सराईत मुलाने स्वतःच्याच आईवर चाकूने हल्ला केला; दारूसाठी पैसे न दिल्याने चिडला

दारू पिण्यासाठी पैसे मागितले आणि आईने नकार दिला म्हणून एका मुलाने संतापून तिच्यावर चाकूने वार केल्याची घटना नागपुरात घडली. या हल्ल्यात आरोपीने आईच्या हत्येचा प्रयत्न केल्याचा आरोप पोलिसांनी नोंदवला आहे. ही घटना नागपुरातील जगन्नाथ परिसरात कुंभारपुरा येथील शिवभोजन थाळी केंद्रात सोमवारी, २१ तारखेला घडली.

पोलिसांनी दिलेल्या माहितीनुसार, लीलाबाई नावाच्या महिला या कुंभारपुरा येथील शिवभोजन थाळी केंद्रात काम करून आपल्या कुटुंबाचा उदरनिर्वाह चालवतात. सोमवारी त्या नेहमीप्रमाणे या केंद्रात कामावर असताना त्यांचा मुलगा सचिन सुरेश टाकळीकर (वय ४२) तिथे आला आणि त्याने दारू पिण्यासाठी आईकडे पैसे मागितले. लीलाबाईंनी पैसे देण्यास नकार दिल्यावर सचिन त्यांच्याशी शिवीगाळ करू लागला. त्याचवेळी त्याने आईला जीवे मारण्याची धमकी दिली आणि केंद्रात भाजी कापण्यासाठी ठेवलेला चाकू उचलून आईच्या पोटावर वार केला.

ही घटना घडली तेव्हा शिवभोजन केंद्रात ग्राहक आणि इतर कर्मचारीही उपस्थित होते. अचानक झालेल्या या हल्ल्यामुळे केंद्रात काही काळ भीतीचे वातावरण तयार झाले. आरोपी सचिन आईवर पुन्हा वार करण्याच्या तयारीत असतानाच लीलाबाईंची सहकारी ललिता हेमंत निमजे या पुढे सरसावल्या. त्यांनी धाडस दाखवत मध्ये पडून सचिनच्या हातातील चाकू हिसकावून घेतला. त्यामुळे लीलाबाईंचा जीव वाचला आणि मोठा अनर्थ टळला. हल्ल्यानंतर आरोपी सचिन घटनास्थळावरून पसार झाला, मात्र त्यानंतर या घटनेची माहिती पोलिसांना देण्यात आली.

याप्रकरणी तहसील पोलीस स्टेशनने आरोपी सचिन सुरेश टाकळीकर याच्याविरुद्ध हत्येच्या प्रयत्नाचा गुन्हा दाखल करून त्याला अटक केली आहे. न्यायालयाने त्याला पोलीस कोठडी सुनावली आहे. पोलिसांनी सांगितले की, सचिनविरुद्ध याआधीही हत्या, मारहाण तसेच घातक शस्त्राने हल्ला करणे यासह एकूण ७ गुन्हे दाखल आहेत. यापूर्वी त्याने सुमारे १६ वर्षांची कारावासाची शिक्षा भोगली असून काही काळापूर्वीच तो कारागृहातून बाहेर आला होता. सचिनला दारूचे व्यसन असल्याचे पोलिसांनी सांगितले.