांनी विजेतेपद पटकावले. त्याचबरोबर 'मिसेस युनायटेड नेशन्स अर्थ' हा किताबही त्यांच्या नावावर जमा झाला. वैद्यकीय क्षेत्रातील जबाबदाऱ्या, कुटुंबाची साथ आणि स्वतःची स्वप्ने यांचा समतोल साधत त्यांनी हे यश मिळवले, त्यामुळे नागपूरच्या शिरपेचात मानाचा तुरा रोवला गेला आहे.

डॉ. श्रुती या डॉ. रवी चरडे यांच्या कन्या आहेत. त्या दंत शल्यचिकित्सक आणि कॉस्मेटोलॉजिस्ट म्हणून काम करतात. कॉस्मेटोलॉजीमधील दोन फेलोशिप त्यांनी पूर्ण केल्या असून हॉस्पिटल मॅनेजमेंटमध्ये एमबीएची पदवीही घेतली आहे. सध्या नागपुरातील जय इन्स्टिट्यूट आणि भानुकृपा हॉस्पिटल येथे त्या संचालक म्हणून जबाबदारी सांभाळतात. याआधी 'मिसेस इंडिया' स्पर्धेत यश मिळवल्यानंतर आता आंतरराष्ट्रीय व्यासपीठावरही त्यांनी आपला ठसा उमटवला आहे.

स्पर्धेदरम्यान एका परदेशी स्पर्धकाची तब्येत बिघडल्याचे लक्षात आल्यावर डॉ. श्रुती यांनी डॉक्टर म्हणून तिला मदत केल्याचे सांगण्यात आले. गरजेच्या वेळी मदतीचा हात पुढे करण्याची भावना आणि वैद्यकीय सेवेचे महत्त्व यातून दिसून आले. त्यांच्या मते यश म्हणजे फक्त पुरस्कार किंवा मुकुट मिळवणे नाही, तर आपले ज्ञान आणि अनुभव इतरांच्या मदतीसाठी वापरणे. मुकुट व्यक्तिमत्त्वाला शोभा देतो, पण माणुसकी लोकांच्या मनात आदर निर्माण करते, असा संदेश त्यांच्या कृतीतून समोर आला.

भारताचे प्रतिनिधित्व करणे हा अभिमानाचा अनुभव होता, असे डॉ. श्रुती यांनी सांगितले. त्यांच्या सादरीकरणात 'ऑपरेशन सिंदूर' आणि भारतीय तिरंग्यापासून प्रेरणा घेतलेल्या देशभक्तिपर संकल्पनेला विशेष स्थान होते. त्यातून साहस, देशप्रेम आणि भारतीय अस्मितेचा संदेश देण्याचा प्रयत्न त्यांनी केला.

त्यांचे पती डॉ. नीरज सवालाखे हे प्रसिद्ध गॅस्ट्रोएन्टेरोलॉजिस्ट आहेत, तर मुलगा जय सवालाखे राष्ट्रीय आणि आंतरराष्ट्रीय स्तरावर बुद्धिबळ खेळतो. कुटुंबाचा पाठिंबा, शिस्त आणि योग्य नियोजन असेल, तर महिला व्यावसायिक जबाबदाऱ्या सांभाळून स्वतःची स्वप्नेही पूर्ण करू शकतात, असा त्यांचा विश्वास आहे.

महिलांनी कुटुंब आणि करिअर यांच्यासोबत स्वतःच्या आकांक्षांनाही महत्त्व द्यावे, असे त्या सांगतात. वय, परिस्थिती किंवा कौटुंबिक जबाबदाऱ्या म्हणजे आपल्या क्षमतेची मर्यादा, असे समजू नये. आत्मविश्वास आणि जिद्द असेल, तर प्रत्येक महिला स्वतःची वेगळी ओळख निर्माण करू शकते, असा त्यांचा संदेश आहे.

या यशानंतर वैद्यकीय कौशल्य, नेतृत्वक्षमता आणि स्वतःच्या अनुभवांतून महिलांमध्ये आरोग्यविषयक जागरूकता, आत्मविश्वास आणि व्यक्तिमत्त्व विकासाला प्रोत्साहन द्यायची डॉ. श्रुती यांची इच्छा आहे. महिला सक्षमीकरणासह समाजात चांगला बदल घडवणाऱ्या उपक्रमांमध्ये योगदान देण्याचाही त्यांचा मानस आहे.

प्रत्येक स्त्रीने आपल्या स्वप्नांसाठी खंबीरपणे उभे राहावे, स्वतःच्या क्षमतेवर विश्वास ठेवावा आणि परिस्थितीपुढे हार मानू नये, हा त्यांच्या यशाचा महत्त्वाचा संदेश आहे. एखादी महिला स्वप्ने पूर्ण करण्यासाठी पुढे येते, तेव्हा ती फक्त स्वतःचे आयुष्य बदलत नाही, तर पुढच्या पिढीलाही प्रेरणा देते. डॉ. श्रुती सवालाखे यांच्यासाठी हा मुकुट केवळ सन्मानाचे प्रतीक नाही, तर महिलांना प्रेरणा देण्याची आणि समाजासाठी अर्थपूर्ण योगदान देण्याची जबाबदारीही आहे.