मोटोरोलाचे नवे कम्युनिटी ॲप 'मोटोरोलर्स' आले, गेमिंगपासून फोटोग्राफीपर्यंत सगळ्यांसाठी जागा

लोकप्रिय टेक आणि स्मार्टफोन कंपनी मोटोरोलाने आज आपल्या अधिकृत कम्युनिटी ॲपची घोषणा केली आहे. कंपनीचे हे ॲप 'मोटोरोलर्स' (Motorollers) या नावाने सादर करण्यात आले आहे. कंपनीचे यूजर्स, चाहते, कंटेंट क्रिएटर्स आणि तंत्रज्ञानप्रेमी यांना समान आवडीच्या विषयांवर एकमेकांशी संवाद साधता यावा, हा यामागचा हेतू आहे.

या ॲपमधून विचारांची देवाणघेवाण करता येणार आहे आणि नवे समुदायही तयार करता येणार आहेत. फक्त स्मार्टफोनपुरते मर्यादित न राहता कृत्रिम बुद्धिमत्ता (एआय), फोटोग्राफी, प्रवास, गेमिंग, क्रीडा आणि जीवनशैली अशा वेगवेगळ्या विषयांत रस असलेल्या लोकांना एकत्र आणण्यासाठी कंपनीने हे नवीन ॲप लाँच केले आहे.

'ट्राइब्स' (Tribes) हे या ॲपचे प्रमुख वैशिष्ट्य आहे. हा एक असा समुदाय आहे, जो समान आवडीनिवडी आणि छंद असलेल्या लोकांना एकत्र आणतो. यूजर्स स्वतःचे प्रोफाईल तयार करू शकतात, कंटेंट प्रकाशित करू शकतात, चर्चांमध्ये भाग घेऊ शकतात आणि समुदायात स्वतःची ओळख निर्माण करू शकतात. तसेच आपले विचार जास्तीत जास्त लोकांपर्यंत पोहोचवणेही शक्य होणार आहे. हे सगळे या नव्या ॲपच्या माध्यमातून करता येईल.

ॲपमध्ये 'व्हाइब चेक' (Vibe Check), 'हॉट टेक' (Hot Take) आणि 'डीप डाइव्ह' (Deep Dive) असे संवादात्मक पर्यायही उपलब्ध असतील. त्यामुळे सदस्यांच्या सहभागाला प्रोत्साहन मिळू शकते. मतदानातून लोकांची मते जाणून घेणे, वेगवेगळ्या विषयांवर आपले मत मांडणे आणि सविस्तर लेखांतून एखाद्या विषयाचा सखोल अभ्यास करणे, अशा सुविधा या पर्यायांतून मिळतील.

मोटोरोलाचे भारतातील व्यवस्थापकीय संचालक टी. एम. नरसिंहन यांनी सांगितले की, मोटोरोलामध्ये आमचा नेहमीच असा विश्वास राहिला आहे की तंत्रज्ञानाने लोकांना एकमेकांशी जोडले जाण्यास आणि आपले विचार व्यक्त करण्यास सक्षम केले पाहिजे. 'मोटोरोलर्स'च्या माध्यमातून आम्ही असे व्यासपीठ उपलब्ध करून देत आहोत, जिथे आमचे यूजर्स, चाहते आणि तंत्रज्ञानप्रेमी एकत्र येऊ शकतात, आपल्या आवडीनिवडी शेअर करू शकतात, विचारांची देवाणघेवाण करू शकतात आणि अर्थपूर्ण संबंध निर्माण करू शकतात.

'मोटोरोलर्स' ॲप गूगल प्ले स्टोअरवर डाउनलोड करण्यासाठी उपलब्ध आहे. या समुदायात सहभागी होण्यासाठी आणि 'मोटोरोलर्स' बनण्यासाठी यूजर्स हे ॲप डाउनलोड करू शकतात. थोडक्यात, यूजर्सना एकमेकांशी जोडणारे आणि त्यांना आपले विचार मांडू देणारे व्यासपीठ देणे, हा या ॲपचा उद्देश आहे.