कॅनरा रोबेको AMCकडून विद्यार्थ्यांसाठी 'युवा शक्ती समृद्धी' गुंतवणूक शिक्षण उपक्रम

तरुण पिढीला आर्थिक साक्षर बनवून करिअरच्या सुरुवातीपासूनच योग्य पैशाचे निर्णय घेता यावेत, यासाठी कॅनरा रोबेको अॅसेट मॅनेजमेंट कंपनी लिमिटेड (Canara Robeco AMC) ने विद्यार्थ्यांसाठी खास गुंतवणूकदार शिक्षण उपक्रम सुरू केला आहे. या उपक्रमाचे नाव आहे 'युवा शक्ती समृद्धी'.

कंपनीने दिलेल्या माहितीनुसार, नोकरी किंवा व्यवसायातून कमाई सुरू करण्याआधीच विद्यार्थ्यांना बचत, गुंतवणूक आणि आर्थिक नियोजनाचे मूलभूत ज्ञान मिळावे, हा या उपक्रमामागचा मुख्य हेतू आहे. लहान वयातच शिस्तबद्ध गुंतवणुकीची सवय लागावी आणि त्यातून भविष्यासाठी मजबूत आर्थिक पाया तयार व्हावा, यावर या उपक्रमात भर दिला जाणार आहे.

या उपक्रमांतर्गत विविध शाळा-कॉलेजांमध्ये परस्परसंवादी वर्कशॉप आणि तज्ज्ञांची सत्रे घेतली जाणार आहेत. गुंतवणुकीशी संबंधित गोष्टी विद्यार्थ्यांना सोप्या भाषेत समजावून सांगण्याचा प्रयत्न केला जाईल. म्युच्युअल फंड, बचत आणि गुंतवणूक नियोजनाबाबत विद्यार्थ्यांमध्ये असलेले सामान्य गैरसमज दूर करण्यावर विशेष लक्ष दिले जाणार आहे. पुढे कमाई सुरू झाल्यावर आर्थिक उद्दिष्टे ठरवून त्यानुसार शिस्तीने गुंतवणूक कशी करायची, याचे प्राथमिक ज्ञानही यातून दिले जाईल.

कॅनरा रोबेको AMCचे व्यवस्थापकीय संचालक आणि मुख्य कार्यकारी अधिकारी रजनीश नरुला यांनी सांगितले की, आर्थिकदृष्ट्या जागरूक आणि जबाबदार पिढी घडवण्यासाठी तरुणांनी गुंतवणुकीचा प्रवास लवकर सुरू करावा, यासाठी त्यांना प्रोत्साहन देणे गरजेचे आहे. कमाई सुरू करण्याआधीच विद्यार्थ्यांनी गुंतवणूकदार शिक्षण घेतले, तर करिअरच्या सुरुवातीपासूनच योग्य आर्थिक निर्णय घेण्यास त्यांना मदत होईल, असे नरुला म्हणाले. 'युवा शक्ती समृद्धी'च्या माध्यमातून गुंतवणुकीच्या संकल्पना सोप्या करून विद्यार्थ्यांना भविष्यातील संपत्ती निर्मितीसाठी उपयुक्त माहिती देण्याचा कंपनीचा प्रयत्न असल्याचे त्यांनी सांगितले.

या उपक्रमात आर्थिक साक्षरतेबरोबरच '3S' म्हणजे Systematic Investment Plan (SIP), Systematic Transfer Plan (STP) आणि Systematic Withdrawal Plan (SWP) या तीन महत्त्वाच्या संकल्पनांचीही माहिती विद्यार्थ्यांना दिली जाणार आहे. कॅनरा रोबेको AMCचे चीफ बिझनेस ऑफिसर गौरव गोयल यांच्या म्हणण्यानुसार, 'सही सोच, सही सुरुवात, सही इन्व्हेस्टमेंट' या तीन सवयी तरुणांमध्ये रुजवणे हा उपक्रमाचा उद्देश आहे. आर्थिक उद्दिष्टांच्या नियोजनात SIP, STP आणि SWP कशा प्रकारे उपयोगी पडू शकतात, याबाबतही विद्यार्थ्यांमध्ये जागरूकता निर्माण केली जाणार आहे.

कॅनरा रोबेको AMCने हा कार्यक्रम देशभरातील शैक्षणिक संस्थांमध्ये पोहोचवण्याचा मानस व्यक्त केला आहे. नोकरी किंवा व्यवसायात पाऊल टाकण्याआधीच विद्यार्थ्यांना आर्थिक नियोजनाची ओळख करून देऊन, भविष्यात माहितीच्या आधारे गुंतवणुकीचे निर्णय घेण्यासाठी त्यांना तयार करणे हा यामागचा हेतू आहे.

यापूर्वीही कंपनीने गुंतवणूकदार शिक्षणासाठी 'निवेश बस यात्रा', '3S रॅप साँग' आणि महिलांसाठी 'स्त्री शक्ती समृद्धी' असे उपक्रम राबवले होते. या सगळ्या उपक्रमांमधून आर्थिक साक्षरता वाढवणे आणि माहितीवर आधारित गुंतवणुकीला प्रोत्साहन देणे हाच कंपनीचा प्रयत्न आहे.