'हनुमान अंश'ची कमाई 400 कोटींवर, 'पार्वती' गाण्याला युट्यूबवर 100 मिलियन व्ह्यूज
'हनुमान अंश' चित्रपटाने जगभरात 400 कोटी रुपयांहून अधिक कमाई केली असून 'पार्वती' गाणे युट्यूबवर भारतात साप्ताहिक चार्टमध्ये पहिल्या क्रमांकावर आहे.
सुरुवातीला प्रेक्षकांचा प्रतिसाद संथ होता, पण 'हनुमान अंश' या चित्रपटाने बॉक्स ऑफिसवर जोरदार मुसंडी मारली आहे. प्रेक्षकांनी चित्रपट डोक्यावर घेतल्यामुळे तो सुपरहिट ठरला असून जगभरात त्याने 400 कोटी रुपयांहून अधिक कमाई केली आहे. कथानकाइतकेच भक्तीरसाने भरलेल्या संगीतानेही रसिकांना वेड लावले आहे. संपूर्ण म्युझिक अल्बमने 10 कोटींहून अधिक, म्हणजेच 100 मिलियन व्ह्यूजचा टप्पा गाठला आहे.
चित्रपटातील 'पार्वती' हे गाणे सध्या युट्यूबवर खूप ट्रेंड होत आहे. भारतात ते साप्ताहिक टॉप-ट्रेंडिंग चार्टवर पहिल्या क्रमांकावर आहे, तर जागतिक स्तरावर दुसऱ्या क्रमांकावर पोहोचले आहे. टाईम्स म्युझिक अंतर्गत येणाऱ्या 'जंगली म्युझिक'ने (Junglee Music) या गाण्यांचे वितरण केले आहे. आतापर्यंत या गाण्यावर 15 लाखांहून अधिक सोशल मीडिया रील्स आणि शॉर्ट व्हिडिओ बनवले गेले आहेत. शाळांतील प्रार्थनांपासून भजन संध्या आणि सांस्कृतिक कार्यक्रमांपर्यंत सगळीकडे हेच गाणे ऐकू येत आहे.
नवी दिल्लीत झालेल्या एका मोठ्या भजन कार्यक्रमात गायक साधु तिवारी यांनी 'पार्वती' हे गाणे लाईव्ह सादर केले. या कार्यक्रमाला पंतप्रधान नरेंद्र मोदी (PM Narendra Modi) प्रमुख उपस्थित होते. चित्रपटाचे लेखक व दिग्दर्शक विशाल चतुर्वेदी यांनी 'हृदय में जिनके सियाराम' आणि 'हनुमान चालीसा' सुरेल आवाजात सादर करून उपस्थितांची मने जिंकली. सुनील लोढी यांनी गायलेली 'मैंने तेरे ही भरोसे' आणि 'जय हनुमान' ही गाणीही श्रोत्यांना आवडत आहेत.
चित्रपटाचे संगीत देशात आणि परदेशातही लोकांच्या मनाला भिडत आहे, हे पाहून खूप आनंद वाटतो, असे विशाल चतुर्वेदी यांनी सांगितले. 'हनुमान अंश'च्या माध्यमातून नव्या आणि हुशार कलाकारांना त्यांचे कौशल्य दाखवण्याची संधी देणे हा आपला मुख्य उद्देश होता, असेही ते म्हणाले.
निर्मात्या नम्रता सिंह म्हणाल्या, की संगीतावर आम्हाला पूर्ण विश्वास होताच, पण प्रेक्षकांकडून इतके अपार प्रेम मिळेल अशी अपेक्षा नव्हती. गायक साधु तिवारी यांनी म्हटले, की 'पार्वती' गाणे लोकांच्या रोजच्या जीवनाचा आणि भक्तीचा भाग बनले आहे, ही माझ्यासाठी मोठी पावती आहे.
टाइम्स म्युझिकचे सीईओ मंदार ठाकूर यांनी सांगितले, की 'पार्वती' गाण्याला मिळणारा प्रतिसाद अभूतपूर्व आहे. हे संगीत सर्व वयोगटांतील आणि वेगवेगळ्या प्रदेशांतील श्रोत्यांपर्यंत पोहोचले आहे. 'हनुमान अंश' चित्रपटातील सर्व गाणी आता युट्यूबसह सर्व प्रमुख म्युझिक स्ट्रीमिंग प्लॅटफॉर्मवर ऐकायला मिळतात.
