घरातल्या सोन्याच्या दागिन्यांचाही विमा उतरवता येतो, चोरी-नुकसानीत मिळतो फायदा
घरात ठेवलेलं सोनं चोरीला गेलं किंवा खराब झालं तर काय करायचं? दागिन्यांचा विमा कसा काढायचा आणि त्यातून काय फायदे मिळतात, हे जाणून घ्या.
मेडिकल विमा, गाडीचा विमा, टर्म विमा असे वेगवेगळे विमे आपण नेहमी उतरवतो. पण घरात ठेवलेल्या सोन्याच्या दागिन्यांचंही विमा संरक्षण घेता येतं, हे बऱ्याच जणांना माहीत नसतं. भारतातल्या बहुतेक लोकांच्या घरी सोन्याचे दागिने असतात, तर काही जण ते बँकेच्या लॉकरमध्ये ठेवतात. सोनं घरी असो किंवा लॉकरमध्ये, ते हरवलं किंवा एखाद्या घटनेत खराब झालं, तर त्याचा विमा असणं खूप महत्त्वाचं ठरतं.
घरात दागिने ठेवणं ही सामान्य गोष्ट असली, तरी त्यांची सुरक्षा हा नेहमी काळजीचा विषय असतो. चोरीची किंवा दागिने हरवण्याची भीती अनेकांच्या मनात असते. अशा वेळी घरातल्या सोन्याच्या दागिन्यांचा विमा काढता येतो का, हा प्रश्न पडणं साहजिक आहे. याचं उत्तर हो असं आहे. सर्वसाधारण विमा कंपन्या ज्याला 'householder policy' म्हणतात, त्या पॉलिसीअंतर्गत सोन्याच्या दागिन्यांना विमा संरक्षण मिळतं. या विम्याचा हप्ता प्रत्येक कंपनीनुसार वेगळा असतो आणि तो पॉलिसीत दिलेल्या संरक्षणाच्या व्याप्तीवर अवलंबून असतो. एकदा क्लेम केला की पुढचा हप्ता बदलू शकतो, हेही लक्षात ठेवायला हवं.
ही पॉलिसी नेमकं काय कव्हर करते, हे कंपनीनुसार बदलतं. विमा काढताना कोणत्या अटी लागू होतात आणि कोणत्या नाही, हे कंपनीकडून आधीच सांगितलं जातं. साधारणपणे जबरदस्तीने घरात घुसणं, घरफोडी आणि चोरी अशा प्रकारांचा या विम्यात समावेश असतो. काही कंपन्या तर घराबाहेर किंवा प्रवासात असताना दागिने चोरीला गेले किंवा खराब झाले, तरीही त्याचं संरक्षण देतात.
यासाठी एक अट मात्र पाळावी लागते, ती म्हणजे दागिन्यांची कागदपत्रं आणि फोटो जपून ठेवणं. हे पुरावे नसतील तर क्लेम मिळणं अवघड होऊ शकतं. शिवाय काही परिस्थितीत विमा संरक्षण मिळतच नाही. दागिन्यांवर सामान्य झीज दिसत असेल, साफसफाई किंवा दुरुस्ती करताना ते खराब झाले असतील, हळूहळू त्यांची झीज होत गेली असेल किंवा चोरी झाल्याचा कुठलाही पुरावा नसताना ते नुसतेच गायब झाले असतील, तर अशा प्रकरणांमध्ये विमा कंपनी संरक्षण देत नाही.
त्यामुळे घरात मौल्यवान सोन्याचे दागिने ठेवणाऱ्यांनी वेळीच योग्य ती हाऊसहोल्डर पॉलिसी घेऊन ठेवली, तर चोरी किंवा नुकसान झाल्यास आर्थिक फटका बसण्याची शक्यता कमी होते. दागिन्यांची पावती, बिल आणि फोटो जपून ठेवणं आणि पॉलिसीतल्या अटी नीट समजून घेणं, हे क्लेम मिळवण्यासाठी सर्वात महत्त्वाचं ठरतं.
