बेलवरा शिवारात पत्त्यांच्या जुगारावर धाड, पाच आरोपी ताब्यात, दोघे पसार
भद्रावती पोलिसांनी ३ ऑक्टोबरच्या रात्री बेलवरा शेतशिवारात छापा टाकून पाच आरोपींना रंगेहात पकडले, तर दोघे अंधारात पळून गेले.
भद्रावती पोलिसांनी बेलवरा गावाच्या शेतशिवारात सुरू असलेल्या पत्त्यांच्या जुगारावर धाड टाकली. या कारवाईत पाच आरोपींना जुगार खेळताना रंगेहात पकडण्यात आले. इतर दोन आरोपी मात्र अंधाराचा फायदा घेऊन तिथून पळून गेले आणि पोलीस त्यांचा शोध घेत आहेत.
उपविभागीय पोलीस अधिकारी सचिन खेत्रे यांच्या मार्गदर्शनाखाली ३ ऑक्टोबरच्या रात्री ही कारवाई झाली. पोलिसांनी रोकड, पत्ते आणि चार दुचाकी मिळून एकूण २ लाख ६५ हजार ५४० रुपयांचा ऐवज जप्त केल्याचे सांगितले आहे.
पोलिसांनी दिलेल्या माहितीनुसार, भद्रावती पोलीस स्टेशनचे पथक त्या भागात गस्त घालत होते. त्या वेळी बातमीदाराकडून गोपनीय माहिती मिळाली की, बेलवरा गावातील शेतशिवारात एका बाभळीच्या झाडाखाली काही जण मोबाईलच्या टॉर्चच्या उजेडात पैशांची बाजी लावून ५२ पत्त्यांचा जुगार खेळत आहेत.
माहिती खरी असल्याची खात्री पटताच पोलीस पथकाने दोन पंचांना सोबत घेतले आणि बेलवरा शिवारात छापा टाकला. बाभळीच्या झाडाभोवती घेराव घालून धाड मारली असता तिथे जुगार खेळणारे पाच जण रंगेहात सापडले. बाकीचे दोन जुगारी पोलिसांना पाहताच अंधाराचा फायदा घेऊन घटनास्थळावरून पसार झाले.
घटनास्थळावरून ताब्यात घेतलेल्या आरोपींमध्ये गणेश दिनेश भोयर (वय ३१, रा. माजरी), निखिल चंद्रकांत बोंडे (वय ३५, रा. कुचना कॉलनी), उदय राजेंद्र वैद्य (वय २१, रा. बेलवरा), प्रणीत यशवंत मत्ते (वय ३१, रा. बेलवरा) आणि अतुल गजानन कुळमेथे (वय ३८, रा. माजरी) यांचा समावेश आहे.
पळून गेलेल्या दोघांची चौकशी केली असता त्यांची नावे मनीष साळपुते (रा. कुचना) आणि स्वप्निल पिंपळकर (रा. किलोनी) अशी असल्याचे निष्पन्न झाले आहे. त्या दोघांचा पोलीस शोध घेत आहेत.
पोलिसांनी घटनास्थळावरून आणि आरोपींच्या अंगझडतीतून जुगाराच्या डावावरील तसेच रोख रकमेसह एकूण ४ हजार ६५० रुपये जप्त केले. याशिवाय ५२ पत्ते आणि जुगाऱ्यांच्या ताब्यातील चार दुचाकीही जप्त करण्यात आल्या. या दुचाकींमध्ये ज्युपिटर, पल्सर आणि दोन शाईन मोटारसायकलींचा समावेश असून त्या वाहनांची एकूण किंमत २ लाख ६० हजार रुपये आहे.
या प्रकरणी पोलीस हवालदार प्रशांत पुंडलिक शेंडारे यांनी तक्रार दिली आहे. त्यावरून भद्रावती पोलीस स्टेशनमध्ये आरोपींविरुद्ध महाराष्ट्र जुगार प्रतिबंधक कायद्याच्या कलम १२(अ) अन्वये गुन्हा दाखल करण्यात आला आहे. प्रकरणाचा पुढील तपास पोलीस हवालदार पी. एस. सिडाम करत आहेत.
