माथेरानमध्ये अश्वपालकांचे घोडे बंद आंदोलन, श्रीराम चौकात बेमुदत उपोषण सुरू

माथेरानमध्ये रस्त्यांवर पेव्हर ब्लॉक बसवले जात आहेत. या कामाविरोधात शहरातील अश्वपाल संघटना आक्रमक झाल्या आहेत. सोमवारपासून त्यांनी व्यवसाय बंद आंदोलन सुरू केले असून, तेव्हापासून एकही घोडा माथेरानच्या रस्त्यावर व्यवसायासाठी उतरलेला नाही. प्रशासन लक्ष देत नसल्याने सर्व अश्वपालकांनी अखेर श्रीराम चौकात उपोषण सुरू केले आहे.

याच विषयावर घोडे व्यवसाय बंद ठेवण्याची ही दुसरी वेळ आहे. पालिका कोणतीही कारवाई करत नसल्याने हा वाद चिघळण्याची शक्यता आहे.

अश्वपालकांच्या प्रलंबित प्रश्नांवर प्रशासनाकडून ठोस कार्यवाही होत नाही, असे संघटनांचे म्हणणे आहे. त्यामुळे स्थानिक अश्वपाल संघटना आणि मूलवासी अश्वपाल संघटना यांनी आंदोलन सुरू केले. सोमवार, २६ ऑक्टोबरपासून घोडे बंद आंदोलन सुरू आहे. त्यानंतर गुरुवार, २९ ऑक्टोबरपासून बेमुदत उपोषण सुरू झाले. अश्वपाल संघटनेच्या नेत्या आशा कदम यांच्या नेतृत्वाखाली श्रीराम चौक येथे हे उपोषण सुरू आहे.

रस्त्यांची दुरवस्था, निकृष्ट क्ले पेव्हर ब्लॉक, मोडकळीस आलेले घोडा स्टँड, हेरिटेज बंगल्यांच्या कामांना दिलेल्या परवानग्या आणि ई रिक्षांचे प्रश्न, या सगळ्यांवर प्रशासनाने निर्णय घेतलेला नाही. त्यामुळे संघटना आक्रमक झाली आहे.

श्री छत्रपती शिवाजी महाराज पुतळा ते खंडाळा पॉईंट रोडपर्यंत क्ले पेव्हर ब्लॉकचे काम सुरू आहे. या कामाच्या दर्जावर संघटनेने प्रश्नचिन्ह उपस्थित केले आहे. कामाची गुणवत्ता तपासावी आणि निकृष्ट काम तातडीने थांबवावे, अशी मागणी करण्यात आली आहे.

शार्लोट लेकच्या संवर्धन कामातून काढलेले दगड आणि माती रस्त्यांसाठी आणि इतर कामांसाठी वापरले जाईल, असे सांगण्यात आले होते. या साहित्याचा वापर कुठे झाला, याची माहिती देऊन संपूर्ण हिशेब सार्वजनिक करावा, अशी संघटनेची मागणी आहे.

सर्वोच्च न्यायालयाच्या निर्देशांनुसार ई रिक्षा सुरू झाल्या आहेत. मात्र मंजुरी २० ई रिक्षांची असताना त्या २६ कशा झाल्या, आणि हातरिक्षा चालकांच्या मागण्यांवर निर्णय का झाला नाही, असे सवाल अश्वपाल संघटनेने उपस्थित केले आहेत. हेरिटेज बंगल्यांच्या कामांना दिलेल्या परवानग्या आणि मोडकळीस आलेल्या घोडा स्टँडच्या दुरुस्तीबाबतही संघटनेने उत्तरे मागितली आहेत.

अश्वपाल संघटनेच्या अध्यक्षा आशा कदम यांनी वारंवार पत्रव्यवहार करूनही अश्वचालकांचे प्रश्न सुटत नसल्याबद्दल नाराजी व्यक्त केली. त्यामुळे घोडे बंद आंदोलनानंतर आजपासून बेमुदत आमरण उपोषण सुरू करण्याचा निर्णय घेतल्याचे त्यांनी सांगितले. माथेरानमधील अश्वचालकांच्या मागण्यांवर प्रशासन ठोस निर्णय घेणार का, याकडे आता सर्वांचे लक्ष लागले आहे.