Google चा स्क्रीन नसलेला Fitbit Air बाजारात, एकदा चार्ज केल्यावर 7 दिवस चालतो

Google ने आपला नवा फिटनेस ट्रॅकर Fitbit Air बाजारात आणला आहे. या बँडला स्क्रीनच नाही. हार्ट रेट, झोप आणि वर्कआउट ट्रॅकिंगची सुविधा मात्र त्यात आहे. फुल चार्जनंतर बॅटरी 7 दिवस चालते, तर 5 मिनिटांच्या चार्जिंगमध्ये एका दिवसाची बॅटरी मिळते.

आजकाल लहानांपासून मोठ्यांपर्यंत सगळ्यांच्या हातात स्मार्टवॉच दिसतो. कोणाचा मेसेज आला, नोटिफिकेशन आले, स्टेप्स किती झाले, हे सारखं बघण्याचा लोकांना आता कंटाळा आला आहे. म्हणूनच कंपन्या स्क्रीन नसलेले फिटनेस ट्रॅकर घेऊन आल्या आहेत. दिसायला हा बँड एकदम साधा आहे, पण आतून तो स्मार्ट आहे.

हा ट्रेंड खऱ्या अर्थाने Whoop कंपनीने सुरू केला. सुरुवातीला मोठे क्रिकेटर आणि फुटबॉल प्लेयर Whoop घालायचे. हळूहळू मोठ्या कंपन्यांचे बॉस आणि जिमला जाणारे लोकही तो वापरू लागले. आज Whoop कंपनीची व्हॅल्यू 10 अब्ज डॉलर्सच्या पुढे गेली आहे. मात्र हे वॉच खूप महाग आहे आणि दर महिन्याला सब्सक्रिप्शन घ्यावं लागतं. सामान्य माणसाच्या खिशाला ते परवडत नाही. म्हणून Google ने या शर्यतीत उडी घेतली आणि Fitbit Air आणला.

Google च्या म्हणण्यानुसार, Fitbit Air मध्ये हेल्थ ट्रॅकिंग सुधारलं आहे आणि हार्ट रेट मोजण्याचं नवं टेक्नॉलॉजी वापरलं आहे. त्यामुळे झोपेचं मोजमाप 15 टक्के जास्त अचूक झालं आहे. दुपारी तुम्ही फक्त 20 मिनिटं झोपलात, तरी हा ट्रॅकर ते ओळखतो. तुम्हाला कधी उठवायचं हे तो स्वतः ठरवतो आणि झोपेचा स्कोअर सोप्या भाषेत दाखवतो.

स्क्रीन नसल्यामुळे बँडकडे सारखं बघायची सवयच लागत नाही. यात ऑटो वर्कआउट डिटेक्शनही आहे. तुम्ही चालताय, पळताय की जिम करताय, हे तो आपोआप ओळखतो. तुम्ही फक्त व्यायामावर लक्ष द्यायचं, बाकीचं काम बँड करतो. सगळा डेटा थेट Google Health App वर जातो आणि ते App अँड्रॉईड व आयफोन, दोन्हीवर चालतं.

स्क्रीन नसल्यामुळे बॅटरीही जबरदस्त चालते. सोबत मॅग्नेटिक चार्जर मिळतो. घाईत असाल तर फक्त 5 मिनिटं चार्ज केलं, की एका दिवसाची बॅटरी मिळते. बँड पूर्ण चार्ज व्हायला मात्र किमान 90 मिनिटं लागतात.

Fitbit Air अमेरिकेत आणि काही देशांमध्ये लाँच झाला असून लोकांचा चांगला प्रतिसाद मिळतोय. Whoop मध्ये दर महिन्याला पैसे द्यावे लागतात, पण Google ने वेगळा विचार केला आहे. Fitbit Air ची किंमत कमी ठेवली आहे आणि महिन्याला पैसे भरायची गरज नाही. अजून अडव्हान्स फिचर हवी असतील तर सब्सक्रिप्शन घेता येतं, पण ते बंधनकारक नाही. बॉक्समध्ये 3 महिन्यांचं Google Health Premium फ्री मिळतं. त्यानंतर Health Coach हवं असेल तरच पैसे द्यावे लागतील.

Google ला बघून Garmin ने जुलैमध्ये Cirqa नावाचा स्क्रीनलेस बँड आणला. Garmin GPS घड्याळांसाठी प्रसिद्ध आहे. Apple पण असाच स्क्रीन नसलेला बँड बनवत आहे, अशी चर्चा आहे. भारतातही Noise सारख्या कंपन्या असे बँड विकू लागल्या आहेत.

लोक साध्या बँडकडे का वळत आहेत, याचं कारण सोपं आहे. Apple Watch सारख्या घड्याळात हजार फिचर्स असतात, पण त्यातली 10 टक्के सुद्धा आपण वापरत नाही. सारख्या नोटिफिकेशनमुळे डोकं दुखतं. लोकांना आता मिनिमल हवं आहे, म्हणजे जे दिसणार नाही, त्रास देणार नाही, पण फक्त हेल्थकडे लक्ष देईल. आधी सगळ्यांना स्मार्टवॉच हवा होता, आता साधा, सुटसुटीत आणि स्क्रीन नसलेला बँड हवा आहे. पुढच्या वर्षी हा ट्रेंड आणखी वाढेल, असा अंदाज आहे.