Meta One: व्हाट्सऐप, इन्स्टाग्राम, फेसबुकचे प्रीमियम फीचर्स आता एकाच सबस्क्रिप्शनमध्ये
मेटाने भारतासह जगभरात Meta One हे नवे ऑल इन वन सबस्क्रिप्शन आणले असून त्यात वैयक्तिक युजर्ससाठी आणि व्यवसाय-क्रिएटर्ससाठी वेगवेगळे प्लॅन देण्यात आले आहेत.
मेटा कंपनीने भारतासह जागतिक बाजारपेठेत एक नवं सबस्क्रिप्शन मॉडेल आणलं आहे, ज्याचं नाव आहे Meta One. आतापर्यंत व्हाट्सऐप, इन्स्टाग्राम आणि फेसबुक या तीन अॅप्सचे प्रीमियम फीचर्स वेगवेगळे घ्यावे लागत होते, ते आता एकाच सबस्क्रिप्शनमध्ये मिळणार आहेत. व्हाट्सऐप, इन्स्टाग्राम, फेसबुक आणि मेटा एआय या चारही ठिकाणचे फीचर्स एका छत्राखाली आणणे हा या नव्या सेवेचा मुख्य उद्देश आहे.
ज्या युजर्सना वैयक्तिक वापरासाठी आणि एआयचा जास्त वापर करायचा असतो, त्यांच्यासाठी कोअर आणि प्रीमियम असे दोन प्लॅन ठेवण्यात आले आहेत. तर व्यवसाय आणि कंटेंट क्रिएटर्ससाठी एसेन्शियल, अॅडव्हान्स्ड, एक्सपर्ट आणि मॅक्स असे चार वेगळे बंडल दिले गेले आहेत.
भारतातील किमतींबद्दल बोलायचं झालं तर कोअर प्लॅनसाठी दरमहा 549 रुपये आणि प्रीमियम प्लॅनसाठी दरमहा 1,960 रुपये मोजावे लागतील. या दोन्ही प्लॅनमध्ये इन्स्टाग्राम प्लस, फेसबुक प्लस आणि व्हाट्सऐप प्लसमधले फीचर्स एकत्रितपणे मिळतात, शिवाय मेटा एआयच्या काही सुविधांचा वापर वाढीव मर्यादेत करता येतो. कोअर प्लॅनमध्ये इन्स्टाग्राम स्टोरीजसाठी रिस्टाइल, व्हॉइस इफेक्ट्स आणि इतर क्रिएटिव्ह टूल्स जास्त प्रमाणात वापरता येतात, तसंच मेटा एआयच्या मदतीने जास्त इमेज आणि व्हिडिओ तयार करता येतात. प्रीमियम प्लॅनमध्ये या सगळ्या सुविधांसह आणखी मोठ्या वापर मर्यादा दिल्या जातात.
व्यवसाय आणि क्रिएटर्ससाठीच्या चार प्लॅनच्या किमतीही जाहीर करण्यात आल्या आहेत. एसेन्शियल प्लॅन दरमहा 639 रुपये, अॅडव्हान्स्ड दरमहा 2,099 रुपये, एक्सपर्ट दरमहा 6,399 रुपये आणि मॅक्स प्लॅन दरमहा 20,990 रुपयांना उपलब्ध आहे. एसेन्शियल प्लॅनमध्ये व्यवसाय ऑनलाइन सांभाळण्यासाठी टूल्स आणि व्हॉट्सअॅपवरील मेटा बिझनेस एजंटचा जास्त वापर मिळतो. यशस्वी पडताळणीनंतर व्हेरिफाइड बॅज, व्हाट्सऐप बिझनेस अॅपवरील व्हेरिफाइड चॅनल आणि इंपर्सोनेशन प्रोटेक्शनसारख्या सुविधाही या प्लॅनमध्ये मिळतात.
अॅडव्हान्स्ड प्लॅनमध्ये व्यावसायिक स्तरावरचे पब्लिशिंग आणि अॅनालिटिक्स टूल्स उपलब्ध आहेत, जसं की 30 दिवसांपर्यंत स्टोरीज आधीच शेड्यूल करता येणं, ऑर्गेनिक पोस्ट आणि रील्समध्ये लिंक जोडता येणं, एक्सपोर्टेबल अॅनालिटिक्स आणि सखोल ऑडियन्स इनसाइट्स मिळणं. याशिवाय टीम मेंबर्सना पासवर्ड न देता अकाउंटचा अॅक्सेस देता येतो, जास्त लिंक्ड डिव्हाइसेस वापरता येतात आणि व्हाट्सऐप बिझनेस ब्रॉडकास्ट क्रेडिट्सही मिळतात. एक्सपर्ट आणि मॅक्स हे सगळ्यात वरच्या स्तरावरचे प्लॅन असून मोठ्या टीम्स चालवणाऱ्या व्यवसायांसाठी मेटा बिझनेस एजंटची जास्त क्षमता आणि Meta One मधले सर्वाधिक फीचर्स यात दिले जातात.
मेटाच्या मते Meta One अंतर्गत 50 हून अधिक फीचर्स आणले गेले असून ही सेवा टप्प्याटप्प्याने वाढवली जाणार आहे. महत्त्वाचं म्हणजे मेटाच्या अॅप्सचा नेहमीचा वापर आणि मेटा एआयचा बेसिक अनुभव मोफतच राहील, पेड सबस्क्रिप्शन घेतल्यावरच जास्त एआय वापर, अतिरिक्त क्रिएटिव्ह फीचर्स आणि व्यावसायिक टूल्स मिळतील.
