नवीन Maruti WagonR फेसलिफ्ट टेस्टिंगमध्ये, CNG टँकसह बूट स्पेस वाढणार
मारुती सुझुकीने वॅगन आरच्या नवीन फेसलिफ्ट मॉडेलचे रस्त्यावर टेस्टिंग सुरू केले असून यात इंजिन आणि डिझाईनमध्ये बदल दिसतायत.
फॅमिली कार सेगमेंटमध्ये नेहमी पुढे असणाऱ्या मारुती सुझुकी वॅगन आरचे नवीन फेसलिफ्ट मॉडेल लवकरच रस्त्यावर येणार आहे. कंपनीने या मॉडेलचे टेस्टिंग सुरू केले असून 2019 पासून विक्रीला असलेल्या थर्ड जनरेशन वॅगन आर हॅचबॅकमधला हा आतापर्यंतचा सगळ्यात मोठा बदल असू शकतो. यात फक्त बाहेरचा लूक नाही तर इंजिनमध्येही बदल होणार आहेत. नवीन गाडीत चांगले फीचर्स आणि जास्त मायलेज मिळेल असं म्हटलं जातंय, त्यासोबतच आतला आणि बाहेरचा लूकही सुधारलेला असेल.
सध्या मार्केटमध्ये असलेली वॅगनआर ही थर्ड जनरेशन फेसलिफ्ट गाडी आहे, जी फेब्रुवारी 2022 मध्ये लाँच झाली होती. तेव्हापासून या गाडीच्या विक्रीत चांगलीच वाढ झाली आणि ती वारंवार देशातली नंबर वन कार ठरली आहे. शिवाय 85 टक्के इथेनॉलवर चालणारी ही देशातली पहिली कार आहे. आता कंपनीने याच गाडीच्या नव्या फेसलिफ्ट व्हर्जनचं टेस्टिंग सुरू केलंय आणि टेस्टिंगच्या वेळी गाडी पूर्णपणे कव्हर करून ठेवलेली दिसली.
बाहेरच्या लूकमध्ये फार मोठे बदल नाहीत, पण काही हलके अपडेट्स नक्की दिसतील. पुढच्या बाजूला नवीन एअर इनलेट्स, हॅलोजन हेडलाईटसाठी नवी डिटेलिंग, बदललेली फ्रंट ग्रिल आणि स्मूथ बंपर फिनिश मिळणार आहे. मागच्या बाजूला बंपरमध्ये थोडे बदल झाले असून जुन्या मॉडेलमधले आडवे रिफ्लेक्टर्स जाऊन आता उभे रिफ्लेक्टर्स दिसतील. गाडीचा एकूण आकार आणि टेल-लॅम्पचं डिझाईन मात्र जुन्या मॉडेलसारखंच बऱ्यापैकी कायम ठेवलेलं आहे.
या फेसलिफ्ट मॉडेलचं सगळ्यात मोठं फीचर म्हणजे याचा CNG सेटअप. टेस्टिंगमध्ये दिसलेल्या गाडीत अंडरबॉडी-माउंटेड CNG टँक दिसला, म्हणजे सिलिंडर गाडीच्या खालच्या बाजूला बसवलेला आहे. ब्रेझा फेसलिफ्टमध्ये जसं झालं तसंच इथेही सिलिंडर खाली बसवल्यामुळे बूटमध्ये आता जास्त जागा मिळणार आहे, त्यामुळे ग्राहकांना सामान ठेवायला मोठा बूट स्पेस मिळेल.
इंजिनबाबत बोलायचं झालं तर बेस आणि मिड-स्पेक व्हेरियंटमध्ये आधीसारखेच 1.0 लिटर 3 सिलेंडर पेट्रोल आणि CNG पर्याय कायम राहू शकतात. मात्र टॉप-स्पेक व्हेरियंटमध्ये मोठा बदल होण्याची शक्यता आहे, इथे जुनं 1.2 लिटर के-सीरिज (K12N) इंजिन काढून त्याजागी नवीन 3 सिलेंडर झेड-सीरिज (Z12E) इंजिन दिलं जाऊ शकतं. मारुती स्विफ्ट, डिझायर आणि बलेनोसारख्या गाड्यांमध्ये आधीच के-सीरिजऐवजी झेड-सीरिज इंजिन वापरतेय, ज्यामुळे या गाड्यांचं मायलेज सुधारलंय. आता हाच बदल वॅगनआरमध्येही केला जाण्याची शक्यता वर्तवली जातेय.
