हरमनप्रीत कौरचा कर्णधारपदाचा राजीनामा, स्मृती मंधाना नवी कर्णधार होण्याची शक्यता

भारतीय महिला क्रिकेट संघाची कर्णधार हरमनप्रीत कौर हिने कर्णधारपद सोडले आहे. मंगळवारी तिने सर्व प्रकारच्या फॉरमॅटमधील कर्णधारपदाचा राजीनामा दिला. ही माहिती तिने स्वतः सोशल मीडियावर पोस्ट करून दिली. तीनही फॉरमॅटमध्ये भारताचे नेतृत्व करणारी हरमनप्रीत ही संघाची अनुभवी खेळाडू आहे. आक्रमक फलंदाजी, मैदानावरची जिद्द आणि दबावाच्या क्षणी संघाच्या पाठीशी उभे राहण्यासाठी ती ओळखली जाते.

हा निर्णय अचानक आल्याने क्रिकेट जगतात मोठी खळबळ उडाली आहे. भारतीय क्रिकेट नियामक मंडळाची म्हणजेच बीसीसीआयची आढावा बैठक होऊन अवघा एक दिवस झाला होता आणि त्यानंतर लगेचच हरमनप्रीतने राजीनामा दिला. ही महत्त्वाची बैठक सोमवारी गुवाहाटी येथे झाली. या बैठकीला प्रशिक्षक अमोल मजूमदार यांच्यासोबत उपकर्णधार स्मृती मंधाना हिदेखील उपस्थित होती.

हरमनप्रीत कौर ही भारतीय महिला क्रिकेटच्या इतिहासातील सर्वात यशस्वी कर्णधारांपैकी एक मानली जाते. तिच्याच नेतृत्वाखाली भारतीय महिला संघाने गेल्या वर्षी पहिल्यांदाच महिला वनडे वर्ल्ड कपचे विजेतेपद जिंकले आणि इतिहास घडवला. इतक्या मोठ्या यशानंतर तिने पद सोडल्यामुळे या निर्णयाची चर्चा जास्तच रंगली आहे.

हरमनप्रीतने राजीनामा दिल्यानंतर आता संघाचा नवा कर्णधार कोण होणार, याकडे सगळ्यांचे लक्ष लागले आहे. या शर्यतीत उपकर्णधार स्मृती मंधाना हिचे नाव सर्वात पुढे आहे. तीच भारतीय संघाची नवी कर्णधार होण्याची दाट शक्यता आहे, असे म्हटले जात आहे. मात्र याबद्दल अजून कुठलीही अधिकृत घोषणा झालेली नाही.

स्मृती मंधाना खूप काळापासून भारतीय संघाकडून खेळत आहे. उपकर्णधार म्हणून ती आजही संघाची जबाबदारी सांभाळत आहे. शिवाय महिला प्रीमियर लीगमध्ये तिने आरसीबी संघाचे नेतृत्व केले आहे. म्हणजेच कर्णधार म्हणून तिच्या गाठीशी अनुभव आहे.

आकडेही तिच्या बाजूने बोलतात. स्मृतीने १०० हून अधिक एकदिवसीय सामन्यांमध्ये ४,००० हून अधिक धावा केल्या आहेत. यात ८ पेक्षा जास्त शतके आणि ३० हून अधिक अर्धशतके आहेत. हरमनप्रीतने कप्तानी सोडल्यानंतर भारतीय महिला क्रिकेट संघाच्या नेतृत्वाची धुरा सांभाळण्यासाठी म्हणूनच स्मृतीचे नाव आघाडीवर आहे.