कर्जतच्या साय डोंगरावर राज ठाकरेंची पाहणी, जलविद्युत प्रकल्पाविरोधात आज संध्याकाळी सभा

रायगडच्या कर्जत येथे प्रस्तावित असलेल्या जलविद्युत प्रकल्पाविरोधात मनसे अध्यक्ष राज ठाकरे मैदानात उतरले आहेत. त्यांनी आक्रमक भूमिका घेतली आहे. आज संध्याकाळी कर्जतमध्ये त्यांची मोठी सभा होणार असून, पर्यावरणप्रेमींनी तिथे यावे, असे आवाहन त्यांनी केले आहे. हे सरकार हा प्रकल्प कसा बंधनकारक करते ते बघा, असा इशारा राज ठाकरे यांनी आपल्या शैलीत दिला आहे.

बुधवारी राज ठाकरे यांनी कर्जतचा दौरा केला. सह्याद्रीचा भाग असलेल्या साय डोंगराची त्यांनी पाहणी केली. काही दिवसांपूर्वी तिथल्या ग्रामस्थांनी राज ठाकरे यांची भेट घेऊन त्यांना येण्याची विनंती केली होती. त्या विनंतीला मान देऊन त्यांनी पाहणी दौरा केला आणि संध्याकाळी तिथे त्यांची सभाही होणार आहे.

या दौऱ्यात सकाळच्या सत्रात राज ठाकरे यांनी स्थानिकांशी चर्चा केली. त्यांच्या भावना जाणून घेतल्या आणि संध्याकाळच्या सभेला पर्यावरणप्रेमींनी यावे, असे आवाहन केले. सभेला संध्याकाळी या, हा प्रकल्प कसा बंधनकारक करतात ते बघतोच, असा विश्वास त्यांनी स्थानिकांना दिला.

कर्जत-भीमाशंकर भागातील झाडांच्या कत्तलीचे काही फोटो आणि व्हिडिओ सोशल मीडियावर व्हायरल झाले होते. त्यानंतर नागरिक आणि पर्यावरणप्रेमींमध्ये संताप उसळला होता. एका खासगी कंपनीसाठी शेकडो वर्षे जुनी झाडे कापण्याचा आदेश केंद्र आणि राज्य सरकारने दिल्याने जनआक्रोश उमटला होता. राज्यात दुष्काळाचे सावट असताना असे प्रकल्प राबवून पर्यावरणाची हानी करू नये, अशी विनंती त्यांच्या वतीने करण्यात येत होती.

हा प्रकल्प गुजरात राज्यातील टॉरेंट पॉवर कंपनीचा प्रस्तावित जलविद्युत ऊर्जा साठवण प्रकल्प आहे. तो साई डोंगर परिसरात उभारला जाणार आहे. अंदाजे 13 हजार 500 कोटी रुपये खर्च आणि 3 हजार मेगावॅट क्षमता असलेल्या या प्रकल्पासाठी तीन लाखांहून अधिक झाडे तोडली जाणार आहेत. याचे गंभीर पर्यावरणीय परिणाम होऊ शकतात आणि पक्षी व वन्यजीवांचा नैसर्गिक अधिवास नष्ट होऊ शकतो, अशी भीती व्यक्त केली जात आहे.

डोंगर उतारावरील मृदा संवर्धन, नैसर्गिक जलप्रवाह, पारंपरिक शेती आणि पर्यटन यांवरही परिणाम होण्याची शक्यता आहे. विकासाच्या नावाखाली कर्जत-भीमाशंकरची नैसर्गिक संसाधने का नष्ट केली जात आहेत, असा प्रश्न पर्यावरणवाद्यांनी उपस्थित केला आहे.

आता राज ठाकरे आपल्या ठाकरी शैलीत सरकारचा कसा समाचार घेतात, याकडे लक्ष लागले आहे. अमित ठाकरे हेही त्यांच्यासोबत आहेत. राज ठाकरे यांचे चुलत बंधू आणि आमदार आदित्य ठाकरे यांनी सोमवारी या ठिकाणाचा दौरा केला होता. पर्यावरणाचा ऱ्हास केल्यास राज्य सरकारची आमच्याशी गाठ आहे, असा इशारा त्यांनी दिला होता.

ठाकरे बंधूंसह महायुतीतील काही स्थानिक आमदारांनीही या प्रकल्पाला विरोध दर्शवण्यास सुरुवात केली आहे. आता सरकार यावर काय निर्णय घेते, हे पाहणे उत्सुकतेचे ठरणार आहे.