दारूच्या पैशांवरून वादातून मुलाने आईवर चाकू उगारला, महिलेच्या धाडसाने वाचला जीव

नागपूरच्या तहसील पोलीस स्टेशन हद्दीत दारूच्या पैशांवरून वाद घालत एका आरोपीने स्वतःच्या वृद्ध आईवरच चाकू उगारल्याची घटना घडली आहे. जागनाथ बुधवारी भागात 66 वर्षांच्या लीलाबाई टाकलीकर यांचे शिवभोजन थाळी केंद्र आहे. या केंद्रावर त्या रोज काम करतात आणि 21 सप्टेंबरला सकाळीही त्या नेहमीप्रमाणे तिथे हजर होत्या. त्याचवेळी त्यांचा 42 वर्षांचा मुलगा सचिन टाकलीकर तिथे आला.

सचिन हा नेहमीच आईला दारूसाठी पैसे मागून त्रास द्यायचा. त्याचे लग्न होत नसल्याचा राग तो नेहमी लीलाबाईंवर काढत असे आणि यावरून त्यांचा अपमानही करत असे. या कारणांवरून तो नेहमी आईशी भांडायचा, आणि 21 सप्टेंबरलाही तोच नेहमीचा प्रकार पुन्हा घडला. सचिनने आईला शिवीगाळ करत जीवे मारण्याची धमकी दिली आणि याच दरम्यान त्याने चाकू काढला. यानंतर तो लीलाबाईंवर हल्ला करण्याच्या प्रयत्नात होता, अशी माहिती आहे.

याचवेळी त्याच शिवभोजन केंद्रात काम करणाऱ्या ललिता निमजे या महिलेने प्रसंगावधान राखत आणि धाडस दाखवत मध्ये उडी घेतली. तिने सचिनच्या हातातून चाकू हिसकावून घेतला आणि त्याला लीलाबाईंवर हल्ला करण्यापासून रोखले. ललिता यांनी त्या क्षणी दाखवलेल्या तत्परतेमुळेच लीलाबाईंचा जीव वाचला, असे सांगितले जात आहे.

या प्रकरणी तहसील पोलिसांनी सदोष मनुष्यवधाचा प्रयत्न केल्याचा गुन्हा दाखल केला असून आरोपी सचिन टाकलीकर याला अटक करण्यात आली आहे. पोलिसांनी दिलेल्या माहितीनुसार, सचिनविरोधात याआधीच खुनासह एकूण 7 गुन्हे दाखल आहेत. गेल्याच वर्षी तो एका खुनाच्या प्रकरणात तुरुंगातून बाहेर आला होता, आणि त्यानंतर काही महिन्यांतच त्याच्यावर आता आईवर हल्ल्याचा प्रयत्न केल्याचा आरोप ठेवण्यात आला आहे.