जामठा परिसरात ट्रेलरच्या धडकेत दुचाकीवरील पती-पत्नी आणि चार वर्षांच्या मुलाचा मृत्यू, सहा वर्षांचा मुलगा गंभीर

नागपूर : कामावरून कुटुंबासह दुचाकीवरून घरी परतणाऱ्या एका दाम्पत्यावर वाटेतच काळाने घाला घातला. नागपूरच्या वर्धा मार्गावरील जामठा परिसरात गौसी-मानापूरजवळ भरधाव ट्रेलरने त्यांच्या दुचाकीला पाठीमागून जोरदार धडक दिली. या भीषण अपघातात पती-पत्नी आणि त्यांचा चार वर्षांचा मुलगा यांचा मृत्यू झाला, तर सहा वर्षांचा दुसरा मुलगा गंभीर जखमी झाला आहे.

दुचाकीवर एकूण चौघेजण होते. त्यापैकी तिघांचा या अपघातात जीव गेला असून, एक मुलगा गंभीर जखमी अवस्थेत उपचार घेत आहे. त्याच्यावर नागपूर येथील एम्स रुग्णालयात उपचार सुरू असून, त्याची प्रकृती चिंताजनक असल्याची माहिती आहे.

मिळालेल्या माहितीनुसार, योगेश नाईक हे पत्नी सुनीता नाईक आणि दोन मुलांसह दुचाकीवरून जात होते. जामठा परिसरात गौसी-मानापूरजवळ पाठीमागून भरधाव वेगाने आलेल्या ट्रेलरने त्यांच्या दुचाकीला जोरदार धडक दिली. धडकेचा जोर एवढा होता की, दुचाकीवरील चौघेही रस्त्यावर फेकले गेले.

या अपघातात योगेश नाईक, त्यांची पत्नी सुनीता नाईक आणि चार वर्षांचा मुलगा गुलशन नाईक यांना गंभीर दुखापत झाली. दुखापतींची तीव्रता अधिक असल्यामुळे या तिघांचाही जागीच मृत्यू झाला.

सहा वर्षांचा तन्मय नाईक या दुर्घटनेत गंभीर जखमी झाला. अपघातानंतर त्याला तातडीने नागपूर येथील एम्स रुग्णालयात दाखल करण्यात आले. तिथे त्याच्यावर उपचार सुरू आहेत आणि त्याची प्रकृती चिंताजनक असल्याचे सांगण्यात येत आहे.

योगेश नाईक हे मूळचे मध्य प्रदेशातील बालाघाट येथील रहिवासी होते. कामानिमित्त ते नागपुरात आले होते आणि बुटीबोरी एमआयडीसी परिसरात कुटुंबासह राहत होते. कामावरून घरी परतत असतानाच हा भीषण अपघात झाला आणि संपूर्ण कुटुंबावर घाला पडला.

अपघाताची माहिती मिळताच स्थानिक नागरिकांनी घटनास्थळी धाव घेतली. पोलीसही तातडीने तिथे पोहोचले आणि त्यांनी पंचनामा केला. मात्र, अपघातानंतर ट्रेलरचा चालक वाहन घटनास्थळीच सोडून पसार झाला.

पोलीस फरार चालकाचा शोध घेत आहेत आणि या प्रकरणाचा पुढील तपास केला जात आहे. या भीषण दुर्घटनेमुळे नाईक कुटुंबावर दुःखाचा डोंगर कोसळला असून, परिसरात हळहळ व्यक्त होत आहे.