शेतकऱ्यांबद्दलच्या वक्तव्यावरून गायकवाडांवर कारवाई करा, वडेट्टीवार यांची मागणी

शेतकऱ्यांनी आत्महत्या केली तर त्याच्या मयताला किंवा अंत्यसंस्काराला कोणीही जाऊ नये, असे वादग्रस्त वक्तव्य बुलढाण्याचे संजय गायकवाड यांनी केले आहे. "त्यांची बॉडी जनावरं खातील, तेव्हा शेतकऱ्यांच्या लक्षात येईल आणि ते आत्महत्या करणार नाहीत," असे ते म्हणाल्याचे सांगितले जाते. या वक्तव्यावर उपमुख्यमंत्री एकनाथ शिंदे आणि शिवसेना नाराज असल्याची माहिती समोर येत असतानाच काँग्रेस नेते विजय वडेट्टीवार यांनी जोरदार प्रतिक्रिया दिली.

वडेट्टीवार यांनी सरकार आणि मुख्यमंत्र्यांना उद्देशून सांगितले की, संकटात सापडलेल्या दुष्काळग्रस्त शेतकऱ्यांचा अवमान आमदारांनी केला आहे. हा शेतकऱ्यांचा खूप मोठा अपमान असून तो सरकारकडून झाल्यासारखे आम्हाला वाटते, असे ते म्हणाले. कारवाई झाली नाही तर सरकार या विधानाशी सहमत आहे का, असा सवाल त्यांनी केला. सरकार सहमत नसेल तर कारवाई करावी, आणि शेतकऱ्यांच्या डोळ्यांतले अश्रू दिसत असतील तर गायकवाड यांच्यावर त्वरित कारवाई करावी, अशी मागणी त्यांनी केली. सरकारविरोधात असंतोष निर्माण झाला आहे, असेही ते म्हणाले.

शेतकऱ्यांची बदनामी करणाऱ्या व्यक्तीला आमदार म्हणून राहण्याचा अधिकार नाही, असे वडेट्टीवार म्हणाले. ज्या पक्षात ते आहेत, त्या पक्षाने त्यांना निलंबित करावे आणि सरकारने डिसेंबरच्या अधिवेशनात प्रस्ताव आणून त्यांचे निलंबन करावे, असे त्यांचे म्हणणे आहे. ही पहिली वेळ नाही, यापूर्वीही गायकवाड अनेकदा खालच्या भाषेत बोलले आहेत आणि त्यांच्या शब्दांना मर्यादा नाही, असे सांगत अशांची जीभ छाटली पाहिजे, अशी जहाल प्रतिक्रिया वडेट्टीवार यांनी दिली.

रविंद्र धंगेकर यांनी राज्यात एकनाथ शिंदे आणि उद्धव ठाकरे एकत्र येऊ शकतात, हे राजकारण आहे, असे म्हटले होते. त्याबद्दल विचारल्यावर वडेट्टीवार म्हणाले की, ते मला माहीत नाही, धंगेकर यांना त्यांच्या अनुभवावरून माहीत असेल. गाडी थांबवून त्यांना सिग्नल मिळालेला आहे, असा चिमटाही त्यांनी काढला.

महाराष्ट्रात दुष्काळाची परिस्थिती आहे आणि पिण्याच्या पाण्याचा प्रश्न उभा राहणार आहे, असे सांगून वडेट्टीवार म्हणाले की, आजपर्यंत कधी टँकरने पाणी द्यावे लागले नव्हते, आता ती वेळ आली आहे. पिंपरी-चिंचवड महानगरपालिकेतील अधिकारी आणि कर्मचाऱ्यांनी एका बांधकामाला परवानगी दिली आहे का, असा प्रश्न विचारून त्यांनी म्हटले की, या बांधकामाला मोठ्या प्रमाणात पाणी लागणार आहे. ही परवानगी रद्द झाली पाहिजे, कोट्यवधी रुपये घेऊन व्यवहार झाल्यामुळे परवानगी मिळाली, असे ते म्हणाले. चंद्रपूरमधील कॉल वॉशरीजवर बंदी घातली पाहिजे, तसेच लवासा प्रकल्पाला मोठ्या प्रमाणात पाणी लागते, असेही ते म्हणाले.

डेटा सेंटरबद्दल वडेट्टीवार म्हणाले की, ६६ टक्के डेटा सेंटर महाराष्ट्रात आहेत आणि त्यांना भरपूर पाणी लागते. सरकारने यावर पुन्हा विचार करावा आणि यापुढे कुठलेही नवे डेटा सेंटर होणार नाही याची काळजी घ्यावी, असे ते म्हणाले. अदानी आणि अंबानी यांनी इथे डेटा सेंटर उभारली आहेत, जूनपर्यंत पाण्याची व्यवस्था करावी लागणार आहे, असे सांगून त्यांनी डेटा सेंटरवर बंदी आणण्याची मागणी केली. या संदर्भात मुख्यमंत्र्यांना पत्र पाठवून हा गंभीर विषय त्यांच्या निदर्शनास आणून देणार असल्याचे त्यांनी सांगितले.

शालार्थ आयडी घोटाळ्याबद्दल ते म्हणाले की, मध्य प्रदेशातील भरती घोटाळ्यापेक्षा मोठा घोटाळा महाराष्ट्रात झाला आहे आणि दहा कोटींचा व्यवहार पुढे आला आहे. मुंबई, पुणे, नाशिक अशा सर्वत्र मोठा भ्रष्टाचार झाल्याचे वडेट्टीवार यांचे म्हणणे आहे. हिंदी विकास विद्यालयातील भाजप तालुकाध्यक्षांनी मोठा घोटाळा केला असून सरकार त्यांना वाचवत आहे, असा आरोप त्यांनी केला. यवतमाळ जिल्ह्यातील पांढरकवडा येथील भाजप तालुकाध्यक्षांनी स्वतःच्या पत्नीची मुख्याध्यापकपदी नियुक्ती केली आणि १२ कर्मचाऱ्यांची नियुक्ती बोगस पद्धतीने केली, असेही ते म्हणाले. याची चौकशी झाली पाहिजे, हा विषय विधानसभेतही येईल, असे त्यांनी सांगितले.

जंगलतोडीबद्दल वडेट्टीवार म्हणाले की, भीमाशंकरनंतर रायगडमध्ये झाडांची कत्तल होणार आहे आणि ग्रामपंचायतीने कुठेही ठराव केलेला नाही. संभाजीनगरमधील अजिंठा परिसरात सरकारने जंगल साफ करण्याचे काम सुरू केले आहे, असे ते म्हणाले. पर्यावरणाचे नुकसान होत आहे, दुष्काळाची परिस्थिती सतत निर्माण होईल आणि पुढील पिढीचे नुकसान होईल, त्यामुळे जंगलतोड न करता विकास केला पाहिजे, असे त्यांनी सुनावले.