प्रसिद्ध अभिनेते मुश्ताक खान यांचे निधन, कॅन्सरमुळे झाला मृत्यू

बॉलिवूडमध्ये सहकलाकाराच्या भूमिकेतून ओळख निर्माण केलेले अभिनेते मुश्ताक खान यांचे गुरुवारी निधन झाले. ते ५६ वर्षांचे होते. दीर्घ आजारपणामुळे त्यांची प्राणज्योत मालवली.

मुश्ताक खान यांनी 'वेलकम', 'आशिकी', 'मुझसे शादी करोगी' आणि 'हम हैं राही प्यार के' अशा अनेक गाजलेल्या चित्रपटांत काम केले होते. या भूमिकांमधून त्यांनी प्रेक्षकांच्या मनावर आपल्या अभिनयाची छाप सोडली होती. त्यांच्या निधनाच्या बातमीने फिल्म इंडस्ट्रीत आणि चाहत्यांमध्ये शोककळा पसरली आहे.

मिळालेल्या माहितीनुसार, मुश्ताक खान यांच्यावर मागील १५ दिवसांपासून मुंबईतील नानावटी रुग्णालयात उपचार सुरू होते. त्यांना कॅन्सर झाला होता. सुमारे पाच वर्षांपूर्वी त्यांना पहिल्यांदा कॅन्सर असल्याचे निदान झाले होते आणि त्यातून ते बरेही झाले होते. पण काही काळानंतर हा आजार पुन्हा उलटला आणि त्यांची तब्येत दिवसेंदिवस खालावत गेली. उपचार सुरू असतानाही त्यांच्या प्रकृतीत सुधारणा होऊ शकली नाही. अखेर गुरुवारी संध्याकाळी त्यांनी अखेरचा श्वास घेतला.

मुश्ताक खान यांचे जवळचे मित्र शिवम यांनी एका हिंदी वृत्तवाहिनीला त्यांच्या निधनाची बातमी दिली. त्यांच्याच माहितीनुसार, मुश्ताक यांच्यावर २५ तारखेला अंत्यसंस्कार करण्यात येणार असल्याचे सांगण्यात आले आहे. त्यांच्या कुटुंबीयांसह चित्रपटसृष्टीतील अनेक कलाकार व चाहत्यांनी या निधनाबद्दल दुःख व्यक्त केले आहे.

मुश्ताक खान यांनी आपल्या करिअरमध्ये बहुतांश वेळा सहकलाकार आणि विनोदी भूमिका साकारल्या. 'वेलकम' या चित्रपटातील त्यांचा अभिनय आजही प्रेक्षकांच्या स्मरणात आहे. याशिवाय 'आशिकी', 'मुझसे शादी करोगी' आणि 'हम हैं राही प्यार के' या चित्रपटांतूनही त्यांनी आपल्या अभिनयाची छाप पाडली होती.

२०२४ मध्ये मुश्ताक खान एका भीतीदायक किडनॅपिंगच्या घटनेला सामोरे गेले होते. २० नोव्हेंबर २०२४ रोजी त्यांना मेरठमधील एका कार्यक्रमात सहभागी होण्यासाठी बोलावण्यात आले होते. पोलिसांच्या माहितीनुसार, त्यांना दिल्ली विमानतळावरून कारमध्ये बसवण्यात आले आणि बिजनौरला नेऊन त्यांचे अपहरण करण्यात आले. काही बातम्यांनुसार, गुंडांनी त्यांना तब्बल १२ तास त्रास दिला आणि १ कोटी रुपयांची खंडणी मागितली. त्या वेळी काही प्रसारमाध्यमांशी बोलताना मुश्ताक यांनी सांगितले होते की, एखाद्या कलाकाराकडे इतका पैसा नसतो, हे ऐकून अपहरणकर्ते चक्रावले होते. त्या गुंडांना असे वाटत होते की प्रत्येक कलाकार गर्भश्रीमंत असतो. सुदैवाने मुश्ताक तेथून पळून जाण्यात यशस्वी झाले होते.