मुंबई महापौर चषक बुद्धिबळ स्पर्धेत अर्जुन कुलकर्णी आणि अहान काटरुका गटविजेते

आयडियल स्पोर्ट्स अकॅडमी व आनंदराव अडसूळ चॅरिटेबल ट्रस्ट यांच्यातर्फे लाईफ इन्शुरन्स कॉर्पोरेशन ऑफ इंडिया पुरस्कृत एलआयसी-मुंबई महापौर चषक शालेय बुद्धिबळ स्पर्धेला सुरुवात झाली आहे. या स्पर्धेत ७ वर्षाखालील गटात अर्जुन कुलकर्णीने ५ गुण मिळवून गटविजेतेपद पटकावले. तर ११ वर्षाखालील गटात अहान काटरुकाने ४.५ गुणांसह पहिला क्रमांक मिळवला.

मुंबई शहर जिल्हा बुध्दिबळ संघटना, सिबीइयुएम व आरएमएमएस यांच्या सहकार्याने ही स्पर्धा सुरू झाली आहे. ११ वर्षाखालील गटात पहिल्या पटावर सुरुवातीला जोरदार झुंज झाली. फिडे गुणांकित अहान काटरुकाने आक्रमक चाली खेळल्या, पण कैवल्य परबने त्यांना तोडीस तोड उत्तर दिले. शेवटी या बलाढ्य प्रतिस्पर्ध्याला बरोबरीवर समाधान मानावे लागले.

या गटातील क्रमवारी अशी: अहान काटरुका (४.५ गुण) पहिला, कैवल्य परब (४ गुण) दुसरा, मृण्मयी डावरे (४ गुण) तिसरी, सुजय सावंत (३.५ गुण) चौथा आणि आरव कदम (३.५ गुण) पाचवा क्रमांक मिळवला.

७ वर्षाखालील गटात अर्जुन कुलकर्णी निर्णायक अशा पाचव्या फेरीत अपराजित राहिला. त्याने राजवीर विचारेच्या राजाला २१ व्या चालीला शह देऊन गटविजेतेपद मिळवले. या गटात आरोह चुघ (४ गुण) दुसरा, अहान भट्ट (४ गुण) तिसरा, सात्विक पांडे (४ गुण) चौथा आणि राजवीर विचारे (३.५ गुण) पाचवा आला.

माजी आमदार कॅप्टन अभिजीत अडसूळ यांच्या हस्ते विजेत्या खेळाडू अर्जुनला आकर्षक चषक आणि भेटवस्तू देऊन गौरवण्यात आले. यावेळी क्रीडापटू प्रमोद पार्टे, अशोक नवले, प्रशिक्षक राजाबाबू गजेंगी आणि शिवछत्रपती पुरस्कार विजेते लीलाधर चव्हाण आदी जण उपस्थित होते.

या स्पर्धेमुळे शहरातील बुद्धिबळपटूंना आपले कौशल्य दाखवण्याची महत्त्वाची संधी मिळाली आहे. बुद्धिबळाच्या पटावर डावपेच, एकाग्रता आणि निर्णयक्षमता यांची कसोटी लागते. अशा या स्पर्धेत लहान वयोगटातील खेळाडूंनी जिल्हा स्तरावर उत्कृष्ट कामगिरी केली. अशा स्पर्धांमुळे विद्यार्थ्यांमध्ये क्रीडाभावना आणि आत्मविश्वास वाढण्यास मदत होते.