जंगलाशेजारच्या गावांनी सावध राहावे, चिचपल्लीचे वनपरिक्षेत्र अधिकारी बोधे यांचे आवाहन

चंद्रपूर जिल्ह्यात माणूस आणि वन्यप्राणी यांच्यातील संघर्षाच्या घटना मोठ्या प्रमाणावर घडत आहेत. त्यामुळे जंगलाला लागून असलेल्या गावांतील नागरिकांनी विशेष खबरदारी घ्यावी, असे आवाहन चिचपल्लीचे वनपरिक्षेत्र अधिकारी सारंग बोधे यांनी केले आहे.

वन्यप्राण्यांच्या नैसर्गिक अधिवासात माणसाचा हस्तक्षेप वाढत आहे आणि दोघांचा संपर्कही वाढत आहे, त्यामुळे अशा घटना घडण्याची शक्यता निर्माण होत आहे. या पार्श्वभूमीवर नागरिकांनी सतर्क राहावे आणि वन विकास महामंडळ (एफ.डी.सी.एम.) व वन विभागाने दिलेल्या सूचना पाळाव्यात, असे बोधे यांनी सांगितले.

सूचना एकूण नऊ आहेत. पहिली, जंगलात विनाकारण जाऊ नये; वनक्षेत्रात जाणे गरजेचे असेल तर वन विभागाचे नियम आणि सूचना पाळाव्यात. दुसरी, शेतीची कामे करताना सावध राहावे. जंगलाशेजारच्या शेतात काम करताना आजूबाजूच्या परिसरावर सतत नजर ठेवावी आणि शक्यतो दिवसाच्या उजेडातच कामे आटोपावीत. तिसरी, एकट्याने जंगलात किंवा जंगलातून शेतात जाऊ नये. तसे जाणे किंवा जंगलालगतच्या भागात काम करणे गरजेचे असेल तर गटाने जावे.

चौथी, पहाटे आणि संध्याकाळी विशेष काळजी घ्यावी. या वेळी वन्यप्राण्यांची हालचाल जास्त असण्याची शक्यता असते, म्हणून विनाकारण बाहेर पडू नये. पाचवी, वन्यप्राणी दिसला तर सुरक्षित अंतर ठेवावे. त्याच्या जवळ जाणे, त्याला चिथावणी देणे, त्याचा पाठलाग करणे किंवा फोटो आणि व्हिडिओ काढण्यासाठी गर्दी करणे टाळावे. सहावी, वन्यप्राण्यांना आकर्षित करतील अशा गोष्टी टाळाव्यात. जंगलाजवळ अन्नपदार्थ किंवा कचरा उघड्यावर टाकू नये, तसेच पाळीव जनावरे सुरक्षित जागी बांधून त्यांची काळजी घ्यावी.

सातवी, लहान मुले आणि ज्येष्ठ नागरिकांची काळजी घ्यावी. त्यांना एकटे बाहेर पाठवू नये आणि जंगलालगतच्या भागात मुलांच्या हालचालींवर विशेष लक्ष ठेवावे. आठवी, वन्यप्राण्याच्या हालचालींची माहिती लगेच द्यावी. गावाजवळ किंवा शेतात प्राणी दिसला तर त्याच्या जवळ जाण्याचा प्रयत्न न करता एफ.डी.सी.एम. आणि वन विभागाला त्वरित कळवावे. नववी, वन्यप्राण्यांच्या हालचालींबद्दल अप्रमाणित माहिती किंवा भीती पसरवणारे संदेश सोशल मीडियावर पसरवू नयेत.

वन्यप्राणी दिसल्यास नागरिकांनी शांत राहावे, सुरक्षित अंतरावर जावे आणि प्राण्याला निघून जाण्यासाठी वाट मोकळी ठेवावी. प्राण्याला घेरणे, दगड मारणे, हाकलण्याचा प्रयत्न करणे किंवा गर्दी जमवणे यामुळे परिस्थिती आणखी धोकादायक होऊ शकते.

हा संघर्ष रोखण्यासाठी नागरिकांचे सहकार्य अत्यंत महत्त्वाचे आहे, असे वनपरिक्षेत्र अधिकारी सारंग बोधे यांनी कळविले आहे. स्वतःची आणि कुटुंबाची सुरक्षा सांभाळताना वन्यजीवांच्या संरक्षणासाठी एफ.डी.सी.एम. आणि वन विभागाला सहकार्य करावे, असेही त्यांनी म्हटले आहे.