इंस्टाग्राम रिल्स आता Apple TV च्या मोठ्या स्क्रीनवर; मेटाने ॲप आणले

इंस्टाग्राम आता फक्त मोबाईलच्या छोट्या स्क्रीनपुरते राहिलेले नाही. मेटाने त्यांचे हे लोकप्रिय सोशल मीडिया प्लॅटफॉर्म आता Apple TV साठीही उपलब्ध केले आहे. त्यामुळे यूजर्सना मोठ्या स्क्रीनवर रिल्स पाहता येणार आहेत. रिल्सबरोबरच इतर व्हिडीओ आणि लाईव्ह शोही टिव्हीवर बघता येतील.

कंपनीने इंस्टाग्रामचा व्हिडीओ अनुभव स्मार्टफोनच्या पुढे नेऊन थेट लिविंग रुमपर्यंत पोहोचवण्याचा प्रयत्न केला आहे. त्यामुळे मित्र आणि कुटुंबातले सगळे एकत्र बसून इंस्टाग्रामवरचा कंटेंट बघू शकतात. मोबाईलवर एकट्याने रिल्स बघण्याऐवजी मित्र आणि कुटुंबासोबत टिव्हीच्या मोठ्या स्क्रीनवर बघण्याची मजा यूजर्सना घेता येणार आहे.

ॲप स्टोअरवर आता इंस्टाग्राम ॲप Apple TV साठीही दिसू लागले आहे. याआधी ॲप स्टोअरमधील या ॲपच्या लिस्टिंगमध्ये फक्त आयफोन आणि आयपॅडसाठी सपोर्ट दिलेला होता, Apple TV चा त्यात समावेश नव्हता. आता मात्र कंपनीने Apple TV साठीही ॲप जारी केले आहे. त्यामुळे यूजर्स इंस्टाग्राम Apple TV वर डाऊनलोड करून मोठ्या स्क्रीनवर रिल्स पाहू शकतील.

हे ॲप मोफत डाऊनलोड करता येते. त्यात इन-ॲप खरेदीचा पर्यायही देण्यात आला आहे. मात्र एक गोष्ट लक्षात ठेवायला हवी. मोठ्या स्क्रीनवर इंस्टाग्राम पाहायचे असेल, तर Apple TV मध्ये tvOS 26.0 किंवा त्यापेक्षा नवीन सॉफ्टवेअर वर्जन असणे गरजेचे आहे.

टिव्हीवरचा अनुभव फक्त छोट्या व्हिडीओंपुरता मर्यादित राहणार नाही. यूजर्स त्यांच्या आवडत्या क्रिएटर्सचे व्हिडीओ बघू शकतात आणि आपल्या आवडीनुसार कंटेंट शोधूही शकतात. रिल्सशिवाय मोठे व्हिडीओ आणि लाईव्ह शो बघण्याचा पर्यायही ॲपमध्ये मिळणार आहे. आणखी एक फीचर म्हणजे दुसऱ्या डिव्हाईसवर बघत असलेला अर्धवट राहिलेला व्हिडीओ यूजर्स टिव्हीवर पुढे बघू शकणार आहेत.

मेटाने हा विस्तार एकदम न करता टप्प्याटप्प्याने केला आहे. डिसेंबर 2025 मध्ये अमेझॉन फायर टीव्ही डिव्हाईसवर इंस्टाग्राम सपोर्ट देऊन चाचणी सुरू करण्यात आली होती. त्यानंतर फेब्रुवारी 2026 मध्ये गूगल टिव्हीसाठी आणि जून 2026 मध्ये सैमसंग स्मार्ट टिव्हीसाठी इंस्टाग्राम ॲपचा विस्तार करण्यात आला. आता Apple TV साठीही ते उपलब्ध करून मेटाने आपला व्हिडीओ प्लॅटफॉर्म जास्तीत जास्त लोकांपर्यंत पोहोचवण्याचा प्रयत्न केला आहे.