Instamart ची Yulu-Yuma Energy सोबत भागीदारी, डिलिव्हरी पार्टनर्सना बॅटरी स्वॅपिंग सुविधा

क्विक कॉमर्स क्षेत्रातील आघाडीची कंपनी Instamart ने आपल्या लास्ट-माइल डिलिव्हरी सेवेत इलेक्ट्रिक मोबिलिटीवर मोठा भर दिला आहे. डिलिव्हरी पार्टनर्सना बॅटरी स्वॅपिंगची सुविधा त्यांच्या जवळच उपलब्ध करून देण्यासाठी कंपनीने Yulu आणि Yuma Energy या दोन कंपन्यांसोबत भागीदारी केली आहे. या भागीदारीमुळे इलेक्ट्रिक दुचाकी वापरणाऱ्या रायडर्सचा चार्जिंगसाठी जाणारा वेळ कमी होण्यास मदत होणार असल्याचे कंपनीने म्हटले आहे.

EV वापरण्याचा सुरुवातीचा खर्च आणि चार्जिंगमुळे होणारा डाउनटाइम कमी करण्यावरही Instamart चा भर आहे. लास्ट-माइल डिलिव्हरीमध्ये EV चा वापर वाढवण्यासाठी वाहनांची उपलब्धता आणि ऊर्जा सुविधा या दोन्ही गोष्टी महत्त्वाच्या ठरत असल्याचे कंपनीचे म्हणणे आहे.

Instamart आणि Yuma Energy यांच्या भागीदारीनुसार Instamart आपल्या PODs म्हणजेच डार्क स्टोअर्समध्ये Yuma च्या बॅटरी स्वॅपिंग स्टेशन्ससाठी जागा देत आहे. या सुविधेचे पहिले स्टेशन याच महिन्याच्या सुरुवातीला Instamart च्या एका POD मध्ये सुरू करण्यात आले. Yuma Energy सध्या 2,000 हून अधिक बॅटरी स्वॅपिंग युनिट्स चालवते.

एका बॅटरीचे स्वॅपिंग करायला दोन मिनिटांपेक्षा कमी वेळ लागतो. त्यामुळे रोज मोठे अंतर कापणाऱ्या डिलिव्हरी पार्टनर्सना चार्जिंगसाठी जास्त वेळ थांबावे लागणार नाही. PODs जवळच स्वॅपिंग स्टेशन असल्याने प्रवास आणि थांबण्याच्या वेळेत दररोज 60 मिनिटांपर्यंत बचत होऊ शकते, असे कंपनीने सांगितले.

Instamart ने Yulu सोबतही भागीदारी केली आहे. Yulu च्या इलेक्ट्रिक दुचाकी वापरणाऱ्या डिलिव्हरी पार्टनर्सना रेंटल कॅशबॅक इन्सेंटिव्ह दिले जात आहे. EV कडे वळताना लागणारा सुरुवातीचा आर्थिक भार आणि पेट्रोलच्या वाढत्या खर्चाचा परिणाम कमी करणे, हा या उपक्रमाचा उद्देश असल्याचे कंपनीने सांगितले. मे 2026 मध्ये हा कार्यक्रम सुरू झाल्यापासून हजारो डिलिव्हरी पार्टनर्सना त्याचा फायदा झाला आहे. यात सहभागी झालेल्या पार्टनर्सच्या रेंटल खर्चात 30 टक्क्यांपर्यंत घट झाल्याचे कंपनीने सांगितले आहे.

Instamart, Swiggy सोबत मिळून देशभरातील 50 हून अधिक EV पार्टनर्ससोबत काम करत आहे. यातून डिलिव्हरी पार्टनर्सना इलेक्ट्रिक वाहनांचा अधिक सोपा पर्याय देण्याचा प्रयत्न केला जात आहे. Yulu कडून वाहनांची उपलब्धता आणि Yuma Energy कडून बॅटरी स्वॅपिंगची सुविधा मिळत असल्याने EV वापरातील दोन मोठे अडथळे कमी करण्याचा प्रयत्न सुरू आहे. वाहनाचा खर्च, बॅटरीची उपलब्धता आणि चार्जिंगचा वेळ या तिन्ही गोष्टींची सांगड घालत लास्ट-माइल डिलिव्हरीसाठी इलेक्ट्रिक मोबिलिटीचा वापर वाढवण्याची Instamart ची योजना आहे.