कॅनडात उड्डाण प्रशिक्षणादरम्यान विमान कोसळून दोन भारतीय विद्यार्थ्यांचा मृत्यू
व्यावसायिक पायलट होण्याचं स्वप्न घेऊन कॅनडात गेलेल्या तामिळनाडू आणि पुदुचेरीच्या दोन तरुणांचा उड्डाण प्रशिक्षणादरम्यान अपघाती मृत्यू झाला. भारतीय दूतावासाकडून कुटुंबांना मदत केली जात आहे.
कॅनडामध्ये विमान उड्डाणाचं प्रशिक्षण घेत असताना झालेल्या एका भीषण अपघातात दोन भारतीय विद्यार्थ्यांचा जागीच मृत्यू झाला. मनोज शिवकुमार आणि श्रीसरन तिरुज्ञानसंबंधम अशी या दोघांची नावं असून ते अनुक्रमे तामिळनाडू आणि पुदुचेरीचे रहिवासी होते. परदेशात जाऊन कमर्शियल पायलट व्हायचं स्वप्न पाहणाऱ्या या दोन तरुणांचं असं अचानक जाणं त्यांच्या गावी आणि भारतीय हवाई क्षेत्रात मोठा धक्का देऊन गेलं आहे.
व्हँकुव्हरमधल्या भारतीय वाणिज्य दूतावासानं सोशल मीडियावर अधिकृत पोस्ट टाकून या दुःखद घटनेला दुजोरा दिला आणि तीव्र शोक व्यक्त केला. दूतावासानं आपल्या निवेदनात म्हटलंय, "कॅनडामध्ये विमान प्रशिक्षण घेत असताना एका भीषण अपघातात प्राण गमावलेल्या तामिळनाडू व पुदुचेरीच्या मनोज शिवकुमार आणि श्रीसरन तिरुज्ञानसंबंधम या दोन भारतीय विद्यार्थ्यांच्या निधनाबद्दल आम्ही तीव्र शोक व्यक्त करतो. या कठीण प्रसंगात आमच्या संवेदना त्यांच्या शोकाकुल कुटुंबियांसोबत आहेत. मृतदेह भारतात त्यांच्या मूळ गावी सुरक्षितपणे पोहोचवण्यासाठी सर्व प्रकारची दूतावासाकडून मदत दिली जात आहे."
मिळालेल्या माहितीनुसार, हे दोघं विद्यार्थी कमर्शियल पायलट परवान्यासाठी लागणारे उड्डाणाचे तास पूर्ण करत होते. त्यांनी 'हार्वेस एअर' या फ्लाइंग ट्रेनिंग स्कूलकडून सेसना १७२ हे छोटं विमान भाड्यानं घेतलं होतं. दोघेही परवानाधारक पायलट सस्कॅचेवानमधल्या रेजिना इथून कार्लाइल मार्गे मॅनिटोबातल्या स्टाइनबॅककडे रात्री क्रॉस-कंट्री उड्डाण करत होते. मात्र ठरलेल्या वेळेप्रमाणे सकाळी १०:३० वाजेपर्यंत विमान गंतव्यस्थानी न पोहोचल्यानं कॅनडाच्या ट्रान्सपोर्टेशन सेफ्टी बोर्डाला (TSB) लगेच कळवण्यात आलं.
यानंतर कॅनेडियन शोध आणि बचाव पथकांनी तातडीनं मोठी मोहीम हाती घेतली. ट्रेंटनमधल्या संयुक्त बचाव समन्वय केंद्राच्या (JRCC) नेतृत्वाखाली ४३५ स्क्वाड्रनच्या सीसी-१३८ हर्क्युलस विमानानं सस्कॅचेवानमधल्या किस्बे गावाजवळ विमानाचा ढिगारा शोधून काढला. सायंकाळी सुमारे ६ वाजता शोध पथकानं पॅराशूटच्या मदतीनं घटनास्थळी उतरून पाहणी केली, तेव्हा विमानातले दोन्ही भारतीय प्रवासी मृतावस्थेत आढळले. अपघात इतका भीषण होता की विमानाचा पूर्ण चक्काचूर झाला होता.
'हार्वेस एअर' या फ्लाइंग स्कूलशी संबंधित गेल्या काही महिन्यांतला हा तिसरा मोठा अपघात असल्याचं समोर आलंय. यापूर्वी जानेवारीत इंजिन सुरू करताना प्रोपेलर लागून एक ट्रेनर गंभीर जखमी झाला होता, तर जुलैत एका ट्रेनिंग फ्लाइटदरम्यान विमान कोसळून दोन ट्रेनी पायलटचा मृत्यू झाला होता. एकाच फ्लाइंग ट्रेनिंग स्कूलमध्ये वारंवार होणाऱ्या या अपघातांमुळे कॅनडात शिकणाऱ्या भारतीय विद्यार्थ्यांच्या सुरक्षेचा प्रश्न ऐरणीवर आलाय.
या अपघाताचा सखोल तपास सध्या रॉयल कॅनेडियन माउंटेड पोलीस (RCMP) आणि ट्रान्सपोर्टेशन सेफ्टी बोर्डाकडे सोपवण्यात आलाय. विमान तांत्रिक बिघाडामुळे कोसळलं की हवामानाच्या प्रतिकूल स्थितीमुळे, याचा शोध स्थानिक प्रशासन घेतंय. भारतीय दूतावास स्थानिक अधिकारी आणि मृत विद्यार्थ्यांच्या कुटुंबियांच्या सतत संपर्कात असून, सगळी कायदेशीर प्रक्रिया पूर्ण करून लवकरात लवकर पार्थिव भारतात आणण्यासाठी प्रयत्न सुरू आहेत.
