गिरगाव चौपाटीवरील गणेश विसर्जन सोहळ्यात परदेशी पर्यटकांसाठी पर्यटन विभागाचे खास दालन

अनंत चतुर्दशी अवघ्या दोन दिवसांवर येऊन ठेपली असून बाप्पाला निरोप देण्यासाठी शहरातील अनेक चौपाट्या आणि तलाव गर्दीने फुलून जाणार आहेत. यंदा ऐतिहासिक गिरगाव चौपाटीवर होणाऱ्या भव्य गणेश विसर्जन सोहळ्याचा अनुभव परदेशी पर्यटकांनाही घेता यावा, यासाठी राज्य सरकारच्या पर्यटन विभागाने एक विशेष उपक्रम हाती घेतला आहे. या ठिकाणी परदेशी पाहुण्यांसाठी खास दालन उभारण्यात येणार आहे.

या दालनाच्या माध्यमातून परदेशी पाहुण्यांना महाराष्ट्राची समृद्ध सांस्कृतिक परंपरा जवळून पाहता येणार आहे. गणेशोत्सवाचे ऐतिहासिक आणि अध्यात्मिक महत्त्व काय आहे, तसेच विसर्जन सोहळा किती भव्य पद्धतीने साजरा होतो, हे सगळं परदेशी पाहुण्यांना याच दालनातून अनुभवता येईल. यंदा गणेश विसर्जनाचा हा सोहळा प्रत्यक्ष पाहण्यासाठी आंतरराष्ट्रीय पर्यटक गिरगाव चौपाटीवर हजर राहणार आहेत.

या पाहुण्यांना गणपतीची मिरवणूक बघण्याची संधी तर मिळणारच आहे, शिवाय गणरायाची पूजा आणि आरतीमध्येही सहभागी होता येणार आहे. 'गणपती बाप्पा मोरया'च्या गजरात सामील होण्याचीही संधी त्यांना मिळेल. पारंपरिक महाराष्ट्रीयन वेशभूषा, ढोल-ताशांचा आवाज आणि भक्तिमय वातावरण अशा सगळ्यातून पर्यटकांना महाराष्ट्राचं सांस्कृतिक वैभव अनुभवायला मिळणार आहे.

याबाबत बोलताना पर्यटन मंत्री शंभूराज देसाई यांनी सांगितलं की, राज्याच्या पर्यटनाचं एक महत्त्वाचं वैशिष्ट्य म्हणजे इथली समृद्ध सांस्कृतिक परंपरा आहे. महाराष्ट्रातील विविध सांस्कृतिक परंपरा आणि उत्सव आंतरराष्ट्रीय पर्यटकांपर्यंत पोहोचवण्यासाठी पर्यटन विभागाकडून सातत्याने वेगवेगळे उपक्रम राबवले जात आहेत. गणेशोत्सवासारखा लोकसहभागातून साजरा होणारा उत्सव हे महाराष्ट्राची सांस्कृतिक ओळख परदेशी पर्यटकांपर्यंत नेण्याचं एक प्रभावी माध्यम ठरू शकतं, असं शासनाचं म्हणणं आहे. अशा उपक्रमांना पाठबळ देऊन सांस्कृतिक पर्यटनाच्या माध्यमातून राज्यातील पर्यटन वाढवण्याचा प्रयत्न सुरू आहे, असंही देसाई म्हणाले.

पर्यटन विभागाचे अपर मुख्य सचिव संजय खंदारे यांनी सांगितलं की, गिरगाव चौपाटीवर उभारण्यात येणाऱ्या या खास दालनातून गणेशोत्सवाची ऐतिहासिक, सांस्कृतिक आणि आध्यात्मिक पार्श्वभूमी पर्यटकांना समजावून सांगितली जाणार आहे. अशा उपक्रमांमुळे महाराष्ट्राचा सांस्कृतिक वारसा आंतरराष्ट्रीय पातळीवर अधिक प्रभावीपणे पोहोचायला मदत होईल, असं ते म्हणाले.

पर्यटन संचालनालयाचे संचालक विकास पानसरे यांनीही या उपक्रमाबद्दल भाष्य केलं. गिरगाव चौपाटीवरील गणेश विसर्जन सोहळा हा महाराष्ट्राचं सांस्कृतिक वैभव दाखवणारा एक महत्त्वाचा अनुभव आहे, असं ते म्हणाले. या खास दालनाच्या माध्यमातून परदेशी पर्यटकांना गणेशोत्सवाच्या विविध पैलूंची माहिती मिळेलच, शिवाय विसर्जन सोहळा प्रत्यक्ष डोळ्यांनी बघण्याचीही संधी त्यांना मिळणार आहे, असं पानसरे यांनी सांगितलं.