18 सप्टेंबरला राज्यात कुठेही जोरदार पावसाचा इशारा नाही, मराठवाडा-विदर्भात तूट कायम

राज्यभरात सध्या मान्सून कमकुवत झाल्याचं चित्र दिसतंय. अनेक भागांत पावसानं मोठी ओढ दिली असून, कुठं कुठं हलक्या सरी पडत असल्या तरी सगळीकडे पाऊस होत नसल्यानं पावसाची तूट अजूनही कायम आहे. 18 सप्टेंबर रोजी राज्यातल्या कोणत्याही भागासाठी जोरदार पावसाचा इशारा देण्यात आलेला नाही, त्यामुळे बहुतांश जिल्ह्यांत पाऊस उघडीपच राहणार अशी शक्यता आहे.

कोकणात गेल्या काही दिवसांपासून पावसानं विश्रांती घेतली असून सध्या तिथं कोणताही अलर्ट नाही. काही ठिकाणी हलक्या सरी पडू शकतात, पण सगळीकडे किंवा मुसळधार पाऊस पडण्याची शक्यता कमीच आहे. त्यामुळं कोकणातल्या काही भागांत पावसाची तूट तशीच राहण्याची शक्यता आहे.

उत्तर महाराष्ट्रात मात्र थोडं वेगळं चित्र आहे. धुळे, नंदुरबार आणि नाशिक जिल्ह्यांतल्या काही भागांत हलक्या ते मध्यम सरी कोसळू शकतात, नाशिकच्या घाट भागातही पावसाची शक्यता वर्तवण्यात आलीय. जळगाव जिल्ह्यात मात्र हवामान मुख्यतः कोरडंच राहील असा अंदाज आहे. पुढच्या दोन-तीन दिवसांत उत्तर महाराष्ट्रातल्या हवामानात काहीसा बदल होऊ शकतो.

पुणे, सातारा, सांगली आणि कोल्हापूर जिल्ह्यांतही काही ठिकाणी हलक्या सरींचा अंदाज आहे. पुणे घाटमाथा, सातारा आणि कोल्हापूरच्या घाट परिसरात हलका ते मध्यम पाऊस आणि गडगडाटासह सरी पडू शकतात. पण बहुतांश भागात सध्या ढगाळ वातावरणासोबत उकाडा आणि दमटपणा जाणवतोय. दोन दिवसांनंतर या भागातल्या हवामानात पुन्हा बदल होण्याची शक्यता आहे.

मराठवाड्यातली परिस्थिती जास्त चिंताजनक आहे. छत्रपती संभाजीनगर, जालना आणि बीडमध्ये हवामान बहुतांशी कोरडं राहणार आहे, तर हिंगोली, नांदेड, लातूर, धाराशिव आणि परभणीत काही ठिकाणी हलक्या ते मध्यम सरींचा अंदाज आहे. पण प्रत्यक्षात अनेक भागांत पावसानं दांडी मारल्यानं तूट कायम असून, त्यामुळं खरीप पिकांबद्दल आणि शेतकऱ्यांच्या चिंतेत भरच पडलीय.

विदर्भातही पावसाचा जोर कमी झालाय. अकोला, अमरावती, बुलढाणा, भंडारा, चंद्रपूर, गडचिरोली, गोंदिया, नागपूर, वर्धा आणि यवतमाळ या जिल्ह्यांसाठी सध्या कोणताही पावसाचा अलर्ट नाही. पुढचे काही दिवस हवामान कोरडंच राहण्याची शक्यता असून, अनेक भागांत पावसाची तूट जाणवतेय, तर काही ठिकाणी उन्हाचा चटकाही जाणवतोय.

एकंदरीत 18 सप्टेंबरला राज्यात कुठंही पावसाचा अलर्ट नसल्यानं उघडीप कायम राहणार आहे. काही जिल्ह्यांत स्थानिक पातळीवर हलक्या सरी पडू शकतात, पण मोठ्या पावसाची शक्यता सध्या तरी कमी आहे. मान्सून परतीच्या वाटेवर असताना पुढच्या काही दिवसांत हवामानात काय बदल होतात, याकडं सगळ्यांचं लक्ष लागलंय. विशेषतः मराठवाडा आणि विदर्भातली पावसाची तूट भरून निघणार का, हा प्रश्न शेतकऱ्यांसाठी महत्त्वाचा ठरणार आहे.

पुढच्या दहा दिवसांतल्या तापमानाच्या अंदाजानुसार, 19 ते 28 सप्टेंबर दरम्यान कमाल तापमान 32 ते 33 अंश सेल्सियस आणि किमान तापमान 25 ते 27 अंश सेल्सियस दरम्यान राहण्याची शक्यता आहे.