itel A300C भारतात दाखल; ६००० mAh बॅटरी, १०,९९९ रुपये किंमत

स्मार्टफोन बनवणाऱ्या itel कंपनीने भारतीय बाजारात आपला नवा फोन itel A300C लॉन्च केला आहे. हा 4G स्मार्टफोन असून त्याची किंमत १०,९९९ रुपये ठेवण्यात आली आहे. रोजच्या वापरासाठी लागणारी मोठी बॅटरी, टिकाऊपणा आणि परवडणारी किंमत या तीन गोष्टींवर कंपनीने या फोनमध्ये खास लक्ष दिल्याचं म्हटलं आहे.

या फोनचं सगळ्यात मोठं वैशिष्ट्य म्हणजे त्याची ६०००mAh क्षमतेची बॅटरी. सोबतच फोनला १८W फास्ट चार्जिंगचाही सपोर्ट देण्यात आला आहे. त्यामुळे व्हिडिओ कॉलिंग, सोशल मीडिया, मनोरंजन असो किंवा रोजची इतर कामं, फोन जास्त वेळ वापरणाऱ्या लोकांना वारंवार चार्जरला लावण्याची गरज कमी भासू शकते, असं कंपनीचं म्हणणं आहे.

परफॉर्मन्ससाठी फोनमध्ये Unisoc T7100 हा ऑक्टा-कोर प्रोसेसर बसवण्यात आला आहे. कंपनीच्या माहितीनुसार यात १२GB पर्यंत इफेक्टिव्ह RAM मिळते. फोन Android 16 Go या ऑपरेटिंग सिस्टमवर चालतो. डिस्प्लेबद्दल बोलायचं झालं तर यात ६.५६ इंचाचा HD+ स्क्रीन असून तो ९०Hz रिफ्रेश रेटला सपोर्ट करतो. त्यामुळे WhatsApp, YouTube, सोशल मीडिया, UPI आणि QR पेमेंट तसेच शिक्षणासाठी वापरले जाणारे ॲप्स रोजच्या रोज सहज हाताळता येतील, असा उद्देश आहे.

फोटोग्राफीसाठी itel A300C मध्ये ८ मेगापिक्सेलचा मेन कॅमेरा देण्यात आला आहे, तर सेल्फी आणि व्हिडिओ कॉलिंगसाठी ५ मेगापिक्सेलचा फ्रंट कॅमेरा मिळतो. ऑडिओसाठी फोनमध्ये DTS-Enhanced Sound Effects ही सुविधा दिली आहे.

टिकाऊपणाबाबतही कंपनीने विशेष लक्ष दिलं असून itel च्या दाव्यानुसार A300C ने MIL-STD-810H हे मिलिटरी-ग्रेड ड्युरेबिलिटी टेस्टिंग पास केलं आहे. रोजच्या वापरातले धक्के किंवा फोन अचानक हातातून खाली पडणं यासारख्या गोष्टी लक्षात घेऊन याची रचना करण्यात आल्याचं कंपनीचं म्हणणं आहे. सुरक्षेसाठी साइड-माउंटेड फिंगरप्रिंट सेन्सर आणि फेस अनलॉकही यात देण्यात आले आहे. एक खास गोष्ट म्हणजे हा फोन घेणाऱ्या ग्राहकांना पहिल्या १०० दिवसांसाठी कंपनी मोफत स्क्रीन रिप्लेसमेंट देणार आहे.

नेटवर्कशी संबंधित अडचण आली तर संपर्कासाठी उपयोगी पडणारं 'UltraLink Free Call' हे फीचरही या फोनमध्ये देण्यात आलं आहे. याशिवाय Type-C OTG कनेक्टिव्हिटी आणि इनबिल्ट इन्फ्रारेड रिमोट सेन्सरही यात मिळतो, ज्याच्या मदतीने सुसंगत घरगुती इलेक्ट्रॉनिक उपकरणं फोनवरूनच कंट्रोल करता येऊ शकतात.

itel India - Transsion Holdings चे CEO अरिजित तालापात्रा यांच्या म्हणण्यानुसार, परवडणारा फोन निवडताना ग्राहकांना परफॉर्मन्सशी तडजोड करावी लागू नये, हा उद्देश समोर ठेवून A300C तयार करण्यात आला आहे. काम, शिक्षण, मनोरंजन आणि संपर्क या रोजच्या गरजा लक्षात घेऊन मोठी बॅटरी आणि टिकाऊपणावर भर दिल्याचं कंपनीने सांगितलं आहे.

अशा प्रकारे १०,९९९ रुपयांच्या किमतीत मोठी बॅटरी, फास्ट चार्जिंग, ९०Hz डिस्प्ले, Android 16 Go आणि मिलिटरी-ग्रेड ड्युरेबिलिटी अशा वैशिष्ट्यांसह itel A300C बजेट स्मार्टफोन सेगमेंटमध्ये दाखल झाला आहे.