मूल आणि भिवकुंड येथील शासकीय वसतिगृहांसाठी जमिनीची मागणी; मुनगंटीवार यांचे जिल्हाधिकाऱ्यांना पत्र

चंद्रपूर: आमदार सुधीर मुनगंटीवार यांनी चंद्रपूरच्या जिल्हाधिकारी वसुमना पंत यांना पत्र लिहून दोन शासकीय वसतिगृहांसाठी जमीन तातडीने उपलब्ध करून देण्याची मागणी केली आहे. मूल आणि भिवकुंड या दोन ठिकाणी ही वसतिगृहे प्रस्तावित आहेत.

पत्रानुसार, मूल येथे १०० विद्यार्थिनींसाठी वसतिगृह प्रस्तावित आहे. बल्लारपूर तालुक्यातील भिवकुंड येथे २०० विद्यार्थ्यांसाठी वसतिगृह प्रस्तावित आहे. मूलच्या वसतिगृहासाठी ३.२१ एकर, तर भिवकुंडच्या वसतिगृहासाठी ०.११ एकर शासकीय जमीन हस्तांतरित करावी, असे मुनगंटीवार यांनी पत्रात म्हटले आहे.

आर्थिकदृष्ट्या दुर्बल आणि मागासवर्गीय कुटुंबांतील विद्यार्थ्यांना राहण्याची आणि जेवणाची सोय मिळावी, हा या मागणीमागचा उद्देश पत्रात नमूद केला आहे. राज्याचे माजी अर्थमंत्री असलेल्या मुनगंटीवार यांनी घरापासून दूर राहून शिकणाऱ्या अशा विद्यार्थ्यांच्या निवासाची, जेवणाची आणि अभ्यासाची चिंता दूर करण्यासाठी हे पाऊल उचलले आहे.

शिक्षणाच्या वाटेवर चालणाऱ्या प्रत्येक विद्यार्थ्याच्या डोळ्यांत उज्ज्वल भविष्याची स्वप्ने असतात. परिस्थितीच्या मर्यादांमुळे किंवा राहायला जागा नसल्यामुळे कोणत्याही गुणवंत विद्यार्थ्याच्या शिक्षणात अडथळा येऊ नये, अशी संवेदनशील भूमिका घेऊन आमदार मुनगंटीवार यांनी या प्रश्नाला प्राधान्य दिले आहे.

घराबाहेर पडून शिकणाऱ्या विद्यार्थ्यांना राहण्याची, जेवणाची आणि शांत वातावरणात अभ्यास करण्याची सोय मिळाली, तर त्यांच्या शैक्षणिक वाटचालीतील मोठे संकट दूर होते. प्रस्तावित वसतिगृहांमुळे गरजू विद्यार्थ्यांना आवश्यक सुविधा तर मिळतीलच. शिवाय आपल्या पाल्यांच्या सुरक्षित निवासाची आणि जेवणाची काळजी करणाऱ्या पालकांनाही मोठा दिलासा मिळणार आहे.

विद्यार्थ्यांच्या शिक्षणाला आर्थिक किंवा सामाजिक परिस्थितीचा अडसर ठरू नये, यासाठी जिल्हा प्रशासनाने या मागणीची गांभीर्याने दखल घ्यावी आणि जमीन उपलब्ध करून देण्याची प्रक्रिया तातडीने पूर्ण करावी, अशी अपेक्षा आता व्यक्त केली जात आहे. मुनगंटीवार यांनी पत्रात ही मागणी आग्रहाने मांडली आहे.