डिफेंडरसारखा लूक, 173 किमी रेंज देणारी Jetour T2 फेसलिफ्ट SUV लाँच, किंमत जाणून घ्या
चीनमध्ये लाँच झालेली नवी Jetour T2 फेसलिफ्ट SUV लवकरच भारतात JSW Combat या नावाने येणार आहे.
एसयूव्ही घेणाऱ्यांसाठी एक महत्त्वाची बातमी समोर आली आहे. Land Rover Defender सारखा रुबाबदार आणि मस्क्युलर लूक असलेली नवी Jetour T2 फेसलिफ्ट एसयूव्ही चीनमध्ये अधिकृतपणे लाँच झाली आहे. याच गाडीवर आधारित JSW Combat ही गाडी पुढच्या काळात भारतात येणार असल्यामुळे भारतीय बाजारातही या मॉडेलची चर्चा जोरात सुरू आहे.
जुन्या मॉडेलच्या तुलनेत नव्या फेसलिफ्टचं डिझाईन जास्त रिफाइंड आणि मॉडर्न झालं आहे. समोरच्या बाजूला आधीच्या चौकोनी हेडलाईट्सऐवजी आता गोल आकाराच्या हेडलाईट्स दिल्या आहेत. ग्रिलवर आधी असलेली मोठी 'JETOUR' बॅजिंग आता बोनटवर हलवण्यात आली असून, दोन्ही हेडलाईट्सना जोडणारी एक LED स्ट्रिप संपूर्ण ग्रिलवर दिली आहे.
बंपरच्या डिझाईनमध्येही बदल झाला असून आधीचा रफ अँड टफ बंपर जाऊन आता सीमलेस, बॉडी-कलर्ड बंपर आला आहे. साईड प्रोफाईलमध्ये बॉडी-कलर्ड व्हील आर्च्स देण्यात आले आहेत. मागच्या बाजूला 3D स्टाईलमधले फोर-पॉइंट टेललाईट्स, नवा रिअर स्पॉयलर आणि स्मूथ डी-पिलर ट्रिममुळे गाडीला प्रीमियम लूक मिळतो आहे.
केबिनमध्येही मोठे बदल केले आहेत. आतलं डिझाईन क्लिन आणि मॉडर्न ठेवलं असून डॅशबोर्डवर दोन्ही बाजूला ड्युअल व्हर्टिकल एसी व्हेंट्स दिले आहेत. सेंटर कन्सोलवर Qi वायरलेस चार्जिंगसह ड्युअल स्मार्टफोन होल्डर मिळतात. गाडीत 15.6 इंचाची मोठी टचस्क्रीन इन्फोटेनमेंट सिस्टीम आणि 10.25 इंचाचा डिजिटल इन्स्ट्रुमेंट क्लस्टर आहे. प्रवाशांसाठी 10 वे पॉवर एडजस्टेबल सीट आणि 8 पॉईंट मसाज फंक्शनसारखी लक्झरी फीचर्स दिली आहेत, तर 23 स्पीकर सराऊंड साऊंड सिस्टीमही या गाडीत मिळते.
इंजिनबाबत बोलायचं झालं तर Jetour T2 फेसलिफ्ट पेट्रोल (ICE) आणि प्लग-इन हायब्रिड (PHEV) अशा दोन्ही व्हर्जनमध्ये आली आहे. बेस पेट्रोल इंजिन 1.5-लिटर टर्बो असून त्यात 184 PS पॉवर आणि 290 Nm टॉर्क मिळतो, सोबत 7-स्पीड ड्युअल क्लच ट्रान्समिशन आहे. जास्त पॉवरफुल पर्यायात 2.0-लिटर पेट्रोल इंजिन असून त्यातून 254 PS पॉवर आणि 390 Nm टॉर्क मिळतो, सोबत AWD म्हणजेच ऑल-व्हील ड्राईव्ह सिस्टीम दिली आहे. PHEV हायब्रिड व्हर्जनमध्ये 1.5-लिटर टर्बो पेट्रोल इंजिनसोबत मोठा बॅटरी पॅक असून, एका चार्जवर ही गाडी सुमारे 108 किमी ते 173 किमी पर्यंतची प्युअर इलेक्ट्रिक रेंज देते.
किंमतीबद्दल सांगायचं तर चीनच्या बाजारात पेट्रोल मॉडेलची किंमत 149,900 Yuan आहे, जी भारतीय चलनात साधारण 21.4 लाख रुपयांपासून सुरू होते. हायब्रिड मॉडेलची किंमत 22.85 लाख रुपयांपासून पुढे जाते. भारतात याच गाडीवर आधारित JSW Combat ही एसयूव्ही साधारणपणे 30 ते 50 लाख रुपयांच्या दरम्यान बाजारात येण्याचा अंदाज वर्तवला जात आहे. ही गाडी भारतात आल्यास एसयूव्ही बाजारात जोरदार स्पर्धा पाहायला मिळण्याची शक्यता आहे.
