किस करायला गेला आणि कोब्राने दाखवला ठेंगा; व्हिडिओ पाहून नेटकरी हसून बेजार

सोशल मीडियावर प्राण्यांचे अनेक थरारक व्हिडिओ शेअर होत असतात. कुठे प्राण्यांच्या शिकारीची दृश्ये दिसतात, तर कुठे मालक आणि प्राण्याचे घट्ट नाते दाखवण्याचा प्रयत्न केलेला असतो. आता मात्र इंटरनेटवर एक वेगळाच आणि आश्चर्यचकित करणारा व्हिडिओ शेअर झाला आहे.

या व्हिडिओमध्ये एक तरुण किंग कोब्रासोबत मस्ती करताना दिसतो. तो या सापाला पुन्हा पुन्हा किस करण्याचा प्रयत्न करतो. हे खरं आहे, आणि त्याचा व्हिडिओ सोशल मीडियावर शेअर झाला आहे. पण तो जवळ गेला की प्रत्येक वेळी कोब्रा त्याला रिजेक्ट करतो आणि "नाही म्हणालो ना रे बाबा" असं म्हणत असल्यासारखी आपली मान दुसरीकडे वळवतो.

व्हायरल व्हिडिओतला तरुण म्हणजे प्रसिद्ध इंडोनेशियन प्राणी प्रशिक्षक रिम्बा पेटुआलंग आहे. तो एका महाकाय किंग कोब्रासोबत काही साहसी कसरती करताना दिसतो. एरवी किंग कोब्रा दिसला की लोक त्याच्यापासून लांब पळतात. या व्हिडिओत मात्र उलटंच चित्र दिसलं. प्रशिक्षक कोब्राला किस करायला त्याच्याजवळ जात होता आणि बिचारा कोब्रा मान वळवून त्याच्यापासून दूर जायचा प्रयत्न करत होता.

प्रशिक्षक अनेकदा कोब्राच्या फणाजवळ जातो, पण प्रत्येक वेळी कोब्रा त्याच्यापासून दूर सरकतो. हे दृश्य इतकं मजेशीर वाटतं की अनेकांना पाहताना हसू आवरत नाही. किंग कोब्राकडून तो रिजेक्ट झाला, म्हणून सोशल मीडियावर त्याची खिल्ली उडवली जात आहे. तरुणाचा झालेला पोपट आणि कोब्राची रिएक्शन चांगलीच चर्चेत आहे. या व्हिडिओने यूजर्सच्या चेहऱ्यावर हसू आणलं आहे. काही जणांनी मात्र त्याच्या साहसाचं कौतुकही केलं आहे, तर या धोकादायक स्टंटवरही चर्चा सुरू आहे.

हा व्हिडिओ @rimbapetualang_real नावाच्या इंस्टाग्राम अकाऊंटवरून शेअर करण्यात आला आहे. तो सोशल मीडियावर चांगलाच व्हायरल होत असून अनेक यूजर्सनी दृश्यांवर आपलं मत मांडलं आहे. एका यूजरने म्हटलं, "कोब्राला वाटलं असेल की हा मला गिळून टाकेल". दुसऱ्या यूजरने लिहिलं, "या माणसावर इतके वाईट दिवस आले का की तो किंग कोब्राला किस करू पाहतोय?". आणखी एका यूजरने लिहिलं, "चुकून कोब्राने फणा मारला असता तर निकाल काहीतरी वेगळाच दिसला असता".

या घटनेची माहिती सोशल मीडियावर शेअर झालेल्या पोस्ट आणि व्हिडिओवर आधारित आहे. त्यातील सर्व दाव्यांची स्वतंत्रपणे पडताळणी झाल्याचं निश्चितपणे सांगता येत नाही.