इलेक्ट्रिक दुचाकी कंपनी अल्ट्राव्हायोलेटला 85 मिलियन डॉलरचा निधी, उत्पादन वाढवून अमेरिकेत उतरण्याची तयारी
भारतातील इलेक्ट्रिक दुचाकी बनवणाऱ्या अल्ट्राव्हायोलेट या कंपनीने नव्या फंडिंग फेरीतून 85 मिलियन डॉलरचा निधी उभा केला आहे. या गुंतवणुकीत याली कॅपिटलचा डीप-टेक फंड आणि टीडीके व्हेंचर्स यांचा प्रमुख सहभाग राहिला आहे. वॉल्डन इंटरनॅशनलचे अध्यक्ष आणि इंटेलचे प्रमुख लिप-बू टॅन यांनीही या फेरीत गुंतवणूक केली असून ते यापुढे अल्ट्राव्हायोलेटचे सल्लागार म्हणूनही काम पाहणार आहेत.
कंपनीने सांगितले की, हा निधी सध्याच्या F77 आणि X-47 या दोन मॉडेल्सचे उत्पादन वाढवण्यासाठी वापरला जाणार आहे. त्याचबरोबर लवकरच येणाऱ्या टेसेरॅक्ट या इलेक्ट्रिक स्कूटरच्या आणि शॉकवेव्ह या एंड्युरो मोटरसायकलच्या उत्पादन क्षमतेतही वाढ केली जाणार आहे. यासाठी कंपनीने मोठ्या उत्पादन क्षमतेच्या नव्या प्लांटची योजनाही आखली असून, देशातील तसेच परदेशातील वाढत्या मागणीला हा प्लांट पुरा करेल असे कंपनीचे म्हणणे आहे.
अल्ट्राव्हायोलेटचे लक्ष केवळ मोटरसायकल विकण्यापुरते मर्यादित नाही. कंपनी वेगवेगळ्या प्रकारच्या वाहनांसाठी वापरता येतील असे नवे EV प्लॅटफॉर्मही विकसित करत आहे. बॅटरी, पॉवर इलेक्ट्रॉनिक्स, वाहनाची रचना (आर्किटेक्चर) आणि सॉफ्टवेअर या महत्त्वाच्या टेक्नोलॉजीत कंपनीने स्वतःची क्षमता उभी केल्याचे कंपनीने सांगितले आहे. कंपनीच्या दाव्यानुसार तिच्या बॅटरी तंत्रज्ञानात 48V पासून 400V पर्यंतच्या आर्किटेक्चरचा समावेश आहे. म्हणजेच बॅटरी, तिचे इलेक्ट्रॉनिक नियंत्रण, वाहनाची एकूण रचना आणि त्यामागील सॉफ्टवेअर या सगळ्या गोष्टी कंपनी स्वतःच तयार करत असल्याचे यातून दिसते.
सध्या F77 आणि X-47 ही दोन मॉडेल्स भारतीय ग्राहकांपर्यंत पोहोचली आहेत. X-47 या मॉडेलमध्ये रडार आधारित सुरक्षा तंत्रज्ञान वापरण्यात आले आहे. आगामी उत्पादनांपैकी टेसेरॅक्टला कंपनीने विशेष महत्त्व दिले असून, अधिकृत माहितीनुसार त्याचे उत्पादन Q1 2027 मध्ये सुरू होणे अपेक्षित आहे. दुसरीकडे शॉकवेव्ह या मोटरसायकलच्या माध्यमातून कंपनी इलेक्ट्रिक एंड्युरो या नव्या सेगमेंटमध्ये उतरण्याची तयारी करत आहे. म्हणजेच एका बाजूला शहरी वापरासाठीची स्कूटर आणि दुसऱ्या बाजूला खडतर रस्त्यांवर चालवण्याच्या एंड्युरो मोटरसायकलपर्यंत कंपनीचा उत्पादन आराखडा पसरलेला आहे.
आंतरराष्ट्रीय बाजारपेठेतील विस्तार हाही कंपनीच्या योजनेचा महत्त्वाचा भाग आहे. युरोपमध्ये उपस्थिती वाढवल्यानंतर अल्ट्राव्हायोलेटने 2027 मध्ये अमेरिकन मार्केटमध्ये उतरण्याची योजना आखली आहे. याशिवाय लॅटिन अमेरिका आणि दक्षिण-पूर्व आशियातील संधींचाही कंपनी विचार करत आहे. नव्या गुंतवणुकीमुळे उत्पादन, टेक्नोलॉजी आणि जागतिक विस्तार या तिन्ही आघाड्यांवर पुढे जाण्यासाठी कंपनीला बळ मिळणार आहे.
