ICICI बँकेच्या मुदत ठेवींच्या व्याजदरात १० बेसिस पॉइंटची वाढ, ज्येष्ठांना कमाल ७.२०%

एफडीमध्ये पैसे गुंतवण्याचा विचार करणाऱ्यांसाठी ही बातमी कामाची आहे. ICICI बँकेने मुदत ठेवींवरील व्याजदरात वाढ केली आहे. ३ कोटी रुपयांपेक्षा कमी रकमेच्या ठेवींवरचे व्याजदर बँकेने १० बेसिस पॉइंटने म्हणजे ०.१०% ने वाढवले आहेत. ही वाढ विशेषतः निवडक दीर्घ मुदतीच्या ठेवींवर करण्यात आली आहे.

या बदलानंतर ज्येष्ठ नागरिकांसाठी बँकेचा मुदत ठेवींवरचा व्याजदर ७.२०% झाला आहे. सर्वसाधारण ठेवीदारांसाठी कमाल व्याजदर ६.६०% आहे.

दोन वर्षे आणि एक दिवसापासून तीन वर्षांपर्यंतच्या ठेवींवरचा व्याजदर बँकेने ६.४५% वरून ६.५५% केला आहे. या मुदतीसाठी पैसे ठेवले, तर आधीच्या दराच्या तुलनेत १ लाख रुपयांच्या गुंतवणुकीवर वर्षाला अंदाजे १०० रुपये जास्त व्याज मिळेल. ५ लाख रुपयांच्या गुंतवणुकीवर वर्षाला अंदाजे ५०० रुपये अधिक निव्वळ नफा मिळेल.

सामान्य ठेवीदारांसाठी निवडक दीर्घ मुदतीच्या एफडी आणि कर बचत योजनांवरचे व्याजदर ६.५०% वरून ६.६०% झाले आहेत. ३ वर्षे १ दिवस ते ५ वर्षे या मुदतीसाठी दर ६.५०% वरून ६.६०% झाला आहे. ५ वर्षे १ दिवस ते १० वर्षे या मुदतीसाठीही तेवढीच वाढ झाली असून दर ६.५०% वरून ६.६०% आहे. ५ वर्षांपर्यंतच्या कर बचत एफडीवरही हाच दर ६.५०% वरून ६.६०% करण्यात आला आहे.

कमी मुदतीच्या ठेवींवर सर्वसाधारण ठेवीदारांना ७ ते ४५ दिवसांसाठी २.७५%, ४६ ते ९० दिवसांसाठी ४% आणि ९१ ते १८४ दिवसांसाठी ४.५०% व्याज मिळते. १८५ दिवसांपासून एका वर्षापेक्षा कमी मुदतीसाठी ५.५०% व्याज आहे. एक वर्षापासून १८ महिन्यांपेक्षा कमी मुदतीसाठी ६.२५% आणि १८ महिने ते दोन वर्षांसाठी ६.३०% व्याज मिळते.

ज्येष्ठ नागरिकांना बँकेच्या पात्र मुदत ठेवींवर ७.२०% पर्यंत व्याज मिळू शकते. ३ वर्षे १ दिवस ते ५ वर्षे मुदतीचा दर ७.१०% वरून ७.२०% झाला आहे. ५ वर्षांच्या टॅक्स सेव्हर एफडीचा दरही ७.१०% वरून ७.२०% करण्यात आला आहे. २ वर्षे १ दिवस ते ३ वर्षे मुदतीसाठी दर ६.९५% वरून ७.०५% झाला आहे. ५ वर्षे १ दिवस ते १० वर्षे या दीर्घ मुदतीच्या ठेवीचा दर ७.००% वरून ७.१०% केला आहे.

ज्येष्ठ नागरिकांना कमी मुदतीच्या ठेवींवर ७ ते ४५ दिवसांसाठी ३.२५%, ४६ ते ९० दिवसांसाठी ४.५०% आणि ९१ ते १८४ दिवसांसाठी ५% व्याज मिळते. १८५ दिवसांपासून एका वर्षापेक्षा कमी मुदतीसाठी ६% व्याज आहे. एक वर्ष ते १८ महिन्यांपेक्षा कमी मुदतीसाठी ६.७५% आणि १८ महिने ते दोन वर्षांसाठी ६.८०% दर आहे.