Thar विरुद्ध Thar ROXX: किंमत, इंजिन आणि जागेत नेमका फरक काय, कोणती घ्यावी?

SUV खरेदी करताना ऑफ-रोडिंगची हौस आणि घरच्यांसाठी आरामदायी प्रवास, या दोन्ही गोष्टी एकत्र हव्या असतील, तर Mahindra Thar आणि Thar ROXX यापैकी काय घ्यावे, हा प्रश्न अनेकांना पडतो. दोन्ही गाड्या एकाच कुटुंबातल्या असल्यामुळे त्यांचा लूक आणि नाव जवळपास सारखेच वाटते. पण फरक फक्त आकारात नाही, तर वापराच्या उद्देशातही आहे.

3-डोअर Thar ही मुळात ऑफ-रोडिंग आणि लाइफस्टाइलसाठी बनवलेली गाडी आहे, तर 5-डोअर Thar ROXX मध्ये रोजच्या वापरासाठी जास्त जागा, मोठा बूट आणि घरच्यांना सोयीचे वाटेल असे डिझाइन दिले आहे. दोन्ही गाड्यांमध्ये बॉडी-ऑन-फ्रेम बांधणी आणि 4X4 ऑफ-रोड क्षमता आहे. तरी ROXX ही केवळ मोठी Thar नसून तिचे स्वतःचे व्हेरिएंट आणि स्वतंत्र ओळख आहे.

किंमतीबद्दल बोलायचे झाले, तर Thar ही 3-डोअर आणि 4-सीटर लाइफस्टाइल SUV आहे, जिची एक्स-शोरूम किंमत 10.32 लाख रुपयांपासून सुरू होऊन 17.99 लाख रुपयांपर्यंत जाते. यात 2.0-लिटर टर्बो पेट्रोल आणि 1.5-लिटर व 2.0-लिटर डिझेल इंजिनचे पर्याय मिळतात, तसेच RWD आणि 4WD कॉन्फिगरेशनसह मॅन्युअल आणि ऑटोमॅटिक गिअरबॉक्सही उपलब्ध आहे. दुसरीकडे Thar ROXX ही 5-डोअर आणि 5-सीटर गाडी असून लांब व्हीलबेस असलेल्या प्लॅटफॉर्मवर बनवली आहे. तिची किंमत 12.52 लाख रुपयांपासून सुरू होऊन 23.52 लाख रुपयांपर्यंत जाते आणि ती एकूण 7 व्हेरिएंटमध्ये मिळते. इंजिन फॅमिली Thar सारखीच असली, तरी उच्च व्हेरिएंटमधले इंजिन जास्त पॉवरफुल ट्यून केलेले आहे.

डिझाइनमध्ये ROXX ला डबल-स्टॅक्ड 6-स्लॉट ग्रिल, LED प्रोजेक्टर हेडलॅम्प आणि LED DRLs मिळतात, तर Tharलाही फेसलिफ्टनंतर नवा डॅशबोर्ड आणि सुधारित ग्रिल मिळाली आहे. केबिनमध्ये मात्र ROXXचा लांब व्हीलबेस मागच्या प्रवाशांना जास्त लेगरूम देतो, शिवाय नवे सेंटर कन्सोल आणि स्टीअरिंग व्हीलही आहे. Tharच्या मागच्या सीटवर जाण्यासाठी पुढच्या दरवाजातूनच वाट काढावी लागते आणि बूट स्पेसही मर्यादित राहतो.

इंजिन-परफॉर्मन्सच्या बाबतीत ROXX मध्ये 2.2-लिटर mHawk डिझेल आणि 2.0-लिटर mStallion टर्बो पेट्रोल इंजिन असून ती स्टँडर्ड Tharपेक्षा जास्त पॉवर व टॉर्क देण्यासाठी ट्यून केली आहेत. ऑफ-रोडिंगमध्ये ROXXला 226mm ग्राउंड क्लीयरन्स, 650mm वॉटर-वेडिंग डेप्थ आणि 4XPLOR टेरेन मॅनेजमेंट सिस्टम (इलेक्ट्रॉनिक लॉकिंग व ब्रेक-लॉकिंग डिफरेंशियलसह) मिळते; ऑटोमॅटिक व्हेरिएंटमध्ये Crawl Smart Assist देखील आहे. पण अरुंद व कठीण ट्रेलवर स्टँडर्ड Tharचा छोटा आकार जास्त उपयोगी ठरू शकतो.

रोजच्या वापरासाठी ROXXचे 5-डोअर लेआउट, सॉफ्ट राइड, 447-लिटर बूट, मागच्या AC व्हेंट्स आणि रिक्लायनिंग सीट्स फायद्याच्या ठरतात. त्यामुळे फक्त ऑफ-रोडिंगसाठी 3-डोअर लेआउट चालणार असेल, तर Thar; आणि 5 दरवाजे, जास्त जागा व कुटुंबासाठी आराम हवा असेल, तर Thar ROXXचा विचार करता येतो.