गोमातेवरील 'धाराऊ' मराठी चित्रपटाचं मोशन पोस्टर आलं, २३ ऑक्टोबरला प्रदर्शन

'धाराऊ' या आगामी मराठी चित्रपटाचं मोशन पोस्टर नुकतंच सोशल मीडियावर प्रदर्शित झालं आहे. गोमातेप्रती असलेली श्रद्धा, भारतीय संस्कृतीतील तिचं महत्त्व आणि माणूस व गोमाता यांच्यातील भावनिक नातं हा या चित्रपटाचा विषय आहे. हा चित्रपट २३ ऑक्टोबर २०२६ रोजी महाराष्ट्रातील चित्रपटगृहांत प्रदर्शित होणार आहे.

"धाराऊ... ती गाय नाय... माय हाय!" ही लक्षवेधी टॅगलाइन पोस्टरवर आहे. पोस्टर समोर येताच चित्रपटाची चर्चा सुरू झाली आहे.

बुलढाणा अर्बन मीडिया हाऊस आणि हिंदचित्र फिल्म्स यांनी 'धाराऊ' प्रस्तुत केला आहे. गोमातेप्रती असलेली श्रद्धा आणि तिच्याशी जोडलेलं भावनिक नातं यांचा संवेदनशील वेध या चित्रपटातून घेण्यात आला आहे. भारतीय संस्कृतीत गाईला फक्त प्राणी म्हणून पाहिलं जात नाही, तिला आईसमान मानलं जातं. हीच भावना केंद्रस्थानी ठेवून गोमातेचं सांस्कृतिक, ऐतिहासिक आणि सामाजिक महत्त्व चित्रपटातून मांडण्याचा प्रयत्न झाला आहे.

मनिष सुरेश शिंदे हे लेखक, पटकथाकार आणि दिग्दर्शक आहेत. 'धाराऊ' हा त्यांचा पहिलाच मराठी चित्रपट आहे. कथा, पटकथा, संवाद आणि दिग्दर्शन अशी सगळी जबाबदारी त्यांनी स्वतः सांभाळली आहे.

चित्रपटाबद्दल बोलताना मनिष शिंदे म्हणाले, "लेखक आणि दिग्दर्शक म्हणून 'धाराऊ' हा माझा पहिलाच मराठी चित्रपट आहे आणि हा चित्रपट माझ्यासाठी खूप खास आहे. भारतीय संस्कृतीत गाईला केवळ एक प्राणी म्हणून पाहिलं जात नाही, तर तिला आईसमान मानलं जातं. याच भावनेला केंद्रस्थानी ठेवून गोमातेचं महत्त्व, तिच्याविषयीची संवेदना आणि समाजातील तिचं स्थान यांचा वेध घेण्याचा प्रयत्न 'धाराऊ'मधून करण्यात आला आहे."

या विषयातून समाजात जनजागृती आणि प्रबोधन व्हावं, तसंच गोमातेशी संबंधित ऐतिहासिक, सांस्कृतिक आणि सामाजिक संदर्भ नव्या पिढीपर्यंत पोहोचावेत, हा चित्रपटामागचा प्रमुख उद्देश असल्याचं त्यांनी पुढे सांगितलं.

दिग्दर्शकासाठी हा चित्रपट विशेष महत्त्वाचा आहे. विविध चित्रपट महोत्सवांमध्ये 'धाराऊ'ला तब्बल १५ पुरस्कार मिळाले आहेत. त्यामुळे चित्रपटाबद्दलची उत्सुकता वाढली आहे. हा चित्रपट एकाच विषयापुरता मर्यादित राहणार नाही, तर प्रेक्षकांना भावनिक पातळीवर जोडणारा आणि विचार करायला लावणारा अनुभव ठरेल, असा विश्वास दिग्दर्शकांनी व्यक्त केला आहे.

या चित्रपटाचे निर्माते श्री. राधेश्यामजी चांडक (भाईजी), डॉ. श्री. सुकेशजी झंवर आणि सौ. कोमलजी झंवर आहेत. मोशन पोस्टर प्रदर्शित झाल्यामुळे 'धाराऊ'विषयीची उत्सुकता आणखी वाढली आहे. हा मराठी चित्रपट २३ ऑक्टोबर २०२६ रोजी महाराष्ट्रातील चित्रपटगृहांत प्रदर्शित होणार आहे.