जिल्हा परिषदेआधीच महायुतीत ठिणगी: रघुवंशींच्या टीकेनंतर भाजप आणि शिंदे गट आमनेसामने

जिल्हा परिषद निवडणुका अजून व्हायच्या आहेत, पण त्याआधीच महायुतीतील भाजप आणि शिंदे गट एकमेकांसमोर उभे ठाकले आहेत. नंदुरबारमध्ये स्वीकृत नगरसेवकाच्या निवडीवरून शिवसेनेचे आमदार चंद्रकांत रघुवंशी यांनी केलेल्या वक्तव्यामुळे हा नवा वाद पेटला आहे. एक लाख 10 हजार मतदारांमध्ये भाजपला एकही पात्र उमेदवार सापडला नाही, अशी टीका रघुवंशी यांनी केली.

प्रकरण असे की, नंदुरबारमध्ये एका स्वीकृत नगरसेवकाने राजीनामा दिला. त्यानंतर त्या जागेवर नवी नियुक्ती करण्याची प्रक्रिया सुरू झाली. या प्रक्रियेत भाजपने दिलेल्या उमेदवाराचा अर्ज कागदपत्रांतील त्रुटींमुळे प्रांताधिकाऱ्यांनी रद्द ठरवला. याच मुद्द्यावरून आमदार रघुवंशी यांनी भाजपवर थेट निशाणा साधला.

रघुवंशी म्हणाले की, नंदुरबार शहरात तब्बल 1 लाख 10 हजार मतदार आहेत. एवढ्या मतदारांमध्ये स्वीकृत नगरसेवकपदासाठी भाजपला एकही लायक आणि पात्र माणूस मिळू नये, याची मला लाज वाटते. योग्य उमेदवार शोधण्यासाठी भाजपने इतरांचे मार्गदर्शन घ्यायला पाहिजे होते, असा खोचक टोलाही त्यांनी लगावला. रघुवंशी यांच्या याच टीकेवरून महायुतीत वाद उफाळून आला आहे आणि भाजप चांगलीच भडकली आहे.

हा वाद काही एकटा नाही. गेल्या काही महिन्यांपासून भाजप आणि शिंदे गटात अंतर्गत वाद सुरू असल्याची चर्चा आहे. गेल्या आठवड्यात विधानपरिषदेच्या पाच जागांपैकी फक्त दोन जागांवर महायुतीचे उमेदवार निवडून आले, तर तीन जागांवर महाविकास आघाडीचे उमेदवार जिंकले. या पराभवाचे खापर भाजपने शिंदे गटावर फोडले होते. तो वाद शांत होण्याआधीच आता नंदुरबारमधून नव्या वादाची ठिणगी पडली आहे.

दरम्यान, नंदुरबार जिल्ह्यात येणाऱ्या जिल्हा परिषद निवडणुकीच्या पार्श्वभूमीवर महायुतीतील तिन्ही प्रमुख पक्षांनी, म्हणजे भाजप, शिवसेना (शिंदे गट) आणि राष्ट्रवादी काँग्रेस (अजित पवार गट) यांनी स्वबळावर लढण्याची तयारी दाखवली आहे. निवडणुकीआधीच घटक पक्षांनी एकमेकांविरोधात दंड थोपटल्यामुळे खान्देशातील राजकीय वर्तुळात जोरदार चर्चा सुरू आहे. निवडणुकीआधीच राजकीय संघर्षाला तीव्र सुरुवात झाली आहे.

महायुती म्हणून एकत्र लढण्याऐवजी तिन्ही पक्षांचे स्थानिक नेते आपापल्या पक्षसंघटनेला बळ देण्यासाठी स्वबळावर ताकद आजमावण्याच्या तयारीत आहेत. त्यामुळे जिल्ह्यात मैत्रीपूर्ण लढतींऐवजी तिरंगी किंवा चौकोनी लढती होण्याची शक्यता वाढली आहे.

भाजपच्या स्थानिक नेत्यांनी मात्र ठाम विश्वास व्यक्त केला आहे. जिल्ह्यात मागच्या काळात पक्षाच्या माध्यमातून आणि शासनाच्या सहकार्याने जी विकासकामे झाली, त्या जोरावर आपण स्वबळावर बहुमत मिळवू, असे ते सांगत आहेत. दुसरीकडे शिवसेना आणि राष्ट्रवादीनेही आपल्या पारंपरिक मतदारसंघांवरची पकड मजबूत करण्यासाठी स्वतंत्र रणनीती आखायला सुरुवात केली आहे.