'मृत्यूचक्र' सस्पेन्स-थ्रिलरचा ट्रेलर लाँच, २३ ऑक्टोबरला महाराष्ट्रातील चित्रपटगृहांत

'मृत्यूचक्र' हा मराठी सस्पेन्स-थ्रिलर येत्या २३ ऑक्टोबरला संपूर्ण महाराष्ट्रातील चित्रपटगृहांत प्रदर्शित होणार आहे. त्याआधी या चित्रपटाचा ट्रेलर नुकताच प्रदर्शित झाला. मानवी अस्तित्व, कर्माचे गूढ, मृत्यूचे अटळ चक्र आणि अनाकलनीय घटनांची मालिका यांचा रहस्यमय पट या चित्रपटात उलगडतो. मृत्यूच्या पलीकडे दडलेले गूढ, कर्माच्या हिशेबाचा अनाकलनीय खेळ आणि भयाची सावली यांची सांगड घालणाऱ्या या चित्रपटाने प्रदर्शनाआधीच कुतूहल जागे केले आहे.

ट्रेलर लाँचचा सोहळा नुकताच पार पडला. या वेळी सिद्धिविनायक मंदिर न्यासाचे विश्वस्त राजाराम देशमुख, अखिल भारतीय चित्रपट महामंडळाचे अध्यक्ष मेघराजराजे भोसले आणि उपाध्यक्ष धनाजी यमकर प्रमुख पाहुणे म्हणून उपस्थित होते.

श्री महादेव फिल्म प्रॉडक्शन यांनी हा चित्रपट सादर केला असून अध्यांश मोशन पिक्चर यांनी त्याची निर्मिती केली आहे. निर्मात्या प्रणाली उन्मेश वाघमोडे आहेत. दिग्दर्शनाची जबाबदारी विलास वाघमोडे आणि अनुप्रिता कडू-गंगावणे यांनी सांभाळली आहे.

ट्रेलरमधली दृश्यांची मांडणी खिळवून ठेवणारी आहे. एखाद्या गूढ चक्राची टिक-टिक, धूसर प्रकाशात दिसणाऱ्या प्राचीन वास्तू, अंधाराचे सावट, सिरीयल किलरची दहशत आणि शांतता चिरत जाणारे भीतीदायक पार्श्वसंगीत अंगावर काटा आणते. गावाकडच्या साध्या वातावरणाशी जोडलेली वेशभूषा दिसते आणि त्याच वेळी व्यक्तिरेखांच्या चेहऱ्यावरचे अनाकलनीय भाव कथानकातल्या खोल रहस्याची साक्ष देतात.

हॉस्पिटलमधली दृश्ये, वैद्यकीय वास्तव आणि मानवी आकलनापलीकडच्या गूढ शक्तींचा संघर्ष यांमुळे कथेतला सस्पेन्स आणखी वाढतो. प्रत्येक सेकंदाला कथेला नवे वळण मिळत असल्याचा भास होतो. "सुरुवात तिथेच होते, जिथे शेवट झाला होता, चक्र मृत्यूचे - मृत्यूचक्र..." हा संदेश आणि "प्रत्येक मृत्यूमागे आहे एक अदृश्य सावली..." हे वाक्य चित्रपटाभोवतीचे रहस्य अधिक गडद करते.

ट्रेलरबद्दल दिग्दर्शक म्हणाले की, 'मृत्यूचक्र' हा फक्त रहस्य आणि थराराचा खेळ नाही, तर मृत्यू, कर्म आणि मानवी अस्तित्वाकडे वेगळ्या नजरेने पाहणारा अनुभव आहे. ट्रेलरमधून फक्त चित्रपटाची झलक दाखवली आहे. त्यामागचे गूढ आणि प्रत्येक घटनेमागचा धागा प्रेक्षकांपासून जाणूनबुजून लपवला आहे. ट्रेलर पाहताना निर्माण झालेली उत्सुकता चित्रपटगृहात पोहोचेपर्यंत टिकून राहावी, हाच प्रयत्न असल्याचे त्यांनी सांगितले. हा चित्रपट प्रेक्षकांना नुसता घाबरवणार नाही, तर संपल्यानंतरही काही प्रश्न त्यांच्या मनात घोळवत ठेवेल, असा विश्वास त्यांनी व्यक्त केला.

चित्रपटात शशांक शेंडे, अक्षया गुरव, पुष्कराज चिरपुटकर, आस्ताद काळे, वर्षा दांदळे, कृतिका तुळसकर, सानिका बनारसवाले, संजय शेजवळ, शलाका गाडे, शरा गायकवाड, जितेंद्र पोळ आणि अनिल रबाळे यांच्या भूमिका आहेत. चित्रपटाची मूळ कथा डॉ. सुधीर निकम यांची आहे. पटकथा आणि संवाद विलास वाघमोडे व डॉ. सुधीर निकम यांनी लिहिले आहेत.

रोहन शहा हे चित्रपटाचे क्रिएटिव्ह प्रोड्युसर आहेत. जयेश मिस्त्री यांच्या यूजेएम नेटवर्क्स अँड एंटरटेनमेंट एलएलपीतर्फे चित्रपटाचे वितरण संपूर्ण महाराष्ट्रात केले जाणार आहे. संगीत आणि पार्श्वसंगीत केदार दिवेकर यांचे आहे. वलय मुळगुंद यांच्या गीतांना सुहास सावंत आणि शमिका भिडे यांनी आवाज दिला आहे. छायांकन डिओपी निशांत भागवत यांचे, तर संकलन राहुल भातणकर यांचे आहे. प्रोडक्शन डिझायनर मयूर पवार, कला दिग्दर्शक कुणाल वेदपाठक, वेशभूषाकार किर्ती जंगम जोशी आणि रंगभूषाकार संतोष गायके यांनी आपापली जबाबदारी पार पाडली आहे.