ICICI बँकेच्या 23 कोटींच्या गोल्ड लोन फसवणुकीत नागपुरात एकाला अटक

नागपूर पोलिसांच्या आर्थिक गुन्हे शाखेच्या (ईओडब्ल्यू) पथकाने ICICI बँकेच्या गोल्ड लोन प्रकरणातील एका आरोपीला अटक केली आहे. प्रफुल अशोक चौधरी (39) असे त्याचे नाव असून तो तेलंगखेडी, रामनगर येथील रहिवासी असल्याचे सांगण्यात आले. बँकेच्या गोल्ड लोन प्रक्रियेत गडबड करून बनावट कर्जदारांच्या नावावर कोट्यवधी रुपयांची कर्जे मंजूर करून घेतल्याचा आणि बनावट सोन्याचे दागिने खरे असल्याचे दाखवून बँकेची 23.19 कोटी रुपयांची फसवणूक केल्याचा आरोप एका टोळीवर आहे. चौधरी त्या टोळीतील एक सदस्य असल्याचे सांगितले जाते.

या प्रकरणी धंतोली पोलीस स्टेशनमध्ये 30 मार्च 2026 रोजी गुन्हा दाखल करण्यात आला होता. त्याआधी बँकेच्या ऑडिटदरम्यान एका खात्यात तारण ठेवलेल्या सोन्याच्या दागिन्यांच्या शुद्धतेबद्दल ऑडिटरला शंका आली होती. तिथूनच या प्रकरणाची तपासणी सुरू झाली.

प्रकरण गंभीर वाटल्याने बँकेच्या वेगवेगळ्या शाखांमधील गोल्ड लोन खात्यांचेही ऑडिट करण्यात आले. या तपासात मनीषनगर, मेडिकल चौक, नरसाळा, काटोल रोड, अजनी चौक, छत्रपती चौक, वर्धा रोड, प्रतापनगर आणि नंदनवन या शाखांतील गोल्ड लोन खात्यांची पाहणी झाली.

पोलिसांनी प्रत्येक खात्याबाबत काही गोष्टी शोधून काढल्या. कर्ज कोणाच्या नावावर मंजूर झाले, तारण म्हणून काय दाखवले गेले, कर्जाची रक्कम कोणत्या खात्यात गेली आणि नंतर ती रक्कम कोणकोणत्या खात्यांत वळवण्यात आली, याचा तपशील त्यांनी तपासला. अशा प्रकारे कर्जाच्या रकमेच्या संपूर्ण मनी ट्रेलचा पोलिसांनी बारकाईने मागोवा घेतला.

आरोपींच्या ठिकाणांवर झडती घेतली असता मोबाईल फोन, लॅपटॉप आणि वाहने जप्त करण्यात आली. त्याचबरोबर बँकेच्या व्यवहारांशी संबंधित महत्त्वाची कागदपत्रेही पोलिसांनी जप्त केली. तपास पथकाला बनावट गोल्ड लोन ग्राहकांची यादीही मिळाली. या यादीने संपूर्ण नेटवर्कचे धागेदोरे जोडण्यात महत्त्वाची भूमिका बजावली.

या प्रकरणातील इतर आरोपींना यापूर्वीच अटक करण्यात आली आहे, मात्र प्रफुल चौधरी फरार होता. बुधवारी पोलिसांनी त्याला अटक केली. त्यानंतर न्यायालयाने त्याला 30 ऑक्टोबरपर्यंत पोलीस कोठडीत ठेवण्याचे आदेश दिले आहेत.