चंद्रपुरात गणेशोत्सवापूर्वी ६१५ सराईतांवर कारवाई; ३९ जणांना तडीपार, तडीपारांवर एआय व्हॅनची नजर

गणेशोत्सव आणि विसर्जन मिरवणुका चंद्रपूर जिल्ह्यात कुठेही कायदा-सुव्यवस्थेचा प्रश्न निर्माण न होता, शांततेत आणि सुरक्षित वातावरणात पार पडाव्यात, यासाठी चंद्रपूर जिल्हा पोलीस दलाने सराईत गुन्हेगार आणि समाजकंटकांविरुद्ध मोठी प्रतिबंधात्मक मोहीम हाती घेतली आहे. गणेशोत्सवाचा हंगाम सुरू होण्यापूर्वीच पोलिसांनी ही मोहीम सुरू केली असून त्याअंतर्गत जिल्ह्यात धडक कारवाईचा बडगा उगारण्यात आला आहे.

या मोहिमेत ६१५ सराईत गुन्हेगारांकडून चांगल्या वर्तणुकीचे बंधपत्र लिहून घेण्यात आले आहे. म्हणजेच या गुन्हेगारांनी उत्सव काळात कोणताही गुन्हा न करण्याचे हमीपत्र पोलिसांना लिहून दिले आहे. तर ३९ गुन्हेगारांना जिल्ह्यातून थेट तडीपार करण्यात आले आहे, म्हणजे त्यांना चंद्रपूर जिल्ह्याच्या हद्दीबाहेर जाण्याचे आदेश देण्यात आले आहेत. याशिवाय १,७६१ संशयितांवर मिनी तडीपारची कारवाई करण्यात आली. वारंवार गंभीर गुन्हे करून समाजात दहशत पसरवणाऱ्या ४ कुख्यात गुन्हेगारांवर एमपीडीए (MPDA) कायद्यांतर्गत अत्यंत कडक कारवाई करण्यात आली असून त्यांना थेट कारागृहात स्थानबद्ध करण्यात आले आहे.

ही संपूर्ण मोहीम पोलीस अधीक्षक आयुष नोपानी आणि अपर पोलीस अधीक्षक ईश्वर कातकडे यांच्या मार्गदर्शनाखाली राबवण्यात आली. जिल्ह्यातील सर्व उपविभागीय पोलीस अधिकारी, स्थानिक गुन्हे शाखेचे (LCB) पोलीस निरीक्षक तसेच सर्व पोलीस स्टेशनच्या ठाणेदारांनी एकत्रितपणे काम करून ही मोहीम यशस्वीरीत्या पार पाडली.

तडीपार करण्यात आलेल्या गुन्हेगारांवर बारीक नजर ठेवण्यासाठी चंद्रपूर पोलिसांनी अत्याधुनिक एआय सर्व्हेलन्स सीसीटीव्ही कॅमेरा व्हॅनचा वापर सुरू केला आहे. या व्हॅनमधील फेशियल रेकग्निशन प्रणालीत तडीपार केलेल्या सर्व गुन्हेगारांचे फोटो आणि संपूर्ण माहिती आधीच नोंदवण्यात आली आहे. त्यामुळे तडीपारीचा कालावधी सुरू असताना एखादा गुन्हेगार विनापरवाना जिल्ह्यात फिरताना किंवा प्रवेश करताना आढळल्यास, या व्हॅनचे कॅमेरे त्याला तत्काळ ओळखून पोलिसांना अलार्म देणार आहेत.

आदेशाचे उल्लंघन करून जिल्ह्यात घुसखोरी करणाऱ्या तडीपार गुन्हेगारांवर तात्काळ नवीन गुन्हे दाखल करून कडक तुरुंगवासाची कारवाई केली जाईल, असा स्पष्ट इशारा पोलिसांनी दिला आहे. गणेशोत्सवादरम्यान कोणतीही अप्रिय घटना घडू नये यासाठी पोलीस दल पूर्णपणे सज्ज असल्याचे पोलीस प्रशासनाने सांगितले आहे.

नागरिकांनी सर्व नियमांचे पालन करत सण उत्साहात आणि भक्तिभावाने साजरा करावा, तसेच कोणत्याही संशयास्पद हालचाली दिसल्यास तात्काळ पोलिसांना कळवावे, असे आवाहन पोलीस प्रशासनाकडून करण्यात आले आहे.