दुष्काळात गरब्यावर कोट्यवधींचा खर्च? अतुल लोंढे यांचा भाजप नेत्यांवर आरोप

राज्यात १९७२ पेक्षा भीषण दुष्काळ पडला असून ३०५ तालुक्यांना त्याची झळ बसली आहे, असे काँग्रेसचे वरिष्ठ प्रवक्ते अतुल लोंढे यांनी म्हटले आहे. शेतकरी आणि सर्वसामान्य लोकांचे प्रचंड हाल होत आहेत, असेही ते म्हणाले. एकीकडे महागाई आहे, दुसरीकडे पिण्याचे पाणी नाही, जनावरांना चारा नाही आणि विद्यार्थ्यांची फी भरायला पैसे नाहीत. दसरा-दिवाळी तोंडावर आली तरी सणासाठी हातात पैसा नाही, अशी परिस्थिती असल्याचे त्यांनी सांगितले.

अशा वेळी सत्ताधारी भाजपचे नेते भपकेबाज इव्हेंटवर जवळपास १०० कोटी रुपये उधळत आहेत, असा गंभीर आरोप लोंढे यांनी केला. असे असंवेदनशील नेत्यांचे राजीनामे घेण्याची हिंमत मुख्यमंत्री देवेंद्र फडणवीस दाखवतील का, असा प्रश्नही त्यांनी विचारला.

नागपूरमध्ये झालेल्या पत्रकार परिषदेत लोंढे यांनी सांगितले की, सध्या नवरात्र सुरू आहे आणि देवीची आराधना केली जात आहे. पण सध्याची परिस्थिती पाहता उत्सव साधेपणाने साजरा करता येऊ शकतो. जनतेला काटकसरीचे आवाहन केले जाते आणि भाजपचे नेतेच उत्सवाच्या नावाखाली गरबा आयोजित करून कोट्यवधी रुपये उधळत आहेत, असे ते म्हणाले. भाजप प्रदेशाध्यक्ष रविंद्र चव्हाण, मंत्री आशिष शेलार, आमदार अतुल भातखळकर, माजी खासदार गोपाळ शेट्टी, आमदार संजय उपाध्याय आणि आमदार विनोद शेलार यांनी गरब्यावर भरमसाठ खर्च केला आहे, असा आरोप त्यांनी केला. दुष्काळाने होरपळणाऱ्या शेतकऱ्यांची ही क्रूर थट्टा आणि जखमेवर मीठ चोळणारा विकृत प्रकार आहे, असेही लोंढे यांनी म्हटले.

लोंढे यांच्या म्हणण्यानुसार, रवींद्र चव्हाण यांनी डोंबिवली येथे नमो नमो नवरात्री उत्सव आयोजित केला आहे. संत सावळाराम महाराज क्रीडा संकुलात गरब्यासाठी मोठा एअर कंडिशन मंडप उभारला आहे. त्यात मोठमोठे झुंबर आणि विद्युत रोषणाई आहे, मोठ्या स्वागत कमानी, एलईडी स्क्रीन आणि एलईडी लाईट्स आहेत. यासाठी लाखो रुपये उधळले गेले, असा त्यांचा आरोप आहे. दररोज १० ते १५ हजार लोक सहभागी होतात. ७००० चौरस फुटांचा इनडोअर प्लॅटफॉर्म आणि २०००० फुटांचा आउटडोअर प्लॅटफॉर्म केला असून त्यासाठी ६० लाख रुपये खर्च झाल्याचे लोंढे यांनी सांगितले.

मंडपातील २००० टनाच्या एसीचे भाडे दररोज ६० लाख रुपये आहे, असे लोंढे म्हणाले. साउंड आणि लाईट्सवर दररोज २५ लाख रुपये खर्च होतात. मंडपासाठी २५ जनरेटर सेट असून त्यांचे दररोजचे भाडे ६.५ लाख रुपये आहे. गुजराती लोकसंगीतातील प्रसिद्ध गायक आणि नृत्य कलाकारांना करोडो रुपये देऊन बोलावले आहे, असेही त्यांनी सांगितले. निलेश गढवी हा नावाजलेला गायक नवरात्रीत १ ते २ कोटी रुपये शुल्क घेतो. कविता राम, सागर केंडूरकर, माधवी श्रीवास्तव आणि अंशिका चोणकर हे गायक कला सादर करत आहेत, त्यांची एका दिवसाची फी २ ते ५ लाख रुपये आहे. सिम्फनी बँडही गायकांच्या साथीला आहे. संगीत आणि गायक कलाकारांसाठी एकूण चार ते पाच कोटी रुपये खर्च झाले, असे लोंढे यांनी म्हटले. फुलांच्या आरासीवर आयोजकांकडून दररोज ३ ते ५ लाख रुपये खर्च होतात. रवींद्र चव्हाण यांच्याकडून दररोज १ ते १.५ कोटी खर्च होत असून एकूण बजेट १८ ते २० कोटींच्या घरात आहे, असा दावा त्यांनी केला.

लोंढे यांच्या म्हणण्यानुसार, फक्त रवींद्र चव्हाणच नाही तर मंत्री आशिष शेलार आणि आमदार अतुल भातखळकर यांनीही गरब्याचे आयोजन केले असून त्यावर दररोज कोट्यवधी रुपये खर्च होत आहेत. दुष्काळाचे भान ठेवून सण-उत्सव साधेपणाने साजरे करावेत, असे आवाहन मुख्यमंत्री देवेंद्र फडणवीस यांनी केले होते. मात्र त्यांच्याच आवाहनाला प्रदेशाध्यक्ष रवींद्र चव्हाण आणि मंत्री-आमदारांनी हरताळ फासला आहे, असे लोंढे म्हणाले. दुष्काळग्रस्त शेतकऱ्यांना सरकारने केवळ ५००० रुपयांची मदत जाहीर केली आहे, आणि त्याच सरकारमधील भाजपचे मंत्री व आमदार नवरात्री आणि गरब्यावर दररोज १० ते १५ कोटी उधळत आहेत, असेही ते म्हणाले.

दरम्यान, छत्रपती संभाजीनगरमधील बीड बायपासवर प्रौढ प्रताप पुरंदर या भव्य महानाट्याचा स्तंभपूजन सोहळा मोठ्या थाटात झाला. पालकमंत्री संजय शिरसाट, मंत्री अतुल सावे, माजी मंत्री भागवत कराड यांच्यासह अनेक नेते उपस्थित होते. शिवरायांचा इतिहास नव्या पिढीला समजला पाहिजे, पण त्यासाठी दुष्काळात कोट्यवधी रुपये उधळून भव्य कार्यक्रम करण्याची गरज काय, असा प्रश्न उपस्थित केला जात आहे. मराठवाड्यात दुष्काळाची झळ प्रचंड असताना नेत्यांना सामाजिक भान नसावे का, असेही विचारले जात आहे.