अर्ध्या भारताची पसंती हीच गाडी! 34 किमी मायलेज, 5 स्टार सेफ्टी आणि 6 एअरबॅग्ज, बाजारात धुमाकूळ
मारुती सुजुकी डिझायरने सेडान सेगमेंटमध्ये पुन्हा एकदा आपले वर्चस्व सिद्ध केले असून ऑगस्ट 2026 मध्ये या गाडीने विक्रीचा नवा विक्रम नोंदवला.
भारतीय कार बाजारात ऑगस्ट 2026 मध्ये मारुती सुजुकीने आपली आघाडी आणखी भक्कम केली आहे. कंपनीने या महिन्यात एकूण 1,76,971 गाड्यांची विक्री केली, जी गेल्या वर्षीच्या याच काळाच्या तुलनेत 34.81 टक्क्यांनी जास्त आहे. या वाढीत सगळ्यात मोठा वाटा उचलला तो कंपनीच्या लोकप्रिय कॉम्पॅक्ट सेडान डिझायरने. या गाडीने सेडान सेगमेंटमध्ये आपले वर्चस्व पुन्हा एकदा सिद्ध केले आणि बाजारात नवा विक्रम नोंदवला.
ऑगस्ट महिन्यात देशभरात एकूण 32,913 सेडान गाड्यांची विक्री झाली. यातील तब्बल 18,418 गाड्या फक्त डिझायरच्याच होत्या. म्हणजे रस्त्यावर धावणारी प्रत्येक दुसरी सेडान डिझायर होती, आणि या सेगमेंटवर तिचे 56 टक्के वर्चस्व राहिले. मागच्या वर्षीच्या तुलनेत डिझायरच्या विक्रीत 11.6 टक्क्यांची वाढ नोंदवली गेली. या शर्यतीत ह्युंदाई ऑरा 6,685 युनिट्ससह दुसऱ्या आणि होंडा अमेज 3,512 युनिट्ससह तिसऱ्या क्रमांकावर राहिली.
डिझायरच्या या जबरदस्त विक्रीमागे अनेक कारणे आहेत. सगळ्यात आधी किंमत आणि पर्यायांची वैविध्यता हे कारण सांगता येईल. या कारची एक्स-शोरूम किंमत 6.31 लाख रुपयांपासून सुरू होते आणि 9.41 लाख रुपयांपर्यंत जाते. बजेटमध्ये बसणाऱ्या एलएक्सआय मॉडेलपासून ते झेडएक्सआय प्लस एएमटी आणि सीएनजी पर्यायांपर्यंत, जे 8.18 लाख रुपयांपासून सुरू होतात, असे सगळे पर्याय उपलब्ध असल्याने प्रत्येक ग्राहकाला आपल्या गरजेप्रमाणे आणि खिशाप्रमाणे मॉडेल निवडता येते. यामुळेच ही गाडी वेगवेगळ्या आर्थिक स्तरातील ग्राहकांपर्यंत पोहोचली आहे.
ही कार फक्त घरगुती वापरासाठीच नाही, तर टॅक्सी आणि कमर्शियल फ्लीटसाठीही पहिली पसंती बनली आहे. 2026 च्या पहिल्या सत्रात डिझायरच्या एकूण विक्रीपैकी जवळपास 35 टक्के वाटा टॅक्सी सेगमेंटचा होता. मारुतीने 'टूर एस' या मॉडेलच्या माध्यमातून या बाजारावरही चांगली पकड ठेवली आहे, त्यामुळे वैयक्तिक ग्राहकांबरोबरच व्यावसायिक ग्राहकांचाही या गाडीला मोठा पाठिंबा मिळत आहे.
सेफ्टीच्या बाबतीतही नव्या पिढीच्या डिझायरमध्ये विशेष लक्ष दिले गेले आहे. भारत एनकॅप आणि ग्लोबल एनकॅप या क्रॅश टेस्टमध्ये या कारला 5 स्टार सेफ्टी रेटिंग मिळाले आहे. सर्व व्हेरियंट्समध्ये 6 एअरबॅग्ज आणि इलेक्ट्रॉनिक स्टेबिलिटी कंट्रोल स्टँडर्ड म्हणून दिले जातात, त्यामुळे सुरक्षिततेच्या दृष्टीनेही ही गाडी ग्राहकांच्या पसंतीस उतरली आहे.
मायलेजच्या बाबतीतही ही कार पुढे आहे. 1.2 लिटर झेड-सीरिज पेट्रोल इंजिनसह मॅन्युअल मॉडेल 24.79 किमी प्रति लिटर तर एएमटी मॉडेल 25.71 किमी प्रति लिटर मायलेज देते. सीएनजी मॉडेल तब्बल 33.73 किमी प्रति किलोग्रॅमचा अॅव्हरेज देते, त्यामुळे मध्यमवर्गीय ग्राहकांच्या खिशावर फारसा ताण पडत नाही आणि रोजच्या वापरातही ही गाडी किफायतशीर ठरते.
