मर्सिडीज-मेबॅक एस-क्लासची नवी आवृत्ती ५ ऑक्टोबरला भारतात दाखल होणार
फेसलिफ्ट मॉडेलमध्ये डिझाइन, इंटीरियर, टेक्नॉलॉजी आणि इंजिनमध्ये बदल करण्यात आले आहेत.
लक्झरी कार सेगमेंटमध्ये स्वतःची वेगळी छाप उमटवणारी मर्सिडीज-मेबॅक एस-क्लास आता नव्या अपडेट्ससह भारतीय बाजारात येण्यासाठी सज्ज झाली आहे. या 2026 मॉडेलचं भारतातील लाँचिंग 5 ऑक्टोबरला होणार आहे. या फेसलिफ्ट व्हर्जनमध्ये डिझाइन, इंटीरियर, टेक्नॉलॉजी आणि इंजिन या सगळ्याच बाबतीत बरेच बदल करण्यात आले आहेत. भारतासाठी नेमके कोणते व्हेरिएंट येणार आणि त्यांची किंमत काय असणार, याबद्दलची माहिती लाँचच्या वेळीच स्पष्ट होईल असं सांगितलं जातंय.
मागच्या सीटवर बसणाऱ्या प्रवाशांना अधिक कम्फर्ट मिळावा यासाठी मेबॅक एस-क्लासमध्ये खास लक्ष देण्यात आलं आहे. यातील Executive सीट्स तब्बल 43 डिग्रीपर्यंत रिक्लाइन करता येतात, आणि त्यात हीटिंग, व्हेंटिलेशन तसेच मसाज फंक्शनही देण्यात आलं आहे. आधीच्या मॉडेलमध्ये असलेल्या टॅबलेटऐवजी आता मागच्या दोन्ही प्रवाशांना स्वतंत्रपणे स्मार्टफोनसारखा कंट्रोलर मिळणार आहे, ज्यामुळे सीट, क्लायमेट आणि एंटरटेनमेंटची सेटिंग प्रत्येकाला आपापल्या पद्धतीने बदलता येईल.
या मॉडेलमध्ये पहिल्यांदाच MB.OS ही ऑपरेटिंग सिस्टिम दिली गेली आहे. सोबतच चौथ्या जनरेशनचं MBUX, मेबॅकसाठी खास बनवलेले ग्राफिक्स आणि अपडेट केलेला Zero Layer इंटरफेस यामुळे डिजिटल अनुभव अधिक अद्ययावत झाला आहे. डॅशबोर्डवर 12.3-इंचाचा डिजिटल इन्स्ट्रुमेंट क्लस्टर, 14.4-इंचाची सेंट्रल स्क्रीन आणि 12.3-इंचाचा पॅसेंजर डिस्प्ले बसवण्यात आला आहे. यातील MBUX Virtual Assistant मध्ये जनरेटिव्ह AI वापरणारी फंक्शन्सही समाविष्ट करण्यात आली आहेत.
बाह्यरूपाबद्दल बोलायचं झालं, तर या फेसलिफ्टमध्ये मेबॅकची ग्रिल आधीपेक्षा जवळपास 20 टक्के मोठी करण्यात आली आहे. उभ्या क्रोम स्लॅट्ससह इल्यूमिनेटेड ग्रिल सराउंडही यात दिला गेला आहे. काही बाजारपेठांमध्ये बोनटवरचा स्टार आणि C-पिलरवरचा मेबॅक लोगोही उजळणारा असणार आहे. नव्या स्टार-आकाराच्या DRL, 20 आणि 21 इंचांचे अलॉय व्हील्स तसेच अपडेटेड टेललॅम्प्समुळे कारला वेगळा लूक मिळाला आहे.
इंजिनच्या बाबतीत S 580 व्हेरिएंटमध्ये 4.0-लिटरचं M177 Evo V8 इंजिन असून ते 537 hp पॉवर आणि 750 Nm टॉर्क देतं. काही देशांमध्ये उपलब्ध असलेल्या S 580e या प्लग-इन हायब्रिड व्हेरिएंटमध्ये 3.0-लिटर पेट्रोल इंजिन, इलेक्ट्रिक मोटर आणि 22 kWh बॅटरी दिली जाते. याची एकूण सिस्टम पॉवर 585 hp इतकी असून इलेक्ट्रिक रेंज 98 km पर्यंत आहे. तर S 680 या व्हेरिएंटमध्ये काही बाजारपेठांत 6.0-लिटरचं V12 इंजिन दिलं जातं, जे 630 hp पॉवर आणि 900 Nm आउटपुट देतं, तर काही ठिकाणी 4.0-लिटर V8 इंजिनचा पर्यायही उपलब्ध असणार आहे.
