मृणाल ठाकूर, हुमा कुरेशीचा 'पूजा मेरी जान' २ ऑक्टोबरला ZEE5 वर, नकार आणि गूढ घटनांची कथा

प्रत्येक चित्रपट प्रेक्षकांना सोपी उत्तरं देत नाही. काही कथा प्रेक्षकांना अस्वस्थ करतात, त्यांच्या समजुतींना धक्का देतात आणि आपण ज्या सत्यापासून पळ काढायचा प्रयत्न करतो, त्याच्याशी थेट सामना घडवतात. अशाच एका वेगळ्या आणि गूढ कथानकावर आधारित 'पूजा मेरी जान' हा चित्रपट लवकरच प्रेक्षकांसमोर येणार आहे. नवज्योत गुलाटी यांनी या चित्रपटाचं दिग्दर्शन केलं असून दिनेश विजन आणि अमर कौशिक यांनी याची निर्मिती केली आहे. मॅडॉक फिल्म्सने हा चित्रपट बनवला असून याचा प्रीमियर २ ऑक्टोबर २०२६ रोजी हिंदी ZEE5 वर होणार आहे.

या चित्रपटाची कथा पूजा नावाच्या तरुणीभोवती गुंफलेली आहे. आपल्या जवळच्या मित्राचं प्रेम नाकारण्याचा निर्णय पूजा घेते आणि त्यानंतर एकामागोमाग एक अस्वस्थ करणाऱ्या घटना घडू लागतात. कथा जसजशी पुढे सरकते, तसतसे अनेक प्रश्न उभे राहतात - नेमकं काय घडलं, याला जबाबदार कोण आहे आणि पूजा ही केवळ परिस्थितीची बळी आहे की तिच्या आजूबाजूला घडणाऱ्या घटनांशी तिचा वेगळाच काही संबंध आहे.

या संपूर्ण प्रकरणाचा छडा लावण्याचं काम हुमा कुरेशीने साकारलेली सना ही व्यक्तिरेखा करते. सना कायदेशीर दृष्टिकोनातून या प्रकरणाकडे पाहते आणि पूजाभोवती घडणाऱ्या घटनांचा मागोवा घेण्याचा प्रयत्न करते. वेगवेगळ्या व्यक्ती आपापल्या परस्परविरोधी बाजू मांडतात, त्यामुळे नेमकं सत्य काय आहे, हा प्रश्न शेवटपर्यंत कायम राहतो.

नकार, वेड, संमती, जबाबदारी, न्याय आणि समाजाच्या धारणा असे अनेक विषय या चित्रपटातून मांडले जातात. कथा एका व्यक्तीच्या नजरेतून न सांगता वेगवेगळ्या दृष्टिकोनातून उलगडली जाते, त्यामुळे प्रेक्षकांनाही घटनांकडे केवळ एका बाजूने न पाहता त्यामागचं सत्य समजून घेण्याचा प्रयत्न करावा लागतो, हे या चित्रपटाचं वैशिष्ट्य आहे.

पूजाची व्यक्तिरेखा साकारणाऱ्या मृणाल ठाकूरने सांगितलं की, ही कथा तिला सुरुवातीपासूनच आकर्षित करत होती. अभिनेत्री म्हणून या भूमिकेत व्यक्तिरेखेचे वेगवेगळे पदर शोधण्याची संधी तिला दिसली. पूजाच्या व्यक्तिरेखेला अनेक कंगोरे असून तिचा प्रवास आणि त्याभोवतीची गुंतागुंत तिला विशेष भावली, असं मृणालने म्हटलं. प्रेक्षकांना स्वतःच काही प्रश्नांची उत्तरं शोधायला लावणारी ही भूमिका आहे, असंही तिने सांगितलं. चित्रपट पाहताना प्रेक्षक जे पाहतात आणि त्यावरून जे मत बनवतात, त्याचा एखाद्या व्यक्तीचा किंवा परिस्थितीचा न्याय करण्यावर किती परिणाम होतो, हा प्रश्नही या कथेतून समोर येतो, असं मृणालचं म्हणणं आहे.

हुमा कुरेशीच्या मते, ही कथा केवळ एका बाजूने परिस्थितीकडे पाहत नाही. लोक आणि घटनांबद्दलचं आपलं मत कसं तयार होतं आणि सत्य व गृहीतकं यांच्यात फरक करणं किती अवघड असू शकतं, हे या कथेतून दिसून येतं, असं तिने सांगितलं.

मृणाल ठाकूर आणि हुमा कुरेशी यांच्या प्रमुख भूमिका असलेल्या या वेगळ्या धाटणीच्या चित्रपटाचा प्रीमियर २ ऑक्टोबर २०२६ रोजी हिंदी ZEE5 वर होणार आहे. प्रेम, नकार, संमती, जबाबदारी आणि समाजाच्या धारणा यांचा गुंता उलगडणारी ही कथा प्रेक्षकांसमोर कोणतं सत्य मांडते, हे पाहणं औत्सुक्याचं ठरणार आहे.