घरच्या घरी बनवा चमचमीत मसाला सोया खिमा, चपाती-भाकरीसोबत खास बेत

कामाच्या धावपळीत रोज नवीन काही बनवायला जास्त वेळ मिळत नाही. अशावेळी बाहेरून विकत आणलेले पदार्थ खाल्ले जातात. पण असे विकतचे पदार्थ नेहमी खाल्ले तर शरीरात कोलेस्ट्रॉल वाढण्याची शक्यता जास्त असते आणि कोलेस्ट्रॉल वाढले की हृदयाशी संबंधित त्रास वाढू लागतात. म्हणून जेवणात नेहमी घरी बनवलेले पदार्थच खावेत.

गरमागरम चपाती किंवा भाकरी केली की त्यासोबत नेहमीच त्याच ठरलेल्या भाज्या खाव्या लागतात. त्याऐवजी घरीच सोप्या पद्धतीने मसाला सोया खिमा बनवता येतो. हा पदार्थ शाकाहारी लोकांसाठी आणि डाएट करणाऱ्यांसाठी खूप चांगला आहे. आतापर्यंत तुम्ही चिकन खिमा किंवा मटण खिमा खाल्ला असेल, पण एखाद्या वेळी नाश्त्याला किंवा जेवणात सोयाबीन खिमा नक्की करून पाहा. तुम्ही बनवलेला हा सोयाबीन खिमा घरातल्या सगळ्यांना खूप आवडेल. चला तर मग, मसाला सोया खिमा बनवण्याची सोपी रेसिपी पाहूया.

साहित्य: सोयाबीन, लाल तिखट, हळद, दही, धणे पावडर, गरम मसाला, बेसन, मीठ, हिरवे मटार, खडे मसाले, आलं लसूण पेस्ट, टोमॅटो पेस्ट, कसुरी मेथी आणि कोथिंबीर. याशिवाय कृतीत जिरं पावडर, किचन किंग मसाला, तेल आणि बारीक चिरलेला कांदाही लागतो.

मसाला सोया खिमा बनवण्यासाठी सर्वात आधी पाणी गरम करून त्यात सोया पाच ते सात मिनिटं भिजत ठेवा. सोयाबीन मऊ झाले की त्यातले पाणी काढून टाका. मग ते मिक्सरच्या भांड्यात घालून जाडसर वाटून घ्या. सोयाबीन वाटताना त्यात अजिबात पाणी घालू नका.

आता एका वाटीत दही घ्या. त्यात लाल तिखट, हळद, धणे पावडर, गरम मसाला, जिरं पावडर, किचन किंग मसाला, बेसन आणि मीठ घालून सगळे साहित्य चमच्याने नीट मिक्स करा.

कढईत तेल गरम करा, त्यात खडे मसाले घालून मंद आचेवर लालसर होईपर्यंत भाजा. त्यानंतर बारीक चिरलेला कांदा आणि टोमॅटोची पेस्ट घालून मंद आचेवर तेल सुटेपर्यंत भाजा. मग चवीनुसार मीठ घाला. कांदा आणि टोमॅटो शिजले की आलं लसूण पेस्ट, लाल तिखट आणि थोडी हळद घालून नीट मिक्स करा.

मसाले भाजून झाले की त्यात सोयाबीनचे मिश्रण घालून मंद आचेवर शिजायला ठेवा. सोया खिमा शिजला की उकळून घेतलेले वाटाणे घालून मिक्स करा. खिमा मंद आचेवर नीट शिजल्यावर वरून बारीक चिरलेली कोथिंबीर घालून पुन्हा एकदा मिक्स करा. अशा प्रकारे सोप्या पद्धतीने मसाला सोया खिमा तयार होतो.